Ang Pagpangitag mga Solusyon
KON bahin sa pagtambal sa nakapasakit sa Wall Street, dili kulang ang mga ideya. Apan kulang ang panagkauyon. Makig-ergo ang pila ka eksperto nga angay limitahan ang utang ug LBO’s, samtang moinsistir ang uban nga ang duruha maayo alang sa ekonomiya. Ang duha ka kiliran armado kaayog mga estadistika sa “pagpamatuod” sa ilang mga punto.
Gibati ni Helmut Schmidt nga ang mga nasod nga gamhanan sa ekonomiya sa kalibotan (Tinipong Bansa, Alemanya, Japan) kinahanglang magtinabangay aron masolbar ang mga suliran sa ekonomiya sa kalibotan. Siya miingon: “Ang pagkakasarangan ug katakos sa tanang tulo ka gobyerno dili mahimong katarongan sa paggastog mas daghang panahon nga magareklamohay sa usag usa inay ilhon ang kaugalingon nilang mga kakulangan. Bisan ang mga tawong kasarangag katakos makapas-an ug responsabilidad.”
Apan suknaa ang imong kaugalingon: Pilay madahom nato gikan sa kinaiyanhon kasarangag-katakos nga mga gobyerno sa tawo? Si Schmidt miadmitir dayon, pananglitan, nga ang suliran sa utang sa Ikatulong Kalibotan “wala masolbar ug halos dili masolbar.” Ang kasarangag-katakos makasolbar ba sa dili-masolbar?
Kining mga pulong sa usa ka tawong makinaadmanon sa mga 25 ka siglo kanhi nakaigo sa puntiriya: “Dili iya sa tawo nga nagalakaw ang pagtultol sa iyang lakang.” (Jeremias 10:23) Pagkatinuod niining mga pulonga karong adlawa! Ang ekonomiya sa kalibotan komplikado kaayo nga dili gani hisabtan sa mga eksperto, unsa pa kayha ang pag-ayo niini.
Unsay imong mahimo atubangan sa kahuyang sa ekonomiya sa kalibotan? Ang Bibliya may pila na usab ka pintok nga tambag: Mamuhunan sa maalamong paagi! Matikdi ang mga pulong ni Jesus sa Mateo 6:19, 20: “Hunong na kamo sa pagtigom ug bahandi sa yuta, diin pagakutkoton sa tangkob ug taya, ug diin ang mga kawatan nagapanakasaka ug nagapangawat. Hinunoa, pagtigom kamog bahandi sa langit, diin walay tangkob o taya nga magakutkot, ug diin walay mga kawatan ang magapanakasaka ug magapangawat.”
Apan unsaon nimo pagbuhat kana—pagtigom ug bahandi sa langit? Mosugod ka pinaagi sa pag-amgo nga ikaw, sama kanatong tanan, dunay espirituwal nga mga panginahanglan nga tagbawon. (Mateo 5:3) Makatagbaw ka sa maong mga panginahanglan pinaagi sa pagpamuhunan sa butang labi pang bililhon kay sa salapi—imong panahon—sa pagtuon sa Bibliya. Mahingangha ka sa kayano ug pagkamakataronganon sa mga tubag nga ginahatag niini sa imong labing makalibog nga mga pangutana.
Ang kanhi-yuppie nga gihisgotan sa nag-unang artikulo nagbuhat gayod niana. Iyang gibalikan ang pagtuon sa Bibliya nga iyang gibiyaan sa mga tuig nga siya puliki sa Wall Street, ug iyang nakaplagan nga ang pagbuhat niana nag-usob sa iyang kinabuhi sa pagkamaayo. Nahingangha siya sa pagkahibalo nga ang Bibliya nagatagna sa kataposang pagkagun-ob sa tanang giduso-sa-kadalo nga mga sistema sa ekonomiya niining kalibotana. Sa dihang dad-on sa Diyos kining sistema sa kalibotan sa iyang kalaglagan, walay stock portfolio, walay bankroll, ang makapalit sa panalipod o kaikyasan. Ang kuwarta mahimong waypulos nga isalibay kana sa mga tawo sa kadalanan mismo. (Ezekiel 7:19; 1 Juan 2:15-17) Ang espirituwal lamang nga mga pamuhunan ang may bili unya.
Makalipay ilabina ang saad sa Bibliya nga human nianang panahon sa kalaglagan, ang kadalo dili na magmando sa kalibotan. Ang hustisya, dili ganansiya, ang maghari unya. (Isaias 9:6, 7) Sa pagkamatuod, ang pila ka tawo moingon, ‘Wall Street—unsa ba kana?’