Ang Librarya nga Paigo sa Imong Talad

HANDURAWA nga magbaton dihadiha sa koleksiyon sa mga basahon nga makatumbas sa pipila sa labing dagkong mga librarya sa kalibotan. Handurawa ang minilyong artikulo ug susamang mga taho gikan sa linibong libro, magasin, peryodiko, ug ubang mga balasahon nga paigo sa imong talad.

‘Sa unsang paagi mahitabo kini?’ mahibulong ka. Ang tubag moabot sa dagway sa tulo ka butang sa modernong teknolohiya: usa ka personal kompiyutir, usa ka modem, ug linya sa telepono. (Ang usa ka modem maoy usa ka kasangkapan nga mopasa ug modawat sa impormasyon sa kompiyutir agi sa mga linya sa telepono.) Kining tulo ka butang makabalhin sa ibabaw sa talad nga usa ka librarya.

Sa usa ka naandang librarya, bisan pag ang tinagpulo ka libong libro ug magasin gihagoan tingali sa paghan-ay, gikinahanglan gihapon ang panahon sa pagsiksik niining gikatalogog maayo nga mga basahon. Apan bisan pa sa pagkatapos sa pagsiksik sa usa ka katalogo, walay garantiya nga ang libro nga imong gipangita anaa sa estante sa librarya.

Ang Bag-ong Panahon

Pinaagi sa ibabaw-sa-talad nga kompiyutir ug usa ka modem, ang usa ka tawo makaarang sa paggamit sa labi pang dakong sistema sa kompiyutir nga naundan sa literal minilyong kasayoran nga kinuha gikan sa mga libro, mga magasin, mga serbisyo sa balita, ug ubang tinubdan, ang tanan gikatalogo diha sa pihong “mga payl” sa kompiyutir (gitawag nga data base) nga maabot pinaagig yanong mga mando.

Pananglitan, kon gustong pangitaon sa usa ka negosyante ang impormasyon diha sa mga magasin bahin sa leveraged buyouts, makahimo siya, tapos sa paggamit sa usa ka kontra-sinyas nga pang-abli, sa pagpangayog impormasyon bahin sa “mga magasin.” Human makonektar nianang kategoriya sa mga basahon, ipadayon niya ang pagpangita pinaagi sa pagmakenilya: “find leveraged buyouts.” Dihadiha, kapin sa 1.4 milyong kasayoran sa magasin nga kinuha gikan sa kapin sa 16 ka tuig nga miagi hangtod karon pangitaon sa pila ra ka segundo!

Ang matag artikulo nga nasudlan sa mga pulong “leveraged buyouts” tawgon, ug ang tanan nga artikulo idispley. Sunod, ang “display” nga mando gamiton, ug sugod sa labing bag-ong artikulo, matag titulo, petsa, ug awtor sa artikulo idispley, ingon man ang mubong sumaryo sa dugang impormasyon—sa pila ra ka segundo. Pilay iyang gasto? Duha o tulo ka dolyar—tingali.

Pinaagi niining sistemaha, ang usa ka ginang sa balay makabatog bag-ong mga ideya sa pagpangluto pinaagi sa pagtan-aw sa mga resipe nga gigamit sa nagkadaiyang mga nasod sa tibuok kalibotan. Mabatonan usab ang mga ideya sa pag-adorno ug bag-ong mga estilo ug mga urog. Ang medikal nga mga tawo makasubay sa labing bag-ong panukiduki sa microbiology ug makasunod usab sa bag-ong mga lagda nga nagaapektar sa industriya sa tambal. Ang mga abogado makapangita sa mga kaso nga susama sa iya sa bag-ong mga kliyente ug makasusi sa nagkadaiyang mga paagi sa bisan unsang kaso nga gisitar diha sa mga korte.

Ang usa ka estudyante makapangita sa halos bisan unsang ulohan nga gitudlo diha sa eskuylahan. Ang gihimo sa negosyante sa ulohang “leveraged buyouts” mahimo sa estudyante sa ulohang “black holes.” Kining tabang sa panukiduki makaiikag usab sa mga edukador, mga magsusulat, mga tigdukiduki, ug mga trabahante sa korporasyon.

Dugang pa Bahin sa Gastos

Bisan tuod kini dili mahal, ang mga gastos nagadepende sa dakong sukod kon unsang kompiyutir payl ang gigamit. Hinuon, sama sa bisan unsang industriya, ang mga gastos nagkadaiya gikan sa kompaniya ngadto sa laing kompaniya.

Sa linangkob nga pagkasulti, hinunoa, bayran lang nimo ang panahon nga ikaw konektado sa kompiyutir ug alang sa mga resulta sa imong pagpangita. Ang usa ka serbisyo sa impormasyon nagasingil ug $1 (U.S.) matag minuto sa aberids, samtang ang aberids nga pagpangita mismo molungtad sa mga pulo ka minutos. Ang takna sa adlaw maoy usa sa pila ka butang makapausab nga mahisgotan kon bahin sa gastos. Kon ang pagpangita himoon sa gawas sa kasagarang mga takna sa trabaho, ang singil mahimong abot pag 50 porsiento nga menos.

Aron maubsan pa ang gastos, ang maong mga serbisyo kasagaran mohatag hinabang sa dagway sa mga hawas sa parokyano o mga espesyalista sa ulohan. Kining abante kaayong mga libraryan nagatabang sa paghukom sa estratehiya sa pagpangita sa dili pa ang aktuwal nga pagpangita. Madaginoton kinig panahon, nga sa baylo madaginoton sa salapi. Ang pila ka kompaniya nga nagaserbisyo sa impormasyon nga nagaalagad sa komunidad sa propesyonal, ang mga abogado ilabina, tingali mosingil ug binulang bayad. Makaiikag, ang pila ka gagmayng bupete nagalikay sa dugang gastos pinaagi sa pagpalit ug panahon gikan sa mas dagkong mga bupete nga nagasuskribir sa serbisyo ug may bug-os-panahong mga trabahante nga nagahimog regular nga mga pagpangita.

Apan, unsa na man kon ikaw, sama sa daghan, mahadlok sa mga kompiyutir? Unsa na man kon dili ka makaabot sa ibabaw-sa-talad nga kompiyutir, usa ka modem, ug dugang linya sa telepono sa inyong balay? Unsa na man kon wala kay panahon sa paghimo sa kaugalingon nimong mga pangpangita bisan pag makaabot ka niining mga butanga?

Sukad sa pag-abot sa maong serbisyo, naikag niana ang mga librarya ug mga kolehiyo. Sa pagpangagpas sa dugang impormasyon bahin kanila, nakaplagan nila nga silang duha nadani. Gisabot sa mga organisasyon sa serbisyo ang mga librarya sa siyudad ug kampus ingong publikong mga gawasanan sa ilang mga serbisyo, samtang giila sa mga librarya ang ilang mga serbisyo ingong madanihon ug gamhanang galamiton. Tapos sa pagsusi sa mga posibilidad, naugmad ug mibuswak ang usa ka relasyon.

Ang mga organisasyon sa serbisyo nagtanyag sa ilang mga serbisyo nga may diskuwento ngadto sa maong mga institusyon, kinsa sa baylo nagpasa sa nadaginot ngadto sa ilang mga parokyano. Karon ikaw, ingong usa ka parokyano o estudyante, makapahimo nga may modukiduki alang nimo bisan pa wala kay kompiyutir.

Sama sa daghang butang sa modernong teknolohiya, sama sa microwave ovens ug digital nga mga orasan, ang prisyo sa mga pagpangita nagkaubos. Tungod niini ang librarya nga paigo sa usa ka talad mas maabot sa daghang tawo.

[Kahon sa panid 27]

Ang Bag-ong Libraryan

Adunay bag-ong libraryan sa lungsod, ug dili na kinahanglang mobiya ka sa imong talad aron moduaw kaniya. Hinunoa, kab-ota lamang ang imong telepono. Siya nailhan nga usa ka ahente sa impormasyon o information broker. Apan dili nimo siya hikaplagan diha sa inyong lokal nga librarya. Siya nagalingkod sa usa ka talad diha sa usa ka opisina, ug alang sa usa ka bayad mohimo siya sa panukiduki alang nimo pinaagi sa espesyal nga koneksiyon sa telepono nga gibatbat sa mga panid niining magasina.

Ang iyang trabaho dili sayon sumala sa mopatim-aw. Kinahanglang siyang mahibalo dili lamang kon hain sa kapig 3,000 ka payl sa kompiyutir (data bases) ang pangitaon apan kon unsaon usab sa pagpangitang mas dali sa usa ka linaing data base ug kon unsang yawing mga pulong ang gamiton alang sa pagpangita.