Sa Dihang ang mga Panginahanglan Mapatagbaw

DAGHANG katuigang milabay ang panagna gihimo: “Ang mga mata sa mga buta mangabuka, ug ang mga igdulungog sa mga bungol makadungog.”

‘Apan imposible kana,’ tingali moingon ka. Kon mao, hayan ikaw mahibulong sa pagkasayod nga daghang ika-20-siglong mga bioteknisyan wala maglantaw niana nga imposible. Ngano?

Panan-aw Alang sa Buta?

Kon pangutan-on kon unsang organoha nga imong makita ang mga butang, ikaw motubag gayod: ‘Ang akong mga mata.’ Ang bioteknisyan, hinunoa, motubag: ‘Ang akong utok.’ Ug siya ang mas tukma. Samtang ang mata mao ang organo sa igbalati nga nagadakop sa kahayag ug mopatunghag elektrikal nga mga pangidlap, ang luyo nga bahin sa atong utok ang nagahatag kanato ug pagsabot sa makita sa mata.

Ang basahong Science et Vie sa Pransiya karong bag-o nagsumariya sa pagdukiduki nga gihimo sa pagtabang sa buta nga makakita sa artipisyal nga paagi. Ibutang diha sa sentro sa panan-aw sa utok, mao ang gamayng electrodes nga konektado sa usa ka video nga kamera nga makapadalag mga signal gikan sa kamera direkta ngadto sa utok. Usa ka panimati sa kahayag ang mapatungha, sama nianang atong “pagkakitag mga bitoon” kon maigo ang ulo. Pinaagi sa paghimog tukmang mga koneksiyon, basahon sa utok ang mga pangidlap sa kahayag sama sa atong pagbasa ug mga karatula nga hinimo sa daghang indibiduwal nga mga suga. Samtang ang mga mata nga nabuta matabangan sa pagkakita, ang mga tawo nga nadaot ang mga sentro sa pagtan-aw diha sa utok dili makapahimulos niining paagiha.

Igdulungog Alang sa mga Bungol?

“Alang sa dalunggan, ang suliran dili kaayo grabe kay sa mata,” matud pa ni Dr. Jean-Michel Bader. Maayong kauswagan ang nahimo sa paggama ug cochlear implants aron mabalik ang usa ka sukod sa pandungog sa pila ka tawo nga nadaot ang igdulungog. Apan komosta kadtong pagkabungol gumikan sa mga suliran sa pag-usab sa mga balod sa tingog nga mga elektrikal nga mga pangidlap aron ipasa ngadto sa utok?

Alang sa ilang kaayohan, mauswagon ang pagdukiduki diha sa elektronikong dalunggan sa ilalom. Pinaagi sa usa ka gamit nga dunay de-bulsa nga mikropono nga mohimo sa tingog nga mga elektrikal nga mga pangidlap, ang mga signal ipasulod sa alambre ngadto sa usa ka gamay nga transmiter nga gikonektar sa panit duol sa dalunggan. Usa ka gamay nga receiver nga ibutang ilalom sa panit ug konektado direkta sa auditory nerve mopasa sa mensahe paingon sa utok, manglaktod sa normal nga agianan.

Ang Panginahanglag Dugang Kasaligang Tabang

Bisan pa sa mga palaabuton nga gitanyag sa pagdukiduki, ang mga siyentipiko sa realistikanhon midawat nga ang mga pagsulay sa pagtul-id sa mga depekto sa lawas sagad mapakyas tungod kay ang siyensiya kulang sa pagsabot sa kakuti sa paagi sa pag-obra sa atong pisikal nga mga organo ug sa mga igbalati. Busa, ang lumba nagapadayon sa pagtukod ug labi pang kompletong hulagway sa obra sa pagpalakaw sa atong lawas.

Samtang daghan nagbutang sa ilang pagsalig diha sa siyensiya aron mabalikan ug panan-aw ang buta ug igdulungog ang bungol, duna pay labing kasaligang basehanan sa paglaom. Kini mao ang saad sa Maglalalang sa igbalati sa tawo, si Jehova nga Diyos. Siya mao ang usa kinsa sa dugay na kaayong panahon nagdasig sa panagna: “Nianang panahona ang mga mata sa mga buta mangabuka, ug ang mga igdulungog sa mga bungol makadungog.” (Isaias 35:5) Sa unsang paagi kita makatino nga kadtong mga pulonga matuman? Unsa kanang “nianang panahona” nga diin kini gisaad nga mahitabo?

Mga Panan-awng Daan sa Umaabot

Kon ang usa ka butang nahitabo sa miagi, dili ba mohatag kana kanimo ug pagsalig nga mahitabo kini pag-usab, ilabina kon ang usa nga responsabli niini nagaingon nga kini matuman? Buweno, sa unang siglo sa atong Komung Panahon, gibalik ni Jesu-Kristo ang mga igbalati niadtong nawad-an niini, sama sa iyang gitaho kas-a: “Ang mga buta nagpakadawat ug panan-aw, ang mga bakol makalakaw na, ang mga sanlahon nangahinlo ug ang mga bungol makabati na.” (Lucas 7:22) Kining mga pagpang-ayo wala magsalig sa modernong teknolohiya.

Kas-a giayo pa gani ni Jesus ang usa ka tawo nga natawong buta. Daghang mga silingan ug mga kaila miila sa milagro. Ang tawo kansang panan-aw nabalik miingon: “Sukad sa sinugdan wala pa gayod igdungog nga dihay nakapabuka sa mga mata sa usa ka tawong nahimugso nga buta. Kon kining tawhana dili pa gikan sa Diyos, wala unta siyay arang mahimo.” Oo, gibalik ni Jesus ang panan-aw niadtong tawhana pinaagi sa gahom sa Diyos!—Juan 9:32, 33.

Unsay nagapamatuod niini? Aw, nga pinaagi sa gahom sa Diyos, ang tanan nga nag-antos sa nadaot nga mga igbalati mamaayo! Busa, himoon ni Jesu-Kristo kining mga milagroha sa pagpasundayag sa gamay nga bahin kon unsay mahitabo sa tibuok yuta ilalom sa pagmando sa Gingharian sa Diyos. Kining “niadtong panahona,” maoy sa panahon sa pagmando sa Gingharian sa Diyos, nga dunay dako literal nga katumanan sa tagna sa Bibliya: “Ang mga mata sa mga buta mangabuka, ug ang mga igdulungog sa mga bungol makadungog.”—Isaias 35:5.

Ang pagkasayod sa saad sa Diyos sa umaabot maingon man ang pagkadangat ug personal nga relasyon kaniya mopahimo sa usa ka tawong baldado sa pagbati nga ang pagkabaldado dili kinahanglang madaogon. Kini makahimo kaniya sa pagbaton ug mas malipayon, labi pang bug-os nga kinabuhi karon. Sa pagkamatuod, pagkakatingalahan unya sa dihang kadtong nadaot ang mga igbalati magmaya ug malipay ug sa dihang ang tanang kaguol ug panghupaw mangawala!—Isaias 35:10.

[Letrato sa panid 10]

Pagkakatingalahan unya sa dihang kadtong nadaot ang mga igbalati niadto magmaya ug malipay ug sa dihang ang tanang kaguol ug panghupaw mangawala!