Usa ka Yabag nga Nota sa Industriya sa Musika?

PAMATIG maayo sa honi nga nagagikan sa imong radyo o imong mga rekord o sa imong telebisyon. Ang imo bang nadungog maoy tinuod nga mga tulonggong kinuldasan? Tinuod ba kanang seksiyon sa mga tulonggong metal nga imong gipamatian?

Samtang nagaabante kaayo ang teknolohiya sa musika, kanang mga tingog nga imong nadungog basin dili tinuod gikan sa mga tulonggon nga imong gihunahuna. Basin nagapamati ka sa usa ka synthesizer. Sa pagkamatuod, alang sa daghang musikero, ang synthesizer nagahawas sa usa ka yabag nga nota diha sa industriya sa musika. Gibati sa maong daghang musikero nga giilog sa synthesizer ang ilang mga trabaho!

Unsa ang Synthesizer?

Ang synthesizer maoy usa ka instrumento nga pinaagi niana ang tingog mapatungha sa elektronikong paagi. Ang mga kinaiya sa tingog mabag-o ug makontrolar sa tiggamit. Ang tingog kasagaran mapatungha gikan sa tapyanan o keyboard, ug kon matuod kini, ang han-ay sa mga teklado maoy sama sa iya sa piano.

Ang synthesizer gitawag sa ingon kay kini nagakombinar sa lainlaing giprogramang mga kinaiya sa pagpatungha sa tingog niini. Ang pila ka synthesizer ug eletronik nga mga tapyanan nagatanyag ug digital sampling nga bahin nga pinaagi niana marekord sa aktuwal ang mga tingog nganha sa tapyanan ug mapatungha sa gitas-on sa nota sumala sa mga tekladong gikablit. Bisan tuod ang maong mga tingog dili tingali makombinar sa estriktong kabatbatan, kining artikuloha magaapil sa maong mga tapyanan ingong synthesizers.

Ang mga synthesizer nagalungtad sa daghan nang katuigan. Apan ang pagkailado nila misulbong ilabina sa katuigang 1970, sa dihang ang instrumento gigamit sa popular nga musika aron ipatungha ang usa ka bag-ong tingog nga mihatag kompetisyon sa elektrik nga sista. Bisan tuod sa sinugdan kini daw bag-o lamang nga instrumento nga makapatunghag pila ka makaiikag nga tingog, ang mga synthesizer sa aktuwal ikaprograma pinaagig digital nga teknolohiya sa pagsuhid ug pagpatungha pag-usab sa mga tunog sa naandang mga tulonggon.

Sa Unsang Paagi ang Synthesizer Nagapameligro sa mga Trabaho?

Handurawa nga ikaw musikero, ug ikaw nanginabuhi pinaagi sa pagtokar sa biyolin diha sa mga sesyon sa pagrekord alang sa musika sa telebisyon, mga komersiyal, ug sa susama. Atong ipananglit nga alang sa umaabot nga pagrekord, kinahanglanon ang 20-kinuldasang instrumento.

Buot sa direktor sa musika nga menosan ang gastos sa bayad sa usa ka dakong grupo sa biyolinista, ug makuha niya ang samang bug-os nga tingog sa tulonggong kinuldasan pinaagi sa paggamit lamag unom ka biyolinista ug usa ka synthesizer player. Busa, giilog sa synthesizer ang trabaho sa 14 ka biyolinista alang sa maong pagrekord, ug basin apil ka niadtong wala patugtoga. Karon, kon kas-a ra kini mahitabo, tingali dili ka mabalaka. Apan kon kini mao ang mahimong sumbanan—ug gibati sa pila ka musikero nga kini mao na—nasabtan ba nimo sa unsang paagi ang synthesizer makadaot sa imo mismong pangabuhi?

Makasuhid ba nga tukma ang synthesizer sa tono ug tunog sa naandang mga tulonggon? Si Mike Comins, biyolinista sa rekording ug opisyal sa Recording Musicians Association, miingon: “Kami magkomedyahay kanunay bahin sa ideya nga si Georg Solti mogawas ug moadto sa entablado sa Orchestra Hall sa Chicago, ug siya lamang ug ang synthesizer player ang anaa. Siya moisa sa iyang mga kamot, ug kini siya bug-os magmugna pag-usab sa tingog sa Chicago Symphony . . . Kini komedya nga makapasubo, kay bisan pag ang synthesizer wala pa makapuli sa usa ka symphony orchestra sa publiko o sa rekord, kini may katakos sa pagbuhat niana, ug kana makahahadlok.”

Orkestra Sulod sa Kahon?

Niadtong 1984 ang usa ka musikero nagrekord sa usa ka album uban sa tingog sa usa ka dakong orkestra ug nagtawag sa “orkestra” nga “LSI Philharmonic.”a Ang “orkestra” sa aktuwal maoy synthesizer. Ang komposer migugol ug mga 2,000 oras sa usa ka tuig ug tunga aron sa pagprograma sa digital synthesizer sa pagpatungha sa tingog sa orkestra. Katingalahan ang mga resulta. Ang magasing Keyboard nagtawag niini nga “usa sa mas talagsaong mga kahimoan sa synthesis” ug mikomento nga “ang ideya nga hilimbongan kita sa usa ra ka tapyanan o keyboard sa paghunahuna nga kana mao ang Chicago Symphony dili bug-os imposibleng ideya.”

Ang mao bang pagsuhid sa mga tingog sa orkestra nagpasabot nga ang naandang mga tulonggon makaraan na sa dili madugay? Dili sumala sa komposer nga gihisgotan sa ibabaw, kinsa nagaingon, “Gusto nako ang orkestra . . . Mas gusto gihapon nako ang orihinal!”

Uyon ang daghang musikero. Gibati sa pipila nga walay synthesizer ang makasuhid nga tukma kaayo sa mga tono ug tunog sa ubang tulonggon nga kini aktuwal makapuli kanila. Ang musikerong si Walter Sear miingon: “Ang tingog sa [gi-synthesize] nga trompeta dili samag trompeta alang sa usa ka eksperyensiadong musikero. . . . Ug ang pagbahin ug pagpalutaw sa mga tingog sa huyoponon nga tulonggon dili kinaiyanhon sa usa ka tapyanan.” Apan nahadlok siya nga ang mga tawo mahimong dili mapilion kon unsay ilang pamation ug nakakat-on na sila sa pagdawat sa tingog nga gipatungha sa elektronik nga paagi bisan pa sa “kakulang nianang gagmayng mga depekto nga nagahimong makaiikag kaayo sa acoustic nga mga instrumento.”

Sa pagkamatuod, ang synthesizer nagapahinabog dakong panaglalis diha sa industriya sa propesyonal nga musika. Apan ang kabantog sa synthesizer wala lang mag-apektar sa propesyonal nga mga musikero. Apektado usab niini ang iladong instrumento nga tingali anaa sa inyong balay.

Ang Kataposang mga Adlaw sa Piano?

Tungod sa synthesizer nga rebolusyon, ginaatubang sa piano mismo ang lisod nga panahon. Ang mga kompaniya sa piano nagtaho nga nagakadiyutay ang halin, ug ubay-ubayng iladong tiggamag piano wala na mamaligya. Apan, sa samang yugto sa panahon, ang halin sa synthesizer misulbong.

Hinuon, dili ang tingog sa piano ang nahimong dili popular. Sumala sa gisaysay sa usa ka tag-iyag studio: “Tinong adunay panginahanglan sa mga tingog sa piano, apan 99 beses sa 100 ang mga kliyente dili maikagon sa kalunsay bahin sa ilang pagbaton niana.” Daghan mopalabi sa paggamit sa synthesizer tungod sa dili-mag-usab-usab nga paningog, pagkamadala ug sa daghang kaso, pagkamaabot. Ngani, daghang synthesizer ginabaligyang ubos sa katunga sa bili sa piano.

Nagpasabot ba kini nga hapit nang pulihan sa synthesizer sa bug-os ang piano? Giduhaduhaan sa pipila nga kini mosangpot niana. Ang ehekutibo sa pagpanggama si John Steinway miingon: “Walay makapuli gayod sa gipaigo nga lihok sa natural nga piano. Bisan pag nagabuhat silag talagsaong trabaho niining bahina, sa akong hunahuna dili gayod sila makahatag sa player sa matang sa pagkontrol nga iyang makuha gikan sa usa ka piano.”

Bisan pa niana, gikan sa punto de vista sa tiggamag piano, tin-aw ang ebidensiya: Ang halin sa piano mius-os, ug gipalabi sa mga tawo ang synthesizer. Kini mahimong umalagi rang hilig. O mamahimo, sumala sa giingon sa magasing Keyboard, “ginatan-aw nato ang una sa kataposang mga adlaw sa piano.”

Nagasubli ba sa Kaugalingon ang Kasaysayan?

Dili bag-o ang suliran. Sa tibuok nga kasaysayan, tungod sa kauswagan sa teknolohiya daghang mga trabahanteng may kahanas sa kalit nawad-ag trabaho. Ug karon, tungod sa synthesizer, naaninag sa pipila ka propesyonal nga musikero ang pagkawalay-trabaho sa masulob-ong kapunawpunawan sa ilang karera.

Alang niadtong nalangkit sa paggama ug pagpatokar sa synthesizers, gibuksan sa teknolohiya ang mga pultahang may daw waykinutbanang kahigayonan. Alang niadtong nagapangabuhi sa pagtugtog sa naandang mga tulonggon, ang synthesizer nagahawas sa usa ka yabag nga nota nga mahimong mag-ilog sa ilang mga trabaho.

Busa sa sunod panahong makadungog kag musika sa imong TV, radyo, o record player, pamatig maayo, ug ayaw pagpalimbong sa imong mga igdulongog. Basin nagapamati ka sa usa ka synthesizer.

[Mga footnote]

[Blurb sa panid 14]

“Ang tingog sa [gi-synthesize] nga trompeta dili samag trompeta alang sa usa ka eksperyensiadong musikero . . . Ug ang pagbahin ug pagpalutaw sa mga tingog sa huyoponon nga tulonggon dili kinaiyanhon sa usa ka tapyanan.”