Ang Buhata-sa-Imong-Kaugalingon Alang ba Kanimo?

IKAW ba maikagon sa buhata-sa-imong-kaugalingon? Dugang ug dugang mga tawo maikagon. Nabantog kaayo ang hilig sa buhata-sa-imong-kaugalingon nga ang bag-ong mga pagsulay sa Britaniya nga ipatuman ang usa ka pagdili sa pamalit-baligya sa Dominggo gitutolan sa hugot sa mga tag-iya sa nagkaylap nga mga supermarket nga napunog mga suplay alang sa mga maikagon sa pamuhatbuhat sa balay.

Busa ang buhata-sa-imong-kaugalingon alang ba kanimo? Unsay motabang nimo sa pagkab-ot sa maalamong desisyon?

Ipha ang Gasto

Una mosugod sa usa ka trabaho, maalamon gayod nga banabanaon ang gasto niini. Imong hidiskobrehan nga mabutyagon ang pagtandi sa mga singil sa usa ka hanas nga propesyonal sa gasto sa materyales alang sa butang imong kinahanglanon sa pagbuhat niana sa imong kaugalingon. Apan ayaw hikalimti ang natagong ekstrang gasto. Unsa ba kana?

Daghang propesyonal nagagarantiya nga ang ilang trabaho makakab-ot sa usa ka tinong sukdanan sa usa ka tinong panahon. Kon mapakyas sila, ikaw kasagarang makapangayog usa ka matang sa bayad. Sa kadugayan, ang pagbayad ug diyutayng kapin ug makapahimulos sa mga serbisyo sa usa ka propesyonal basin sa imong bentaha.

Ang laing butang nga tagdon mao ang gasto sa imong panahon. Ang imo bang proyekto sa buhata-sa-imong-kaugalingon makapaluya kanimo sa lawas nga ikaw motrabaho sa imong regular nga trabaho nga gikapoy? Ang imo bang buhata-sa-imong-kaugalingon nga trabaho nagahikaw kanimo sa panahon nga gikinahanglan aron mahuptan ug mapalig-on ang bugkos sa kaminyoon? Kon ikaw minyo, unsay hunahuna sa imong kapikas sa imong mga proyekto ug sa panahong gastohon nimo kanila? Ug ang imong mga anak, sila ba malipay sa imong ginatrabaho? Ang “pagkaminyo” nganha sa buhata-sa-imong-kaugalingon nga trabaho makapugas ug mga binhi sa kasamok uban sa pamilya ug mga higala.

Bisan pa niana, posible ang paghupot sa maayong mga relasyong pamilyahanon ug pagtrabaho gihapon sa mga proyektong buhata-sa-imong-kaugalingon. Sa unsang paagi? Pinaagi sa pagpangayo sa tabang sa imong pamilya. Ang imong kapikas sa kaminyoon makaduyog kanimo, sa pagplano kaha o sa aktuwal nga pagbuhat sa trabaho, tingali magaatiman pa sa pipila sa imong ubang mga buluhaton samtang ginahatag nimo ang bug-os nga panahon sa trabahong pagahimoon. Sa pagkamatuod, ang imong pamilya ug mga higala angay nga konsiderahon.

Tingali maayo ang imong paghikay sa mga butang, nga giplano ang proyekto ug gipangayo ang kooperasyon sa imong pamilya, apan nabatonan ba nimo ang tukmang kahimanan?

Ang Bili sa Kahimanan

Nadasig ka ba sa sinawong mga brosyur nga nagapadayag sa malamposong mga proyekto? Apan nasayod ka ba unsang kahimanan ang gigamit, ug tag pila kana? Ang pagpalit ba sa maong kahimanan maabot sa badyet sa inyong pamilya? Usahay, basin imong hidiskobrehang ang pag-abang sa pipila sa mas dagkong kahimanang dekoryente usa ka praktikal nga kapilian kon ang ilang prisyo kon paliton dako kaayo apan kinahanglanon kaayo. Makahimo ka sa daghang buhata-sa-imong-kaugalingon nga proyekto pinaagig pangunang kahimanan lamang. Ugaling, aron kana molungtad ug dugay, atimana kana pag-ayo.

Diin nimo ibutang ang imong kahimanan? Kon magahukom bahin sa usa ka tipiganang dapit, paneguroa nga ang mga kahimanan protektado ug tukmang pagkatagad aron kana magpabilin sa maayong kahimtang. Ang pag-ipon sa mga kahimanan sa usa ka hunos makadaot kanila. Hikaya ang usa ka tinudlong lugar alang sa matag himan. Makatabang ang pagkudlis sa laraw sa usa ka himan sa lapad nga tabla. Itaod kining tablaha sa bungbong sa imong buhatan o aparador sa himan. Dayon ikaw-it ug ibitay ang kahimanan dinha. Busa dali nimong makita kon kaha ang himan anaa sa iyang dapit o wala.

Ang pila ka himan nga gamiton nga giinat sa usa ka kuwadro samag fretsaws, kinahanglang tangtangon una ipondo. Ang kadaghanang kahimanan kinahanglang limpiyohan ug lanahan aron magpabiling bililhon. Himoa ang pagmentenar sa himan nga usa ka bahin sa bisan unsang buhata-sa-imong-kaugalingon nga proyektong imong himoon.

Nabanabana nimo ang gastos ug gipalabi nimo ang pagbuhat niana sa imong kaugalingon. Ang tanang himan naandam na ug anaa sa maayong kondisyon. ‘Apan may butang nakulang,’ tingali moingon ka. ‘Dili ako eksperyensiado.’ Nagkahulogan ba kini nga ang buhata-sa-imong-kaugalingon nga trabaho imposible na?

Kalamposan nga Walay Kasinatian?

Ang kalamposan sa unang trabaho dili moabot nga awtomatiko. Hinuon, ang makatabang nga giya mao ang pagpadapat sa panultihon: Sundag maayo ang mga instruksiyon. Apan kansang mga instruksiyon?

“Sa kapid-an nga magtatambag adunay kahimoan,” nagaingon ang usa ka karaang proverbio. (Proverbio 15:22) Busa, sa dili ka pa mosugod sa pagbuhat niana sa imong kaugalingon, konsultaha ang mga eksperto. Makapahimulos ka sa natigom nga kaalam sa mga eksperto pinaagi sa pagbasa sa ilang mga sugyot diha sa daghang buhata-sa-imong-kaugalingon nga basahon. O kon usa sa imong mga higala nakahimo nang malamposon sa susamang trabaho, suknaa siya kon giunsa niya paghimo kana ug kon unsang mga sugyot ang iyang ikahatag.

Kinahanglanon ang Pagpalayo sa Kapeligrohan

Hinumdomi ang panginahanglan sa pagpalayo sa kapeligrohan. Gamita ang mga himan diha lamang sa paagi nga gituyo nga gamiton kana. Kon tabangan ka sa imong mga anak, tudloi sila sa pagtahod ug hustong pag-atiman sa mga himan, ilabina kanang hait ug peligroso.

Nagkadaiya kaayo ang mga proyekto nga imong mahimo sa imong kaugalingon. Apan aron malikayan nga mahimong dili timbang sa maong mga trabaho, konsideraha ang tambag sa ubang tawo. Unya, ipasibo ang mga sugyot sa imong kaugalingong kahimtang. Bisan kon unsa ang giplanong proyekto, tun-i kanag maayo sa dili ka pa mohukom sa imong kaugalingon.

[Kahon/Letrato sa panid 18]

KON UNSAON PAG-ATIMAN SA IMONG MGA HIMAN

◻ Gamita sila sa tukmang paagi

◻ Limpiyohi sila sa bug-os

◻ Tipigi sila sa hustong paagi