Gikan sa Among mga Magbabasa

Mga Depekto Ako nag-antos sa grabe nga pagkadili-makakita sa layo sukad sa sayis anyos pa ako. Nasina ako sa tanan nga dunay normal nga panan-aw ug maulaw sa pagsul-ob sa akong antipara—baga kaayo ang mga lente niini. Ang artikulo bahin sa espesyal nga mga panginahanglan (Agosto 22, 1989) nakatabang kanako sa pagkaamgo nga ang uban, sama sa buta ug bungol nga babaye si Janice, nakaalagad gihapon sa Diyos bisan pa nga mas dako ang iyang depekto kay kanako.

S. J., Pransiya

Mga Daogdaogan Ang mga artikulo sa “Mga Batan-on Nangutana . . . ” bahin sa mga daogdaogan (Agosto 8, 1989) miabot sa tukmang panahon! Sa miaging tuig gidaogdaog ako halos sa tibuok klase tungod kay nagtuo sila nga dili ako “kalmado.” Ug gisungogsungog nila ako. Usahay masakitan kaayo ako nga milugmaw ang mga luha sa akong mga mata. Sanglit mao pay akong pagsugod ning bag-ong tuig sa pagtungha, sulayan ko ang pipila ka sugyot.

Y. P., Tinipong Bansa

Luwas nga Pagkaon Nalingaw ako sa inyong mga artikulo bahin sa pag-andam sa pagkaon (Hunyo 22, 1989), apan nabalaka ako bahin sa tambag sa pagpabokal sa kaduhaduhaang tubig. Tinuod nga ang pagpabokal mopatay sa mga kagaw, apan ang tubig sa ubang mga dapit, sama sa kabaryohan sa Tungang-kasadpan sa Tinipong Bansa, ang tubig nahugawan kaayo sa nitrates. Ang pagpabokal nianang tubiga ug ang pagamit niini aron imnon peligroso kaayo, ilabina sa mga masuso. Ang nitrates dili makuha pinaagi sa pagpabokal, ang pagpabokal mopadaghan hinoon sa nitrates diha sa tubig. Palihog ipahibalo sa mga magbabasa nga ipasusi (kon praktikal) ang ilang mga tuboran sa tubig kon nahugawan ba kini sa nitrate sa dili pa pabokalan aron imnon.

M. C., Tinipong Bansa

Gisultihan sa U.S. Environmental Protection Agency ang “Pagmata!” nga dili tinuod maalamon ang pagpabokal sa tubig ilimnon nga nahugawan sa nitrates nga gikan sa abuno o sa hugaw. Kini nagadepende sa sukod sa pagkahugaw. Diha sa nagakaugmad nga kayutaan, malisod usahay, o imposible, alang sa mga magbabasa nga tukmang masusi ang lokal nga tuboran sa tubig kon may nitrate ba kini. Bisan pa, ang pagpabokal sa kaduhaduhaang tubig maalamon gihapon nga panagana diha sa mga nasod diin mas dako ang mga kapeligrohan sa pagkanahugawan sa kagaw kay sa pagkanahugawan sa nitrate.—ED.

Panagtratohay Ang artikulo sa Abril 22, 1989, bahin sa panagtratohay nakapalibog kanako. Bisan ang paggunit sa mga kamot, paggakos, o paghalok mopasamot sa tinguha sa pagpadayon. Ang parisan angay dasigon nga dili magtandogay.

K. R., Tinipong Bansa

Adunay panginahanglan sa pagkatimbang niining bahina. Ang nangaging mga artikulo espisipikong naghisgot sa ulohan sa pagpabiling maputli. (Tan-awa ang “Awake!” sa Nobyembre 8 ug Disyembre 8, 1985.) Ug ang artikulo nga gihisgotan nagpasidaan usab nga ang mga ekspresyon sa pagmahal dili angay buhaton tungod sa mahakugong kaibog. Apan, ang tukmang pagpakita sa paghigugma sa dili pa magminyo wala idili sa Kasulatan. (Awit ni Solomon 1:2; 2:6; 8:5) Ang mga indibiduwal kinahanglan mohimog personal nga desisyon niining bahina, isilsil sa hunahuna ang ilang mga pagbati ug mga limitasyon, ang mga hunahuna sa uban, ug ang ilang obligasyon sa pagpabiling maputli sa mga mata sa Diyos.—ED.

Pag-undang sa Pagtabako Salamat kaninyo alang sa artikulong “Napulo ka Paagi sa Paghunong sa Pagtabako.” (Hulyo 8, 1989) Gigamit ko kini sa pagtabang sa usa ka tawo nga dugay nang nanabako ug wala makahunong. Nagkuha usab ako ug gipadakong mga kopya sa artikulo ug gibutang kini sa akong trabahoan, diin daghang mga tigpanabako ang moagi. Sila nakadayeg kaayo sa materyal, ug gipadapat sa pipila ang ilang nabasa.

R. L. B. S., Brazil