Sanong sa Usa ka Magbabasa sa Usa ka Artikulo sa Pagmata!
Pagkinabuhing May DOWN’S SYNDROME
ANG Agosto 8, 1989, nga isyu sa magasing Pagmata! nasudlag usa ka artikulo kabahin sa usa ka batang babayeng ginganlag Suzy nga natawong may Down’s syndrome. Gibatbat sa artikulo ang dakong gugma, kahago, ug pailob nga gipakita kang Suzy sa iyang mga ginikanan, igsoong babaye, ug igsoong lalaki. Ingong sanong sa maong artikulo, usa ka babaye sa Spokane, Washington, misulat sa mosunod ngadto sa Pagmata!:
“Human sa pagbasa sa Agosto 8 nga Awake! kinahanglan gayod nga mosulat ako kaninyo. Buot kong magpasalamat kaninyo sa pagpatik sa artikulo kabahin sa batang si Suzy. Katingad-an ang pagbating akong nabatonan kay ako maoy ‘ginikanan’ sa akong ‘batang’ inahan, mao nga gibati ko nga kaamgid sa inahan ni Suzy. Buot kong kamong tanan masayod sa lain pa sa daghang butang giatubang nato karong adlawa, ug sa kadako sa among pagkadasig sa buluhaton nga inyong ginabuhat sa pagtabang namo sa pagsagubang.
“Ako natandog kaayo sa batang si Suzy nga may Down’s syndrome nga ako nakahilak. Ako maluoy kaayo sa maong mga bata ug mga ginikanan, kay daghan ang akong nailhan. Samtang gibasa ko ang kalisdanan ni Suzy sa kinabuhi, mihilak ako tungod sa akong inahan. Ako mismo tigulang nang babaye nga anaa sa panuigong setenta, ug nakita ko ang kinabuhi sa akong inahan nga nahibalik sa pagkabata.
“Ako nahinumdom kaniya nga sa sinugdan matahom, mapinanggaon, gimahal, ug masadyaong batan-on. Karon siya nuybenta anyos na. Tungod sa sunodsunod nga stroke, nasud-ong ko nga ang iyang lawas nadaot nga nahimong tikuko nga lawas, apan ang iyang mga obra sa lawas normal.
“Ang una niyang medyor stroke nagpatungha sa kawalay-katakos sa pagbalanse sa iyang checkbook, paggamag listahan sa groseria, ubp. Sa usa ka tuig, ang maong kondisyon mius-os nga siya dili na makaarang sa pag-init sa pagkaon alang sa timotimo o sa diyutayng pagkaon.
“Usa ka tuig ug tunga sa ulahi, ang laing medyor stroke nagwagtang sa iyang katakos sa paglakaw, sa kahanas, gahom sa pagsulti, ug siya wala nay kontrol sa kaugalingon. Siya nahidangat sa ang-ang sa ‘pagkabata’ sa ikaduhang panahon, ug nakita ko siyang ingon. Kinahanglang siya hungitan, hapinan sama sa bata, ug alsahon gikan sa higdaan ngadto sa wheelchair.
“Si Mama dili makasulti kanamo sa pagsulti kon unsay iyang gihunahuna, gibati, kon unsay iyang gusto. Apan kami nakatuon sa pagkomunikar pinaagi sa mga mata, mga pahiyom, ug mga luha! Ang iyang nawong sa literal mosanag sa dihang estoryahan ko siya bahin sa butang makaiikag nga akong nadunggan sa Kingdom Hall of Jehovah’s Witnesses nga akong ginatambongan, o kon ang pipila sa mga igsoon didto nagpadala kaniyag mensahe, o tingali butang nga akong gibasa nga makapaikag ilabina diha sa Awake! o The Watchtower.
“Inigbiya ko na kaniya, kasagarang manglugmaw ang luha sa iyang mga mata, ug mohalok siyag hinay sa akong aping ingong panamilit. Hinunoa, kon tapos sa pagduaw ako moingon, ‘Ma, alas siyete na, ug kinahanglang moadto ko sa tigom sa Kingdom Hall,’ siya mopahiyom ug moyango, ‘oo,’ ug hatagan akog masipang halok. Unya tan-awon niya ako sa akong paglakaw paingon sa pultahan ug mapahiyomong magpakitoykitoy sa iyang mga tudlo ingong panamilit sama sa paaging gitudlo kaniya sa usa sa iyang mga apo-sa-tuhod.
“Duol na niadto ang Halloween tapos sa iyang pagsulod sa sentro sa pagpahiuli sa lawas. Nakita ko siya sa lawak sa kalingawan sa akong pag-abot sa pagduaw kaniya sa usa ka adlaw. Ang mga wheelchair gipataas, upat sa matag usa ka taas nga lamesa, ug gikatag sa ilang atubangan ang tanang materyal nga gikinahanglan sa paggamag mga butang sa Halloween. Didto si Mama naglingkod nga ang nawong sama sa kuwatro-anyos nga walay mga pulong nagsulti: ‘Dili ko buot mobuhat niana, ug dili ako mobuhat niana!’
“Ako miduol sa iyang likod ug miingon: ‘Komosta ka, Ma,’ ug samtang ako mitikubo ug mihalok kaniya sa aping, ako mikatawa (sa pagtago sa akong mga luha) ug mihunghong sa iyang dalunggan: ‘Gidala mo dinhi sa paggamag mga butang sa Halloween.’ Sa pagliso sa iyang ulo sa pagtan-aw nako, diha niya ang labing siaw nga kidlap sa iyang mga mata, nga mapahiyomon. Unya mikulismaot ang iyang tibuok nawong sa pagpadayag sa dakong disgusto! Ug kana ang nahitabo inig-abot sa matag adlawng pangilin. Dili siya motuo sa maong mga pangilin, tungod sa ilang paganong sinugdanan, ug siya didto, sa iyang limitadong kondisyon, nga nangupot sa iyang mga pagtuo.
“Walo ka bulan nga miagi, giatake siya sa laing medyor stroke, nga siya na-coma ug nagsugod nga dili na moobra ang usa ka rinyon. Hinuon, maayo ang tanang ubang hinungdanong obra sa lawas. Tapos sa lima ka adlaw, wala makatuo ang iyang doktor nga siya miarang-arang. Sa sinugdan, dili siya makaila kang bisan kinsa kanamo. Apan karon, usahay, siya mosanong kon siya among halokan. Mobati kami nga idaitol niya ang iyang ngabil sa among mga aping.
“Sa miaging walo ka bulan ang akong inahan nahisamag batang bag-ong nahimugso, nga buhi ug nagaginhawang tawo apan dili mabuhi sa iyang kaugalingon. Ang usa ka masuso usahay dili mokaon, apan tunga sa oras sa ulahi, pinaagi sa iyang paghilak, magpasidaan nga kini gigutom o nagkinahanglag pagtagad. Si Mama walay paagi sa pagpahibalo kanamo kon unsay iyang gusto o gikinahanglan. Ang mga nars ug mga membro sa pamilya kinahanglang masayod nganong usahay iyang huptang dugay ang pagkaon sa iyang baba apan dili itulon. Sa tabang sa doktor, among nasayran nga kini mahimong tungod sa pagpaabot niya nga makatug-ab, tungod kay gumikan sa iyang giantos nga parsiyal nga paralisis, ang iyang kaunoran dili usahay moobra. Kon magdali siya ug motulon una siya mobati nga angay na, siya matuk-an.
“Sa pag-atimag maayo sa usa ka masuso (ang usang sama kang Suzy o sa akong inahan) ang usa kinahanglang mag-edukar sa kaugalingon. Pagkabulahan ni Suzy nga siya may matinagdanon ug mahigugmaon kaayong pamilya! Gibati namong bulahan nga gimatuto sa mga ginikanan nga naangayan namo. Sa nagtubo pa kami, si Mama magbasa kanamog mga artikulo gikan sa mga basahon sa Watch Tower bahin sa mga sugyot sa panglawas ug sa daghan pang laing topiko nga makaikag sa pamilya. Gidasig niya kami sa paggamit sa maong impormasyon sa pagsulat sa mga komposisyon ug paghatag sa mga pakigpulong sa eskuylahan.
“Busa karon kaming mga anak mao na ang ginikanan, ug si Mama mao ang bata. Nganong mihilak ako sa pagbasa nako bahin kang Suzy? Nganong ako naghinumdom bahin sa akong tigulang nga inahan nga langkit sa batang si Suzy? Tingali tungod kay gibati ko ang pagkaamgid sa iyang inahan. Gawas pa, gibati ko ang kalit nga bul-og sa gugma ug apresasyon alang sa atong langitnong Amahan, si Jehova nga Diyos, kinsa tungod sa iyang gugma alang kanatong tanan mihimog tagana nga si inday Suzy ug ang among inahan may adlaw nga mahimo, sa bag-ong kalibotan sa Diyos sa usa ka paraisong yuta, nga hingpit sumala sa iyang gituyo nga maingon ang katawhan.—Mateo 6:9, 10; Pinadayag 21:4, 5.
“Hinaot nga sa usa ka adlaw, sa umaabot nga Paraiso, ang among duha ka pamilya magkahibalag ug magkauban sa ubang sama kanamo. Tingali kami unya makahilak sa kalipay, uban ang dakong kangaya ug katawa, nga magahatag sa pasalamat ug pagdayeg sa atong Maglalalang, si Jehova, ug sa iyang Anak, si Jesu-Kristo, ang atong Manunubos.”—Tinampo.