Mga Batan-on Nangutana . . .

Nganong Angay Kong Likayan ang Okulto?

“SUOD kaayo ako sa akong lolo,” matud sa batan-ong babaye, “ug dihang namatay siya, naapektahan kaayo ako. Gusto kong hisayran kon ikasulti ko ba siya pag-usab.” Busa ang batan-ong babaye misugod sa pagduladula sa okulto.

Giangkon sa usa ka bag-ong taho nga “labing menos 200,000 ka mga bata ug mga batan-on sa Federal Republic of Germany nasinati sa nagkadaiyang matang sa okulto.” Ang Hapon may pundok sa bag-ong mga espiritista diha sa eskuylahan, nga ang pipila nag-espesyalista sa telepathy, ang uban sa hipnosis, ug ang uban pa sa paghingilin sa demonyo o exorcism. Sa Nigeria dili talagsaon karong mga adlawa ang pagkadungog bahin sa mga batang naa sa primarya nga nagabuhat sa pagbarang. Ug, ikasubong isulti, bisan ang pila ka batan-ong gipadako sa Kristohanong mga ginikanan, nakaduladula, nga tingalig ditinuyo sa mga dili ingon nato o supernatural.

Ngano mang ang okulto nakadani sa mga batan-on? Ug nganong ang pagkalangkit niini peligroso kaayo?

Kon Nganong Malangkit Sila

Ang okultismo nagalangkit sa mga dili ingon nato o supernatural, usa ka pagsusi sa kalibotan sa espiritu pinaagi sa astrolohiya, panagna, pamarang, salamangka, ug sa susama. Ug nganong daghan kaayong batan-on ang ikag nga mosusi nianang mga butanga? Nabatonan ni Dirk ang lalom nga tinguha nga ikasulti ang namatay niyang amahan. Kay kombinsidong mahimo niya kini kon ugmaron niya ang iyang mga gahom sa hunahuna, gisugdan niya ang usa ka rutina sa pamalandong nga niana gisulayan niya ang pagpalihok sa mga butang nga dili kana hikapon. Ang maong pamalandong, matud ni Dirk, nagdala kaniya ngadto sa ganghaan sa kalibotan sa espiritu!

Ang ubang batan-on nahadlok sa umaabot. Gusto nilang hisayran ang ilang mga grado o kalaoman sa pagminyo ug nagtuo silang ang kalibotan sa espiritu makatabang nila. Ilabinang makatugaw mao ang pagsimba kang Satanas mismo! Ang pandani sa maong mangilngig nga relihiyon? “Ako misulod niana para sa gahom,” mipatin-aw ang usa ka Canadianong batan-on nga nagahimo sa Satanismo. “Nagahatag kini kanakog gahom sa pagsakit sa mga tawo.”

Hinuon, nagtuo ang kadaghanang tigsusi nga ang dakong hinungdang ang mga batan-on malangkit sa okultismo mao ang yanong kamausisaon. “Ako natingala kaayo,” mikompisal ang usa ka batan-ong babaye nga nalangkit sa okulto. Ang laing batan-ong babaye nagpahayag niining paagiha: “Sa sinugdan ako maduhaduhaon, apan ako naghunahuna, ‘Labing menos akong mahibaloan kon sama kini sa unsa.’” Busa gidawat niya ang imbitasyon sa usa ka higala nga moduyog sa usa ka sesyong okulto.

Kay gitukmod sa kamausisaon, ang pila ka batan-on misulay sa pagpalihok sa Ouija board o nag-ayom-ayom pinaagi sa pagtuon sa mga lihok sa basong nakulob. Gikan dinha mubo na lang ang paglukso ngadto sa mas lalom nga pagkalangkit sa espiritismo pinaagi sa paggamit ug mga bolang kristal, mga tarot nga baraha, mga pendant, mga dahon sa tsa, ug mga libro sa horoscope. Ang pipila misugod gani sa pagkonsultag propesyonal nga mga mananagna sa kapalaran o mga tambalan. Apan, daghang propesyonal labaw rag diyutay sa mga mangingilad. Pananglitan, sa pagpauswag sa iyang mga grado, nakigkita si Alexander sa usa ka tambalan. Dili lamang nga siya wala makapauswag sa iyang mga grado apan siya naalkansi sa pinansiyal nga paagi. Ang iyang salapi nabahin tali sa mini nga tambalan ug sa higala kono nga nagrekomendar kaniya.

Alang sa daghang batan-on, hinunoa, ang pagpamasin ngadto sa espiritismo mosangpot sa butang labi pang makadaot kay sa pinansiyal nga kapildihan.

‘Dili-Katuohang Pagsakit’

“Kon nahibalo pa lang ko” mao ang pamulong nga kasagarang hibatian taliwala niadtong nagbasol nga nakigduladula sa supernatural o mga dili ingon nato. Kana ang giingon sa Personality, usa ka magasin sa South Africa. Mahulagwayon mao ang pagmahay: “Kon unta ako dili pa inosentehon kaayo. . . . Naagoman ko ang di-maantos nga pagsakit, mga tingog, mga urum, mga hulga, ug ako gisakit sa hunahuna ug sa lawas sa ubang satanista sa misulay ako sa paggawas.”

Ang bug-os 24 porsiento sa mga magtutudlo nga gisurbi sa Alemanya nakamatikod sa nakatugawng impluwensiya sa okultismo diha sa mga estudyante. Ang pila ka estudyante nahimong tigpalain, may mga suliran sa pagkat-on, nagmahadlokon, nakaagom ug depresyon, ug nakaugmad sa tendensiya sa pagdaot sa ilang kaugalingon o sa uban. Si Dirk kasagarang dili makatulog sa gabii. Siya nahinumdom: “Kay giabot ug kahadlok nga hiyawaan, wala gayod nako ipiyong ang akong mga mata. Ako mikupoy sa tanang tingog.” Ang usa ka batan-ong ginganlag Michael susamang nakaagom sa “mga gabiing walay tulog tungod sa pagsamok sa demonyo” tapos sa pag-inom sa ilimnong gipainom kaniya. Ang ubang taho nagbatbat sa kahadlokang kausaban sa personalidad sa mga tawong miapil sa okultong mga buhat. Ang usa ka batan-ong babaye nakapakugang sa iyang inahan tungod sa pagpahibalo kaniya nga sa umaabot magsinina siyag itom (ang kolor nga buot usab niyang ipintal sa iyang kuwarto) ug matulog sa abling lungon!

Ang Matuod nga mga Molupyo sa Kalibotan sa Espiritu

Ang kasulatan nagatin-aw nga “ang mga patay . . . walay nahibaloan nga bisan unsa pa man.” (Ecclesiastes 9:5) Busa ang kalibotan sa espiritu wala puy-i sa mga kalag sa namatayng mga minahal. Nan, unsa ang hinungdan sa maong makapahadlok nga mga kasinatian? Daotang mga demonyo! Sumala sa Bibliya, kini sila maoy rebeldeng mga manulonda, ang mga sumusunod ni Satanas nga Yawa. (1 Pedro 3:19, 20; Pinadayag 12:9) Sila may kasaysayan sa paghimog pandaot ug kagubot taliwala sa mga tawo.

Pananglitan, ang Lucas 9:42 nagasugilon bahin sa usa ka tawong giyawaan si kinsa “gilambalamba sa demonyo . . . sa yuta ug naglubaglubag sa labihan.” Pagkapintas! Ang Buhat 19:16 susamang nagbatbat sa unsang paagi ang usa ka tawong giyawaan miatake sa pito ka tighingilin-unta sa mga yawa. Ang modernong-adlawng mga kasinatian tin-awng nagapamatuod nga ang mga demonyo wala gayod mag-usab sa ilang daotang mga paagi bisan gamay.

Ang usa ka batan-ong nagsugod sa pagduladula sa ESP, astrolohiya, mga barahang tarot, o bisan unsang matang sa okulto sa ingon magbukas sa ganghaan ngadto sa makalilisang nga mga kasinatian. Ang magasing Personality miingon: “Ang mao rang lanot nga nahitagik sa mga kasinatian sa tanang among gikasulti [nga nalangkit sa okulto] mao nga sila gisuyop sa lalom ug lalom pa sa satanasnong lilo pinaagi sa mga agianan nga sinapotan sa nipis nga sapot sa pagkatalahoron.” Oo, ang okulto mao lamay usa ka tikanganan sa pagkontak kang Satanas ug sa mga demonyo!

‘Dugos Diha sa Hait nga Kutsilyo’

Busa ang Kasugoan sa Diyos ngadto sa mga Israelinhon nagdili sa bisan unsang matang sa espiritismo, nga nag-ingon: “Dili pagahikaplagan diha kaninyo . . . si bisan kinsa nga nagapanagna, usa ka salamangkero o si bisan kinsang nagapangitag mga tilimad-on o usa ka barangan, o usa ka maglalamat o nagakonsulta sa espiritista o propesyonal nga mananagna sa mga hitabo o usang nagapakisusi sa mga patay.”​—Deuteronomio 18:10, 11.

Ang mga Kristohanon sa unang siglo naghinlo sa ilang kaugalingon sa bisan unsang kalabotan sa espiritismo, nga naglaglag sa tanang demonyohanong kasangkapan. (Buhat 19:19) Ang mga batan-on karong adlawa nga matinguhaon sa pakighigala kang Jehova susamang maglikay sa tanang butang nalangkit sa okulto. Kana mag-apil sa tanang pelikula, mga libro, mga komiks, ug mga poster nga may espiritistikanhong mga diwa. Bisan ang pinalabing honi sa usa angay pagausisaon. Pananglitan, ang bug-at metal music balikbalik nga gikonektar sa Satanismo.

Ang mga Tibetan may panultihon: ‘Maghunahunag kaduha sa dili pa modawat ug dugos nga gitanyag diha sa hait nga kutsilyo.’ Sa pagsulay sa pagtilap sa dugos gikan sa kutsilyo, basin maputlan kag dila! Sa susama, bisan pag unsa ka makadani ang supernatural sa imong kamausisaon, kana makapatay. Busa balibari ang imbitasyon nga moapil o bisan maniid sa usa ka sesyong okulto. Ang butang nga daw dili makadaot sama sa dula nga nagapalihok sa baso basin motultol sa pagkalangkit sa demonismo. Tinuod, tingali ikaw matingala. Apan mokaon ka bag pan-os nga karne aron lamang masuta kon sama sa unsa ang mahilo sa pagkaon?

Si Dirk (gihisgotang sayosayo) nakapahigawas sa iyang kaugalingon gikan sa okulto. Pinaagi sa pagtuon sa Bibliya sa tabang sa mga basahon sa Watch Tower Society, nasabtan niya ang kamatuoran bahin sa namatay niyang amahan, ug iyang nasayran ang bahin sa paglaom sa pagkabanhaw. (Salmo 146:4; Juan 5:28, 29) Ang maong kamatuoran nagpahigawas kaniya gikan sa tinguhang makigkomunikar sa kalibotan sa espiritu. (Itandi ang Juan 8:32.) Diin na karon si Dirk? Siya nahimong usa sa mga Saksi ni Jehova ug nagatrabaho sa usa sa mga imprentahan sa Watch Tower Society ingong usa ka bug-os-panahong ministro.

Oo, ang Bibliya nagatagbaw sa atong ‘espirituwal nga mga panginahanglan.’ (Mateo 5:3) Ug sa kadugayan, kini labi pang mapuslanon kay sa pagtagbaw sa makahadlok nga kamausisaon sa usa pinaagi sa peligroso, makapatay nga okulto.

[Hulagway sa panid 15]

Ang pagkalangkit sa okulto basin mosugod sa maorag dili-makadaot nga dula, sama niining Ouija board, o sa paggamit sa nagkulob nga baso