Gikan sa Among mga Magbabasa

Pagpaniwang Salamat kaninyo tungod sa artikulo bahin sa pagpaniwang. (Mayo 22, 1989) Sa miaging Abril, ako 80 kilos, 58-anyos, diabetesong babaye nga may alta presyon. Ako masulob-on usab kaayo. Karong adlawa ako 72 kilos, nagkinahanglag menos nga insulin, ug ekselente ang presyon sa akong dugo. Nawala usab ang depresyon. Nalampos ko kini pinaagi sa pagbantay sa akong makaon nga asukar ug tambok ug pinaagi sa paglakaw ug 5 kilometros kada buntag nga may 2 kilos nga pabug-at sa matag pulso. Tingali kataw-anan akong tan-awon nga nagalakaw, apan nakadaog ako sa pila ka bugno, ug nagtuo ako nga makadaog ako sa gubat. Sa makausa pa, salamat kaninyo.

E. P., Canada

Trahedya sa Lockerbie Nabalaka ako sa inyong mga komento bahin sa Obispo sa Galloway diha sa artikulo bahin sa katalagman sa Lockerbie. (Hulyo 22, 1989) Sa pag-ingon nga siya may ‘mapait nga mga pulong alang sa Diyos’ pinaagi sa pagsukna, ‘Nganong gitugotan sa Diyos nga kini mahitabo?’ kamo nagadaot kaniya.

A. W., Britanya

Kami tukmang nagtaho sa mga pulong sa obispo ingong gikutlo diha sa “The New York Times” sa Disyembre 26, 1988. Hinuon, sukad niadto nadawat namo ang opisyal nga kopya sa sermon sa obispo, ug mipatim-aw nga ang iyang mga pulong aktuwal nga gituyo sa pagpalanog sa mga hunahuna sa uban, dili sa iyang kaugalingon. Bisan pa niana, ang mga pulong sa obispo gikutlo sa pagpakita nga wala siya maghatag ug tubag nga gipasukad sa Bibliya sa maong pangutana, ni gipunting niya ang paglaom sa Bibliya alang sa mga patay. (Juan 5:28, 29)​—ED.

Pagpamalikas Ang artikulong “Mga Batan-on Nangutana . . . Sa Unsang Paagi Makasukol Ka sa Hilig sa Pagbalikas?” miabot sa hustong panahon! (Septiyembre 8, 1989) Tungod sa kapikas nga supak sa Kristiyanidad, usahay kini lamang ang akong mahimo sa pagpugong sa akong dila. Ang mga hunahuna sa pagbalikas mipabati kanako sa kaulaw ug pagkadili-takos sa gugma sa Diyos. Kining talagsaong artikulo mihatag kanako sa giya nga akong gikinahanglan sa pagsukol sa tentasyon sa pagbalikas.

C. D., Tinipong Bansa

Paglikay sa Panglugos Ang babayeng gikutlo diha sa inyong artikulo (Agosto 22, 1989) miingon nga siya “nakalikay sa paglugos tungod sa tabang ni Jehova.” Nagkahulogan ba kini nga kadtong gilugos wala makabaton sa tabang sa Diyos? Nganong iya mang tabangan ang usa ka tawo ug dili ang lain?

V. R., Tinipong Bansa

Ang Bibliya wala mag-ingon nga ang Diyos milagrosong nagasalipod sa iyang katawhan gikan sa kadaot. Ang mga kasugoan sa Diyos ngadto sa Israel nagpaila nga ang panglugos mahimong mahitabo sa matinumanong mga alagad sa Diyos. (Deuteronomio 22:23-27) Bisan pa niana, ang Diyos nagtagana kanatog Kasulatanhong direksiyon nga mahimong moobra sa atong kaayohan kon atong ipadapat kini. Ug ang gibase-sa-Bibliya nga tambag bahin sa pagsukol sa panglugos napamatud-ang usa ka panalipod sa babayeng gihisgotan. Nga angay, nagpasalamat siya sa Diyos tungod sa pagtagana sa maong mapuslanong impormasyon.​—ED.

Pagtabako Ang hapin sa isyung bahin sa “Baligya nga Kamatayon” (Hulyo 8, 1989) nakakuha gayod sa pagtagad sa katawhan. Ako nagabisitang regular sa usa ka babayeng tigulang nga hinabako kaayo. Sa daghang katuigan siya may suskrisyon sa Pagmata! apan talagsa rang mobasa sa mga artikulo. Sa dili pa dugay, miduaw ako kaniya ug nakamatikod nga ako sa kataposan makaginhawa na diha sa iyang balay. Oo, siya naningkamot sa paghunong sa pagtabako. Sa iyang nakita ang maong isyu, iyang gibasa kana gikan sa hapin ngadto sa hapin ug karon buot motuon sa Bibliya ug motambong sa Kingdom Hall. Salamat sa pandani sa mata sa atong mga magasin!

C. P., Tinipong Bansa