Gikan sa Among mga Magbabasa
Ang Resulta sa Gubat Ako nakurat sa dihang gibuksan ko ang Oktubre 8, 1989, nga isyu. Diha sa sulod sa hapin mao ang letrato sa akong bana sa dihang siya diha pa sa U.S. marines sa 1944. Bisan tuod ang hulagway sa orihinal gipatik sa mga 45 na ka tuig kanhi, dili gayod namo matino kon diin kini kuhaa. Ang inyong kapsiyon nagtin-aw niini kanamo. Ang akong bana nakabasa sa mga artikulo ug miingon nga tukma kini kaayo. Sumala sa akong nahibaloan, kini ang unang higayon nga siya nakabasag Awake!
H. S., Tinipong Bansa
Miagas nga Aseite Ingong usa ka distribiyutor sa pagkaon nga gikan sa dagat, nakaapresyar ako sa artikulo sa Septiyembre 22, 1989, nga isyu bahin sa miagas nga aseite sa Alaska. Kadto sa pagkatinuod nakaapekto sa kinabuhi sa mga tawo nga namuyo didto, ug sa palibot. Kita nagkinahanglan gayod ug pagtultol gikan sa atong Maglalalang sa pagtul-id sa atong mga tikang. Apan kon bahin sa pagkaon sa Alaska nga gikan sa dagat, kami wala mahadlok sa pagpalit nianang mga produktoha, tungod kay ang programa sa bug-os nga pagsusi ginahimo man.
A. C., Tinipong Bansa
Usa ka Umaabot nga Katuohan Ako gayod nalamdagan sa mubong sinulat nga gisulat sa usa ka 16-anyos nga batan-ong babaye bahin sa umaabot. (Oktubre 22, 1989) Nakagusto kaayo ako sa balak nga iyang gikutlo: “Duha ka tawo nagtan-aw sa gawas sa selda sa prisohan, ang usa nakakita ug lungag sa lapok, ang usa nakakitag mga bitoon.” Kadto maoy epektibo kaayong ulohan nga kasugdan sa panaghisgot sa Bibliya.
D. B., Canada
Ingong usa ka tin-edyer, ako nakadayeg kaayo nga gisalmot niining batan-ong babaye ang iyang mubong sinulat diha sa usa ka bangga. Kadto maoy usa ka pasidungog sa iyang pagtuo ug sa gugma sa iyang Maglalalang. Ang iyang mubong sinulat naghulagway ug usa ka matahom nga talan-awon sa umaabot alang kanila nga nagalantaw kang Jehova nga Diyos.
S. G., Tinipong Bansa
Espesyal nga mga Panginahanglan Ang inyong artikulo (Agosto 22, 1989) naghisgot sa pag-lip read o pagsabot sa mga pulong pinaagi sa lihok sa mga ngabil. Hinunoa, dili tanan sa mga tawong bungol ang makahimo sa pagsabot sa mga pulong pinaagi sa lihok sa mga ngabil. Ang kasarangang tawong bungol makasabot lamang ug 30 porsiento, ug ang uban panaghap. (Sulay sa pagtan-aw ug TV nga walay tingog, ug imong makita nga kini dili sayon.) Pugson kami sa mga tawo sa pagsabot sa mga pulong pinaagi sa lihok sa mga ngabil inay kay isulat ang mga butang diha sa papel alang kanamo. O sila makigsulti duol sa among mga dalunggan o kusog nga makigsulti kanamo o kaha mosinggit pa. Kini dili mosaler. Masakit kaayo alang kanamo kon tagdon kami sa mga tawong makadungog ingon nga daw kami may deperensiya sa utok.
F. B., Tinipong Bansa
Kini nga mga pahinumdom giapresyar. Ang pagsabot sa mga pulong pinaagi sa lihok sa mga ngabil gihisgotan lamang ingong kapilian alang sa mga indibiduwal nga nahimong bungol sa ulahing bahin sa ilang kinabuhi ug nalisdan kaayo sa pagkakat-on sa sinyas sa mga kamot. Wala kami magpasabot nga ang tanang mga tawong bungol makahibalo sa pagsabot sa mga pulong pinaagi sa lihok sa mga ngabil.—ED.
Nahisalaag nga mga Batan-on Buot kong pasalamatan kamo sa inyong artikulong “Mga Batan-on Nangutana . . . Nganong Nabuhat Nila Kini Nako?” (Nobyembre 8, 1989) Ang akong igsoong babaye napalagpot gikan sa Kristohanong kongregasyon sa miaging duha ka tuig, ug daghan sa mga punto nga gipatungha nianang artikuloha naghubit sa akong kaugalingong gibati. Sa maong panahon ingon nga daw ang among pamilya dili makalahutay niining makasubong kasinatian, apan kami nakalahutay ra. Ug napasundayag usab namo ang among pagkamaunongon kang Jehova ug sa iyang organisasyon.
K. L., Tinipong Bansa
Pagpadayong Managhigala Ang artikulong “Mga Batan-on Nangutana . . . Nganong Malisod Kaayong Magpadayong Managhigala?” (Septiyembre 22, 1989) nakapaamgo kanako sa sukod sa akong pagtuok sa akong pagpakighigala. Ako mangabubho kon may makig-estorya sa akong mga higala! Ako karon naghimo nag mga kausaban. Nanghinaot ako nga kining importante nga artikulo dili mawala niining magasina.
G. Z., Brazil