Gikan sa Among mga Magbabasa

Katungod sa mga Ginikanan Ingong usa ka doktor, buot kong ipahayag ang akong mga pagbati bahin sa artikulong “Ang mga Doktor Misulay sa Pagkuha sa Among Anak nga Babaye.” (Oktubre 22, 1989) Kining artikuloha magsilbi lamang hinoon sa pagpasamot sa mutuwal nga dili-pagsinabtanay ug mopahinabog komprontasyon.

Sa ubang mga kaso ang dugo mao lamang ang lohikal ug tukmang tambal, ug ang doktor [sa Pransiya] sa moral ug sa legal obligado sa paghatag niini. Busa ang mga Saksi angay nga dili masuko kon ang doktor (1) mokuha ug mando sa korte alang sa pagtambal sa dugo o (2) mopili sa dili pagtambal sa pasyente. Ang mga doktor nagahangyo nga dawaton sa mga Saksi ni Jehova ang mga sangpotanan sa ilang pagpili; nga dili nila himoong mga martir ang ilang kaugalingon apan ipatin-aw ang ilang baroganan. Pananglitan: “Ako modumili sa dugo tungod kay maoy akong tinguha ang pagsunod sa balaod sa Diyos (dili tungod kay nahadlok ako sa AIDS o hepatitis).” Ang mga doktor nagahangyo nga sila molihok sa tukma ug responsabling paagi ug dili mosulay nga magpakamatarong.

J. L. P., M.D., Pransiya

Ang mga Saksi ni Jehova nagapabili sa kakugi ug sa dedikasyon sa mga doktor. Kami naningkamot sa pakigkooperar kanila ug nagahangyo lamang nga ilang tahuron ang among pinasukad-sa-Bibliya nga determinasyon nga ‘magpalayo gikan sa dugo.’ (Buhat 15:29) Ang mga Saksi ni Jehova andam sa pag-atubang sa mga sangpotanan niining relihiyosong baroganan. Bisan pa niana, napamatud-an na nga ang mga pagdugang sa dugo adunay daghang makapatay nga mga reyisgo, ug dunay kapiliang medikal nga mga paagi sa pagtambal nga dili magladlad sa usa niadtong mga riyesgoha. Kon ang usa ka doktor dili-gustong mokooperar niining bahina, siya obligado sa pagpatin-aw niini ngadto sa iyang mga pasyente. Kon bahin sa suliran nga gihisgotan, ang doktor miuyon sa pagtahod sa kagustohan sa iyang pasyente apan giatrasan ang iyang saad. Busa gibati sa mga ginikanan nga kinahanglan nga molihok dayon sila. Bisan pa niana, ang artikulo wala mag-awhag sa mga ginikanan nga pugngan ang medikal nga pag-atiman. Hinunoa, kana nagsilbing pagdasig sa mga ginikanan nga “mas magmaespisipiko sa pagpangutana sa ilang doktor kon unsay iyang buhaton ubos sa espisipiko nga mga sirkumstansiya.” Pinaagi sa pagpakita nga sagad aduna gayoy mabatonang epektibo dili-dugo nga pagtambal, ang artikulo nagsilbi usab sa pagpasiugda nga ang Biblikanhong pagdili sa pagdugang ug dugo makataronganon, bisan sa medikal nga baroganan.​—ED.

Mga Karera sa Pagkamodel Giapresyar ko ang artikulong “Mga Batan-on Nangutana . . . Unsay Ikasulti Bahin sa mga Karera sa Pagkamodel ug Bangga sa Kaanyag?” (Enero 8, 1990) Kana nakapakita kanako sa mga lit-ag nga nalangkit. Karon naamgohan ko nga matahom man kitag panagway o dili, ang atong espirituwal nga katahom ang bililhon.

S. W., Inglaterra

Mga Kombensiyon sa Polandiya Ang akong kinasingkasing nga pasalamat maoy alang sa pagdala kanako (sa panan-aw sa akong hunahuna) sa mga kombensiyon sa Polandiya. (Disyembre 22, 1989) Samtang nagbasa ako sa artikulo, ang mga luha sa kalipay mitulo sa akong aping. Usahay ang mga kabalaka sa kinabuhi mopahimo kanato nga mawad-an sa panan-aw sa dakong gugma ni Jehova. Pagkatahom ang pagtan-aw sa maong gugma nga gipakita taliwala sa matuod nga mga Kristohanon!

K. D., Tinipong Bansa

Badlongong mga Anak Salamat kaayo kaninyo alang sa artikulong “Mga Batan-on Nangutana . . . Nganong Nabuhat Nila Kini Nako?” (Nobyembre 8, 1989) Ako adunay magulang usab nga lalaki nga mibiya sa organisasyon ni Jehova. Daghang higayon nga masapnan ko ang kaugalingon nga nagahunahuna sa kaguol ug kasakit nga nahatag niini ngadto sa akong mga ginikanan, ug kanako. Ang inyong artikulo makadasig kaayo alang nako. Akong naamgohan karon nga samtang ang ubang kapakyasan maoy tungod sa akong mga ginikanan, ang akong igsoong lalaki wala mosanong sa ilang pagbansay.

L. R., Tinipong Bansa

Mga Kahadlok Nagbilin akog kopya sa katingalahang artikulo mahitungod sa mga kahadlok (Pebrero 8, 1987 sa Ingles) nga sayon nga mabatonan. Ako nagkinabuhi nga ginaatake kanunay sa kalisang sa daghang tuig. Apan ako madasig gayod sa pagpadayon kon basahon nakog balik ang mga parapo nga naghisgot sa pagpailob ug pag-ampo kang Jehova.

M. B., Tinipong Bansa