Landong Diha sa Bulan

TUNGATUNGA kadto sa Agosto sa Brazil​—usa ka malinawong gabii sa tingtugnaw nga daktol ang bulan sa walay-panganod nga langit. Ang mga tawo didto sa gawas sa ilang mga balkon o nagtapok ubay sa karsada, nga nagpatindog sa ilang mga kamera ibabaw sa mga tripod o nagpokus sa mga largabista. Ang kahanginan mihugong sa mga kabildohay, nga ang tanan may samang hilom nga pagdahom.

Nganong may dakong kaukyab? Kadto Agosto 16, 1989. Sa 10:21 s.g. nagsugod ang kompletong eklipse sa bulan. Dinhi, sa banika diin hinlo ang hangin, ang talan-awon gidahom nga matahom kaayo. Sumala sa eskedyul, ang bulan miaginod pagsuhot sa landong nga gisabwag sa yuta sa wanang. Sama gayod sa yuta, ang landong bawog. Niadtong ikaupat nga siglo W.K.P., kanang yanong obserbasyon nakatabang sa Gregong pilosopo si Aristotle sa pagtino nga ang yuta lingin gayod.

Samtang ang bulan misuhot nga lalom sa landong, ang mga tumatan-aw misugod sa pagpatugbaw sa “ooh” ug “ah” nga mapabilhon. Nagkakahil ang kolor sa bulan. Sama sa ginabuhat niini sa usa ka matahom nga pagsalop sa adlaw, ang atmospera sa yuta nagabawog sa mga silaw sa adlaw, nga nagapagawas sa asul nga mga silaw sa kahayag ug nagapalusot sa pula ug kahilon nga mga silaw nga walay babag. Tapos sa 97 minutos, ang bulan kompletong gisalipdan sa landong. Sa ulahi, misugod na usab kini sa paggimaw, nga inanay mibalik sa kahayag sa adlaw.

Pipila sa mga tumatan-aw sa bulan niadtong gabhiona nagpulaw hangtod sa alas 2:00 s.b. aron makita ang tibuok pasundayag. Gibati nila nga kadto takos. Nakita nila ang talagsaong pasundayag sa gahom ug kaalam sa Maglalalang sa uniberso. Ang Bibliya nagaingon nga iyang gibuhat ‘ang duha ka dagkong kahayag, ang labing dako sa paghari sa adlaw ug ang labing gamay sa paghari sa gabii,’ nga “magsilbing mga ilhanan ug alang sa mga panahon ug sa mga adlaw ug sa mga katuigan.”​—Genesis 1:14, 16.