Ang Sobrang Pagkargag Oksihino Dili Makatabang

ANG naghangak nga mga atleta mogawas gikan sa dulaanan ug mosugod sa paghingos ug lunsay nga oksihino. Sagad, ang mga tangke sa oksihino mabatonan diha sa tapad sa botelya sa mga tubig. Kini makapauli ba dayon gikan sa paghangos o mopadugang sa kusog? Dili sumala sa pagdukiduki nga gipatik diha sa Septiyembre/Oktubre 1989 nga gula sa medikal nga magasing Hippocrates. Gipadagan ang mga atleta diha sa tread­mill hangtod nga gikapoy, ug unya mihingos ug lunsay nga oksihino. Unya gipadagan na usab ang mga atleta ug laing makakapoy nga pagdagan sa tread­mill, apan niining higayona sila mihingos gikan sa tangke nga nasudlan ug room air o hangin-sa-lawak. Ilang gihimo kini sa duha ka higayon. Dili gihapon maayo ang ilang kahimtang human nakahingos ug lunsay nga oksihino kay sa ilang paghingos ug hangin-sa-lawak. Ang uban miinsister nga sila makaila kon unsa ang sulod sa matag usa ka tangke, apan sagad, sila nasayop.

Ang mga sampol sa dugo nga gikuha sa wala pa ug human sa matag pagsulay “nagwala sa pagtuo nga ang lunsay nga oksihino mopakusog sa pagkamaulian sa paghangos pinaagi sa pagpadala ug dugang hangin ngadto sa gikapoy mga kaunoran. . . . Ang lebel sa lactate sa dugo​—usa ka kemikal nga temporaryong mopundo diha sa dugo sa dihang ang kugihang mga kaunoran mahutdan ug oksihino​—mao ra gihapon, bisan unsa pang tangkeha ang gigamit. Kon dugang oksihino ang mosulod sa kaunoran, moubos unta ang lactate.”

Kana ra ang makakarga ug oksihino sa dugo ug dali nga makakuha niana gikan sa atmosperikong hangin. Ang lunsay nga oksihino dili makapakarga sa dugo ug sobra pinaagi sa sobrang oksihino o makatabang sa atleta nga maulian ug dali gikan sa mabaskog nga ehersisyo. Ang pagkamaulian gikan sa paghangos mahitabo sa dihang mobomba ug kusog ang kasingkasing, nga maghatod ug dugang dugo ngadto sa mga selula sa kaunoran ug busa nagahatag ug dugang oksihino. Ang dugo dili makapundo ug dugang oksihino. Kini igong mohatod lamang sa karga niining oksihino nga mas kusog, ug kana ang makapakusog sa pagkamaulian gikan sa paghangos.