“Ang Balit-ad nga Kahoy”

MAO kana ang angga alang sa Aprikanong baobab. Kon malukop sa mga dahon ug mga bulak, ang baobab matahom kaayong tan-awon. Apan sa tingtugnaw ang mubo walay dahong mga sanga manggawal gikan sa dako nga punoan ug morag mga gamot tan-awon sa usa ka nabaliskad nga kahoy.

Ang pundok sa mga baobab sa amihanang Botswana gitawag nga Seven Sisters. Sila gidibuho sa dibuhista-eksplorador nga si Thomas Baines sa ika-19ng siglo. Kon itandi sa usa ang dibuho ni Baines sa mga kahoy nga usa ka siglo na karon, gamayng kalainan lamang ang makita.

Kini nagpakita sa kalig-on ug sa hataas ug kinabuhi sa baobab. Gibanabana nga ang labing dakong mga kahoy maoy libolibong mga tuig na ang edad. Ang baobab mabuhi sa mainit, ugang mga rehiyon sa Aprika ug dunay daghang mga kinaiyahan nga makasustentog kinabuhi. Ang mga bayanan sa liso adunay puti nga mga liso nga ang lami morag cream of tartar. Lamian ang mga elepante sa pagkaon sa panit ug sa humok nga kahoy, nga tubigon. Sa pagkamatuod, ang mga napundong mga tubig sa ulan makita usahay diha sa mga lungag sa punoan ug sa mga buho nga moporma sulod sa kahoy.

Laing makaiikag nga bahin sa baobab mao ang dako kaayong lawas. Ang labing dako niining maong mga higante gitaho nga anaa sa habagatang mga bakilid sa Mount Kilimanjaro sa Tanzania; kini adunay sirkumperensiya nga 28 ka metros. Ang usa ka bangagan nga baobab sa Zimbabwe gigamit ingong silonganan sa bus ug makapasulod ug kapin sa 30 ka tawo.

Daw baligho nga ang intelihenteng tawo malabwan ug kinabuhi sa iyang mubo nga kapitoan ka tuig samtang “ang balit-ad nga kahoy” mabuhi ug libolibo ka tuig. Makalilipay, kita adunay pasalig nga ang Maglalalang sa tanang buhing mga butang bug-os nga motuman sa iyang saad nga ang mga adlaw sa iyang katawhan “maingon sa mga adlaw sa kahoy.”​—Isaias 65:22; Salmo 90:10.