Gikan sa Among mga Magbabasa

Patol Ako nagasulat sa pagpahayag sa akong dakong kabalaka bahin sa patol. (Hunyo 22, 1990) Kini nagaingon nga aron masanta nga mapaak ni Sandra ang iyang dila o baba panahon sa atake, ang iyang bana nagbutang ug libro sa iyang baba! Kini supak sa tanang medikal nga praktis niining nasora. Isip patolon mismo, dili ko gayod buot nga may mohimo niini kanako, kay kini mahimong moresulta sa buak nga ngipon.

L. M., Inglaterra

Ang artikulo wala mohimog medikal nga mga rekomendasyon apan nagaasoy ug personal nga kasinatian. Ang kadaghanang awtoridad nagatambag sa publiko nga dili ipasok ang gahing mga butang o mga tudlo sa baba sa tawong gipatol o sa pagsingkamot sa pagpugos sa pag-abli sa baba. Ang pagbuhat niana makahimog labaw nga kadaot kay sa kaayohan, nga magadaot sa biktima ug sa nagatabang. Hinuon, ang ehekutibong direktor sa New York Epilepsy Institute mipasalig sa “Pagmata!” nga ang pagbutang ug humokon nga butang (sama sa pinilong panyo) sa kilid sa abli nang baba sa usa ka biktima makasantag kadaot sa baba.​—ED.

Pagmabdos sa Tin-edyer Kinahanglang dayegon ko kamo sa ekselenteng tambag nga inyong gihatag diha sa inyong artikulo bahin sa pagmabdos sa tin-edyer. (Mayo 8, 1990) Sa edad 16, ako nanganak sa akong anak babaye. Bisan pag ang iyang amahan gustong makigminyo kanako, ang akong pamilya nagtambag nako nga ako bata pa kaayo. Ang akong pamilya nagtabang kanako hangtod nga ako naminyo sa ulahi. Katuigan sa ulahi ako misugod sa pagtuon sa Bibliya uban sa mga Saksi ni Jehova. Karong adlawa ang akong anak babaye nagaalagad ingong bug-os-panahong ministro. Ako nalipay kaayo nga ako wala magpatagak sa bata o mosulod sa ahat nga kaminyoon!

L. B., Tinipong Bansa

Makapahiubos ang pagbasa nga bisan tuod ang nagsagop nga mga ginikanan mas makatagana sa materyal nga paagi sa usa ka anak, ang gugma ug pagbati ginataganang labing maayo sa tinuod nga mga ginikanan. Ingong usa ka nagsagop nga inahan, nabatonan ko ang kahibulongang pribilehiyo sa pagpadako sa among batang lalaki sa mga dalan ni Jehova.

C. R., Pederal Republika sa Alemanya

Gikasubo namo kon ang artikulo nagpahinabog sayop nga pagsabot. Daghang nagsagop nga mga ginikanan nagabuhat sa labing maayong trabaho sa paghatag sa ilang mga anak sa gikinahanglang suportar ug gugma. Bisan pa niana, ang artikulo naghisgot sa posibilidad nga ang usa ka batang ipasagop basin dili mamatuto sumala sa Kristohanong mga sukdanan. Sa maong kahimtang, ang dili-kasadong babaye angay dili mohinapos nga siya walay ikahatag sa iyang anak. Siya makamatuto kaniya sumala sa mga sukdanan sa Bibliya ug makapakita kaniyag tinuod nga gugma​—butang nga labi pang hinungdanon kay sa ekonomikanhong mga bentaha.​—ED.

Mga Garantiya Ang inyong artikulong “Mapuslanon ang Pagkahibalo sa Imong Garantiya” (Hunyo 8, 1990) may maayong mga sugyot. Ang laing butang nga ibutang sa hunahuna mao nga ang pila ka garantiya balido lamang sa nasod diin ang butang gipalit, bisan pag ang tiggama dunay tibuok-kalibotang sistema sa serbisyo. Mipalit akog iladong kamera sa laing nasod, ug sa dihang akong nakaplagan nga kini daot, ang lokal nga mga hawas sa kompaniya midumili sa pag-ayo niana.

J. K., Espanya

Salamat sa pahinumdom. Basaha pag-ayo ang tanang garantiya!​—ED.

Lima ka Kasagarang Kabakakan Salamat kaninyo tungod sa inyong artikulo. (Mayo 22, 1990) Kadto nakapalihok sa akong hunahuna ug mapuslanon kaayo sa pagtabang sa uban sa pag-ila sa kalainan sa maayong pangatarongan ug kawang nga panglimbong.

R. C., Italya

Mga Dinosaur Ang artikulo bahin sa mga dinosaur (Pebrero 8, 1990) praktikal kaayo alang sa among nasod, diin daghang tawo nagtuog ebolusyon. Ang Pagmata! misugod sa pagpatim-aw sa among nasod sa unang panahon niining tuiga. Ginabasa namo ang matag isyu nga madasigon.

F. C., Czechoslovakia