Ang Kahibulongang Gasa sa Kagawasan sa Pagpili

GIPABILHAN mo ba ang kagawasan sa pagpili kon unsaon nimo paghikay ang imong kinabuhi, kon unsay imong buhaton ug isulti? O buot ba nimong may modiktar nimo kon unsa gayod ang matag pulong ug lihok nimo, matag gutlo sa matag adlaw, samtang ikaw buhi?

Walay tawong normal ang buot nga ang iyang kinabuhi kuhaon gikan sa iyang gahom ug bug-os nga gamhan sa lain. Ang pagkinabuhi nianang paagiha mahimong malupigon ug makapahiubos kaayo. Gusto natog kagawasan.

Apan nganong nakabaton kita nianang maong tinguha sa kagawasan? Ang pagsabot nganong gimahal nato ang atong kagawasan sa pagpili maoy usa ka yawi sa pagsabot sa unsang paagi nagsugod ang pagkadaotan ug pag-antos. Motabang usab kini nato sa pagsabot nganong ang Diyos naghulat ug dugay kaayo hangtod karon una molihok sa pagtapos sa pagkadaotan ug pag-antos.

Kon Giunsa Kita Pagbuhat

Sa gilalang sa Diyos ang mga tawo, apil sa daghang kahibulongang mga gasa nga gihatag niya kanila mao ang kagawasan sa pagpili. Ang Bibliya nagasugid kanato nga gilalang sa Diyos ang tawo diha sa iyang ‘dagway ug kasamahan,’ ug usa sa mga hiyas nga nabatonan sa Diyos mao ang iyang kagawasan sa pagpili. (Genesis 1:26; Deuteronomio 7:6) Busa, sa dihang gilalang niya ang mga tawo, gihatagan niya sila nianang samang kahibulongang hiyas​—ang gasa sa kagawasan sa pagpili.

Kana ang hinungdang mopalabi kita sa kagawasan inay magpaulipon sa malupigong mga magmamando. Kini ang hinungdan ang kayugot maugmad batok sa mapintason ug mapukgoong pagmando mao nga ang mga tawo kasagaran nga morebelde aron maangkon ang kagawasan.

Ang tinguha sa kagawasan dili aksidente. Ang Bibliya nagahatag sa nagpahiping hinungdan. Kini nagaingon: “Kon diin ang espiritu ni Jehova, anaa ang kagawasan.” (2 Corinto 3:17) Busa ang pagtinguhag kagawasan maoy bahin sa atong kinaiyahan kay gilalang kita sa Diyos nianang paagiha. Kini butang nga buot niyang mabatonan nato kay siya mismo mao ang Diyos sa kagawasan.​—2 Corinto 3:17.

Ang Diyos mihatag usab kanato sa mga katakos sa hunahuna, sama sa mga gahom sa pag-ila, pangatarongan, ug paghukom, nga nagalihok nga nahiuyon sa kagawasan sa pagpili. Kini makapaarang nato sa paghunahuna, pagtimbang sa mga butang, paghimog mga desisyon, ug pag-ila sa matarong gikan sa daotan. (Hebreohanon 5:14) Kita wala lalanga nga mahisama sa mga robot nga walay kaisipan nga walay pagbuot sa ilang kaugalingon; ni sila gilalang sa paglihok nga sa panguna gumikan sa instinto, sama sa mga hayop.

Uban sa kagawasan sa pagpili, ang atong unang mga ginikanan gihatagan sa tanang butang nga makataronganong tinguhaon ni bisan kinsa: Sila gibutang sa samag-parkeng paraiso; sila may dagayang materyal; sila may hingpit nga mga kaisipan ug mga lawas nga dili matigulang o magsakit ug mamatay; sila makabaton ug mga anak nga may malipayon usab nga kaugmaon; ug ang nagadaghang populasyon makabaton sa makapatagbawng buluhaton sa paghimo sa tibuok nga yuta nga usa ka paraiso.​—Genesis 1:26-30; 2:15.

Mahitungod sa butang gipasugod sa Diyos sa paglihok, ang Bibliya nagaingon: “Nakita sa Diyos ang tanan nga iyang gibuhat ug, tan-awa! kini maayo kaayo.” (Genesis 1:31) Ang Bibliya nagaingon usab mahitungod sa Maglalalang: “Hingpit ang iyang mga buhat.” (Deuteronomio 32:4) Oo, gihatagan niya ang tawhanong pamilya ug hingpit nga pagsugod. Wala nay mas maayo pa niadto.

Kagawasan nga May mga Limitasyon

Ugaling, ang kahibulongang gasa sa kagawasan sa pagpili wala bay mga limitasyon? Aw, buot ba nimong modrayb ug awto sa bagang trapiko kon walay mga balaod sa trapiko, diin libre ka nga modrayb sa bisan haing alagian, sa bisan unsang direksiyon, sa bisan unsang katulinon? Siyempre, ang sangpotanan sa maong waylimitasyong kagawasan sa trapiko makatalagmanon.

Sama usab kini sa tawhanong mga relasyon. Ang waylimiteng kagawasan alang sa pipila magpasabot sa pagkawalay kagawasan alang sa uban. Ang dili-kinutohan nga kagawasan mahimong mosangpot sa anarkiya, nga magadaot sa kagawasan sa tanan. Kinahanglang may mga limitasyon. Busa, ang gasa sa kagawasan sa Diyos wala magkahulogang iyang gituyo nga ang mga tawo magagawi sa bisan unsang paagi nga dili magahunahuna sa kaayohan sa uban.

Ang Pulong sa Diyos nagaingon bahin niining puntoha: “Paggawi kamo sama sa mga tawong may kagawasan, ug ayaw gayod ninyo gamita ang inyong kagawasan ingong pasumangil sa pagkadaotan.” (1 Pedro 2:16, The Jerusalem Bible) Busa buot sa Diyos nga paigoon ang atong kagawasan sa pagpili sa kaayohan sa tanan. Wala siya magtuyo nga ang mga tawo magbatog bug-os nga kagawasan, apan sa relatibong kagawasan, nga mapailalom sa mando sa balaod.

Kansang mga Balaod?

Kansang mga balaod ang gilaraw nga atong sundon? Kansang mga balaod ang mosangpot sa labing maayo alang kanato? Ang laing bahin sa kasulatan sa 1 Pedro 2:16 nga gihisgotan sa ibabaw nagaingon: “Kamo mga ulipon dili ni bisan kinsa gawas sa Diyos.” Kini wala magpasabot sa malupigon nga pagkaulipon apan, hinunoa, nga kita gilalang aron magpasakop sa mga balaod sa Diyos. Mas malipayon kita kon mopabilin kitang nailalom niana.

Ang mga balaod sa Diyos, nga labaw kay sa bisan unsang talaan sa kabalaoran nga mamugna sa mga tawo, nagatagana sa labing maayong giya alang sa tanan. Sumala sa ginaingon sa Isaias 48:17: “Ako, si Jehova, mao ang imong Diyos, ang Usa nga nagatudlo kanimo sa pagpahimulos sa imong kaugalingon, ang Usa nga nagapalakat kanimo sa dalan nga imong pagalaktan.” Bisan pa niana, sa samang panahon, ang mga balaod sa Diyos nagatugot sa dakong kagawasan sulod sa mga utlanan niini. Kini nagatugot sa dakong personal nga kapilian ug pagkadaiya, nga nagahimo sa tawhanong pamilya nga mas makaiikag, sa pagkamatuod, makalingaw.

Ang mga tawo nailalom usab sa pisikal nga mga balaod sa Diyos. Pananglitan, kon dili nato tagdon ang balaod sa grabidad ug molukso gikan sa usa ka habog nga dapit, kita masamad o kaha mamatay. Kon mopabilin kita sa ilalom sa tubig nga walay espesyal nga aparato sa pagginhawa, kita mamatay sa minutos lamang. Ug kon dili nato tagdon ang mga balaod sa kahiladman alang sa lawas ug mohunong sa pagkaon o sa pag-inom ug tubig, kita mamatay usab.

Busa, ang una natong mga ginikanan, ug ang tanan nga naggikan kanila, gilalang nga may panginahanglan sa pagsugot sa moral o sosyal nga mga balaod sa Diyos ingon man sa iyang pisikal nga mga balaod. Ug ang pagsugot sa mga balaod sa Diyos dili mabug-at. Hinunoa, kini mosangpot sa atong kaayohan ug sa iya sa tibuok tawhanong pamilya nga umaabot. Kon ang una natong mga ginikanan nagpabilin pa sulod sa mga limitasyon sa mga balaod sa Diyos, ang tanan magmaayo unta.

Unsay nahitabo nga nakadaot nianang maayong pagsugod? Ngano man, sa kapulihay, nga ang pagkadaotan ug pag-antos mikaylap? Nganong gitugotan kini sa Diyos sa dugay na kaayo?

[Hulagway sa panid 7]

Ang kahibulongang gasa sa kagawasan sa pagpili nagabulag kanato gikan sa walay-kaisipang mga robot ug gikan sa mga hayop nga nagalihok sa panguna pinasukad sa instinto