“Mao Kini ang Paagi sa Paglaba sa Among mga Sinina . . .”
SA DAGHANG kayutaan kanang mga pulonga sinati kaayo ngadto sa mga kaliwatan sa mga anak kinsa madasigong mikanta ug misayaw subay niining inila nga garay. Apan kon ang paghunahuna sa paglaba dili makapalipay kanimo, konsideraha: Pagkahuman sa pagkaligo, dili ba anindot paminawon nga mopamala ka sa usa ka humol-humol, bag-ong nalabhang tuwalya? Kinsang tawhana ang dili mobating limpiyo ug komportable nga nagasul-ob ug hinlong sinina? Gani, bisan mga bata malipay sa pagsul-ob ug mga sininang hinlo ug humot—bisan sa makadiyut lamang!
Busa ang paglaba sa atong mga sinina mas hinungdanon sa atong kinabuhi ug makaayo kanato nga usahay dili nato maamgohan. Hinuon, ang paagi sa atong paglaba mahimong magadepende kon asa kita nagapuyo.
Paglaba nga Walay mga Makina
Sa daghang adunahang mga yuta, ang pulong “washing” o paglaba nalangkit na sa pulong “machine.” Sa kabus nga mga yuta, hinuon, ang paglaba gihimo gihapon pinaagi sa kamot, uban sa makapatingalang maayong mga resulta! Kuhaang, pananglitan, kanang lisod-labhang mga sinina. Sa mga nasod nga adunay mainit, mala nga klima, ang babaye mopahimulos sa adlaw.
Ang pamaagi simple. Usa ka palangganang puno sa tubig ug daghang sabon. Ang mga puti ihulom, ug ang makugihong mga kamot sa nagalaba nagkunaw sa tubig, nagakusokuso sa mga puti nga aduna nay sabon. Kon walay komersiyal nga paputi, ang pipila nagagamit sa naandan na nga paputi, sama sa suka gikan sa lubi. Dayon, pagkahuman sa usa ka daling pagbanlaw, ang basang mga sinina ibitay o iladlad sa mga sagbot o pinsa ba nga gipahimuslan ang adlaw sa walay ikasaway nga kaputian. Karon, balik sa palanggana alang sa dugang nga pagbanlaw ug sa ikaduha nga pagpamala ilalom sa init tropikal nga adlaw. Ang resulta? Puting nagasiga sa mapahiyomong pagkahinlo!
Ang usa ka asawa sa panimalay kinsa nagapuyo duol sa usa ka suba o sapa mahimong mosulay sa lahi nga pamaagi. Una siya magapili ug usa ka maayong lugar, pananglitan diin menos-menos ang tubig. Kon kusog ang sulog sa suba, hinuon, siya mabinantayon sa pagpuli sa usa ka tubod sa tubig diin ang iyang mga ginalabhan dili maanod sa tubig. Aduna bay dako nga bato sa duol lang? Maayo. Ang asawa sa panimalay karon nagagamit sa usa ka palupalu sa pagpuspus sa basang sinina batok sa bato. Ang hugaw sa literal nakuha na gayud gikan sa sinina.
Mga Makina sa Paglaba—Ang Nangagi ug sa Karon
Sa daghang adunahang kayutaan ang makina sa paglaba nakapawala na sa praktis sa paglaba pinaagig kamot. Apan ang makina sa paglaba mobalik pa sa karaang mga panahon kay sa imong maamgohan. Sa panahon sa Edad Medya sa Uropa, ang dulang mao ang popular nga paagi sa paglaba sa mga sinina hangtod nga kini hinayhinay nga napulihan sa bukalan. Sa ulahi, sa ika-19 nga siglo, adunay mitungha nga usa ka makina sa panglaba nga susama sa iyang modernong-kapareha. Sa 1830 usa ka balay-labhanan sa Inglaterra migamit ug usa ka nagalibot nga silindro nga nagalabnoslabnos sa sinina diha sa init-sapnot nga tubig nga may sabon. Kining sukaranan nga pamaagi wala mausob hangtod karong adlawa.
Hinuon, ang makina sa panglaba hinay nga nadala. Ang nagagamit nakamatikod nga ang gunitanan sa kamot sa makina lisod sa sinina ug sa tawong nagamaniobra sa gunitanan. Busa sa kataposan sa ika-19 nga siglo, ang kunotkunot nga tablang labhanan, palanggana, ug kinamot nga tiglubag mao ang gipiling mga himan sa daghang asawa-sa-panimalay.
Ang makina sa panglaba, hinuon, mibalik sa 1910 uban sa pagtungha sa unang pinadalagan sa elektrik nga makina mga dose ka tuig sa ulahi, ang unang nagakutaw nga pinadalagan sa elektrik nga makina. Dose ka tuig sa ulahi, ang unang matang sa nagakutaw nga makina mitungha na. Sukad niadto, daghan nang kausaban ug pagpahiangay ang nahimo sa mga makina sa panglaba. Ang pipila ka mga kompaniya gani nagasugod na sa pamaligya ug kontrolado-sa-komputer nga mga makina nga sa pindot lang “modeterminar unsa ka hugaw ang imong mga sinina ug mopili sa pinakamaayong sabon ug angay gayod nga pamaagi sa panglaba.”—Popular Science, Hulyo 1990.
Mga Pagpasabot sa Paggamit sa Awtomatikong mga Tiglaba
Ang pangunang awtomatikong tiglaba sagad sa daghang Kasadpang mga panimalay. Ang “awtomatik,” hinuon, wala nagkahulogan nga kini pasagad lang ang paggamit. Pananglitan, sa mga klaseng top-loading nga makina sa panglaba, usa ka dili balanse nga labhanan maghimo sa makina nga maglihoklihok sa salog samtang nagakusokuso kini sa sulod, magsamok sa sulod sa kuwartong labhanan. Makadaot nga mga aso ang mogawas kon ikaw mogamit sa chlorine nga pampaputi uban sa ammonia. Busa sunda ang sukaranang mga pamaagi. Ayaw ibutang ang imong kamot diha sa makina hangtod nga mohunong na sa paglihok. Ug ayaw padulai o ipagamit sa imong kabataan ang imong makina sa panglaba.
Apan sa unsang paagi nga ikaw makasiguro sa pagkuha sa maayong mga resulta sa dihang daghan kang labhan? Aniay pipila ka mga suhestiyon:
◻ Kuhaa ang tanang sulod sa mga bulsa, baliha.
◻ Baliha ang kuwelyo, kuhaa ang abog.
◻ Ihigot ang mga lubid ug mga higot aron dili sila molambod.
◻ Isirado ang mga zipper, ug mga awtomatiko aron dili sila mosamok sa ubang labhanan.
◻ Tagda ang mga mantsa sa dili pa labhan.
◻ Ayaw pasobrahi. Kini moresulta sa dili maayong pagkalaba, makadaghan sa kunot, ug makadaot sa imong sinina.
Tinuod, daghan gihapon ang nagpanglaba ginamit sa karaang metodo—pinaagi sa kamot. Apan kon ang imo bang makina sa panglaba hinimo sa metal, usa ka nagatubod nga sapa, o usa ka pinadalagan sa komputer, ang resulta makapahimo sa imong panghago nga mapuslanon—limpiyo, nagapangidlap nga sinina para kanimo ug sa imong pamilya, mao usab ang katagbawan sa usa ka buluhaton nga maayong pagkahuman!
[Mga hulagway sa panid 26]
Nagapanglaba sa suba
Nagapaputi ilalom sa adlaw