Sugarol nga Kalibotan

ANG slot machines kasagarang gitawag usag-bukton nga mga tulisan. Apan lahi sa tinuod nga mga tulisan, dili nila pugson pagkuha ang kuwarta gikan sa lain; ang mga tawo manglinya samag mga karnero aron sila hisapian.

Adunay mga 420,000 sa maong mga makina sa Federal Republic of Germany, nga puliki sa paglimas sa mga $900,000,000 gikan sa mga Aleman kada tuig. Lima ka milyong tawo didto mogugol sa usa ka oras kada semana sa pagbubog kuwarta nganha sa mga makina; 80,000 ka tawo mogugol sa kapig lima ka oras sa usa ka semana diha niana.

Ang Espanya karon nagapasigarbo sa 750,000 ka slot machines. Ang sugal gilegal didto niadtong 1977. Sa pagka 1988, ang mga Katsila nagagugol na sa $25,000,000,000 sa usa ka tuig diha sa tanang matang sa sugal. Gikataho, 200,000 ka Espanyol ang lunod-patay nga sugarol. Ang mga Italyano misugal sa mga $12,000,000,000 niadtong 1989​—o mga $210 ka dolyar alang sa matag tawo, mga bata naapil. Sa usa ka semana sa sinugdan sa 1990, ang mga Italyano migugol ug $70 milyon sa pagpusta diha sa mga bangga sa saker.

Ang mga sugarol sa Tinipong Bansa mogugol sa kapig $200,000,000,000 sa usa ka tuig diha lang sa legal nga mga matang sa sugal! Ang presidente sa usa ka panon sa mga casino didto nanghambog karong bag-o: “Ang sugal mao ang labing kusog nagauswag nga industriya niining nasora, sama kadako sa tinuig nga badyet sa [U.S. militaryo].” Ang paghigugma sa mga Amerikano sa pagsugal gipasangil niya sa samang “pilosopikanhong agda” ug pagkaandam sa pagbatog mga riyesgo nga maoy nagtukmod sa mga tigdiskobre ug mga mag-uuna sa kagahapon sa nasod. Apan ang damgo sa sugarol sa dihadihang bahandi halayo kaayo sa mga katuigan sa singot ug kabudlay nga gibutang sa mga eksplorador ug mga mag-uuna diha sa ilang mga pamasin.

Ang sosyologong si Vicki Abt miingon: “Ang mga loteriya nagpahimulos sa ideya nga ang mga premyo walay labot sa imong mga paghago.” Ang maong panghunahuna makadaot kaayo sa matang sa kinabuhi. Ang utang, kakabos, nadaot nga mga batasan sa pagtrabaho, nabungkag nga mga pamilya​—kini mao ang makapasubong mga balos sa pagsugal. Alang sa milyonmilyon, nga ang nagausbawng bahin kanila maoy mga tin-edyer, ang pagsugal nahimong dili-mapugngan nga agda. Sa pagkamatuod, ang Bibliya husto sa dihang kini nagaingon nga “ang gugma sa salapi mao ang gamot sa tanang matang sa makadaot nga mga butang.”​—1 Timoteo 6:10.