“Sila May Dako Kaayong Moral nga Kalig-on”

HUMAN sa mga 40 anyos nga paglutos sa Czechoslovakia, ang mga Saksi ni Jehova nakahimog sirkitong mga asembliya didto. Ang usa ka asembliya sa Ostrava, niadtong Mayo 1990, gitaho ni Jiří Muladi sa mantalaang Nová Svoboda (Bag-ong Kagawasan). Apil sa ubang mga butang siya misulat:

“Mahitungod sa Katawhan nga Bug-os Tawhanon”

“Sulod sa tulo ka adlaw una pa sa okasyon, mga 90 ka tawo ang nagkausa sa Tatran Hall ug naglimpiyo niana nga labaw pa kay sa nalimpiyohan kini sa 40 anyos. Bisan pag ako mag-unauna, igasulti ko gayod kini, nga ang tigomanan mahimong sama ka limpiyo human sa duha ka adlaw [nga asembliya], nga walay papel o mga upos sa sigarilyo sa salog. Lain pay ato, ang mga Saksi ni Jehova dili manigarilyo.

“Sa unang adlaw sa sirkitong asembliya, may 1,600 nga mitambong. . . . Nagsugod sila pinaagi sa usa ka awit nga giawit sa tanan. Daghang kompositor ang mahingangha sa pagkatahom sa maong mga awit. . . . Ang tanan gibuhat nga walay saba. Walay mga pagpailaila sa mga tawong tag-as ug katungdanan. (Busa wala ko mailhi kon kinsay labing taas ug ranggo ug tiaw na nga walay usang nagtagad niana.) Walay pagyukbo ug pagpahayag sa mga eslogan. Pagpaubos, kalulot, ug pagkamabination sa isigkatawo.”

Impormasyon Mahitungod sa mga Saksi

“Jehova mao ang ngalan sa Diyos. Sa Bibliyang Czech, ang iyang ngalan gihubad (o gipulihan) sa ngalang Hospodin [Ginoo]. Ang mga Saksi ni Jehova mapugsanon sa paggamit sa orihinal nga ngalan sa Diyos, ug pinaagi sa ilang mga pakiglabot determinado silang mopamatuod mahitungod sa iyang paglungtad ug sa iyang mga buhat. . . .

“Ang pagtuo sa mga Saksi ni Jehova nagdili sa paggamit ug mga hinagiban batok sa mga tawo, ug kadtong midumili sa pangunang serbisyo militar ug wala motrabaho sa mga minahan sa karbon gipriso, sulod pa sa upat ka tuig.

“Gikan lang niini dayag nga sila may dako kaayong moral nga kalig-on. Makagamit kita nianang dimahakogong mga tawo bisan sa kinatas-ang politikanhong mga katungdanan​—apan dili gayod nato mabutang sila dinha. Mapugsanon ang mga Saksi ni Jehova nga ang mga tawo nagmando sa ilang kaugalingon sa ila mismong kadaotan. Hinuon giila nila ang mga awtoridad nga kagamhananon apan nagtuo sila nga ang Gingharian sa Diyos mao lamang ang makaarang sa pagsulbad sa tanang suliran sa tawo. Apan bantayi kini​—sila dili mga panatiko. Sila maoy mga tawo nga naghatag sa bug-os nilang pagtagad sa katawhan. Ug karon, ikaw makahunahuna sa bisan unsa nga buot nimo bahin kanila.

“P.S. Ako dili sakop sa mga Saksi ni Jehova, bisan pag ako may simpatiya sa daghan nilang mga ideya.”

[Hulagway sa panid 25]

Asembliya sa Lucerna Hall, Prague, Czechoslovakia