Gikan sa Among mga Magbabasa

Mga UFO Ang among asosasyon nakagugol sa miaging 18 ka tuig nga nag-imbestigar sa giingong mga pagkakitag UFO, ug kadaghanang pagkakita maoy tungod sa sayop nga mga interpretasyon. Samtang gitandi namo ang mga basahon sa UFO gikan sa tibuok nga kalibotan, ang inyong artikulo (Nobyembre 8, 1990) maoy kahinangpan nga kausaban. Kami makapahalipay lang sa mga magsusulat nianang uyon-sa-kamatuoran ug dili madapigong paghulagway. Bisan tuod kami sa linangkob dili makatuo sa mga pagtuo sa inyong relihiyon, buot namong ipahayag ang among apresasyon alang sa maong artikulo.

H. K., Central Research Network for Extraordinary Heavenly Phenomena, Alemanya

Mga Abnormalidad sa Pagkaon Salamat kaayo alang sa inyong mga artikulo bahin sa mga abnormalidad sa pagkaon. (Disyembre 22, 1990) Nakaagom akog anorexia duha ka tuig kanhi, ug bisan karon ako usahay makabalik sa kanhing mga paagi ug mga tinamdan. Ang pagpaduol kang Jehova nakatabang gayod kanako. Maayo ang pagkakita sa unsang paagi gidumala sa Pagmata! ang tabang ug kahupayan alang sa mga nag-antos niini sa mahigugmaon ug masinabtanon kaayo nga paagi.

L. H., Inglaterra

Ako kasagarang makadayeg sa paagi sa paghisgot sa inyong magasin sa kontrobersiyal nga mga topiko nga kasagarang dili tagdon namong mga Katoliko. Apan ang artikulo bahin sa mga abnormalidad sa pagkaon nakapahiubos kanako. Ako may anorexia sulod na sa 11 ka tuig. Gitawag ninyo kini nga kahuyangan ug gisugyot ninyo nga kami modangop sa Diyos alang sa kapasayloan. Apan ang anorexia dili kahuyangan lamang; kini usa ka grabeng sakit. Kini dili lamang kabalaka nga makapahimuot sa uban; kini paningkamot sa pagsagubang sa kahadlok nga walay nahigugma.

J. W., Alemanya

Wala namo pakagamaya ang kaseryoso sa mga abnormalidad sa pagkaon apan gipakita nga kana sangpotanan sa ‘dakong emosyonal nga suliran.’ Pananglitan, ang ‘kahadlok nga walay nahigugma’ kasagaran nagbanaag sa pangunang pagbati sa kakulangan sa nag-antos niana. Sa ingon gipasiugda sa among artikulo ang pag-ugmad sa pagtahod sa kaugalingon pinasukad sa mga sukdanan sa Bibliya ug pag-ugmad sa pakighigala sa Diyos. Kon mahitabo ang mga kapakyasan sa pagbuntog sa maong sakit, ang nag-antos makabatog kahupayan sa pagkahibalo nga ang Diyos mapasayloon ug nakasabot pag-ayo sa hinungdan sa atong mga kahuyangan.​—ED.

Nagbulag nga mga Ginikanan Ang artikulong “Unsaon Ko Pagtagad ang Akong Ginikanan nga Mipahawa sa Balay?” (Nobyembre 8, 1990) nagpabalik sa mga pagbating akong nasinati sa pagkabata pa nako sa dihang gibiyaan kami sa akong amahan. Ako nuybe anyos ug mibating gilimbongan, giabandonar, ug nasuko. Kining mga pagbatia nagpabilin kanako hangtod nga akong nabasa usa ka adlaw ang Salmo 27:10. Niadto akong naamgohan nga si Jehova nag-atiman kanako ingong usa ka Amahan.

H. S., Tinipong Bansa

Ang salmo mabasa: “Kong pagabiyaan ako sa akong kaugalingong amahan ug sa akong kaugalingong inahan, si Jehova mismo maoy magadawat kanako.”​—ED.

Tulo ka tuig kanhi ang akong bana ug ako nagdiborsiyo. Sa miaging tuig siya mipahawa sa lungsod nga wala manamilit sa iyang mga anak. Sa emosyon dako kaayo ang ilang giantos ug gibati nga siya nagdumot kanila. Ang artikulo maoy mananaog kay kana nagpakita nga ang mga bata dili maoy mabasol. Nanghinaot ako nga sa igong panahon sila makatuo niana.

L. M., Tinipong Bansa

Ako usa ka inahan sa tulo, ug ako nalambigit sa bagyo sa diborsiyo sa akong mga ginikanan mismo. Ang inyong mga artikulo nakatabang nako sa pag-usob sa akong panghunahuna gikan sa madaoton ngadto sa matukoron. Bag-o pa nakong natapos ang usa ka sulat alang sa akong amahan, ug akong gipaningkamotan nga mahulipan ang bung-aw sa among taliwala.

K. Y., Hapon

Quadriplegic Salamat alang sa artikulong “Gisultihan Nila Ako nga Ako Dili na Gayod Makalakaw Pag-usab!” (Agosto 22, 1990) Human sa usa ka seryosong aksidente niadtong 1980, ako usab nahimong quadriplegic. Hisabtan, kadaghanang tawo wala masayod kon unsay kahulogan niini ug unsay naglangkob niini. Apan ang artikulo nagtagana gayod sa matang sa impormasyon nga gikinahanglan sa mga tawo aron makatabang sa uban nga nagaantos sa sangpotanan sa makapasubong mga kadaot.

W. K., Tinipong Bansa