Kalaw-ayan nga Gibuhatan ug Musika

“ANG sagradong misyon sa mga bandang rock​—ang pagsakit sa labing daghang ginikanan kutob sa mahimo​—sa mausbawon maoy hago nga trabaho diha sa kultura nga sa matag adlaw nagakabagis,” matud sa usa ka bag-ong editoryal sa U.S.News & World Report. Hinuon, kini nag-ingon nga giatubang sa pila ka bandang rock ang “hagit kon unsaon sa pagpakurat sa banhod na” pinaagi sa paggamit ug labi pang bastos nga mga pulong​—dili lang sa ilang musika kondili bisan sa mga ngalan nga ilang gipili alang sa ilang kaugalingon. Ang editoryal mitaho: “Karon adunay labing menos 13 ka banda nga ginganlan sumala sa kinatawo sa lalaki, 6 sumala sa kinatawo sa babaye, 4 sumala sa binhi sa lalaki, 8 sumala sa aborsiyon ug usa sumala sa impeksiyon sa kinatawo sa babaye.” Midugang kini nga nakaplagan sa usa ka surbi ang labing menos napulo ka banda nga ginganlan sumala sa “lainlaing buhat seksuwal” ug unom sumala sa pagsuka. Itugot, ang kadaghanan sa maong mga grupo halayo sa presenteng kiling, pero gibati na ang ilang impluwensiya.

Sa Florida, U.S.A., usa ka korte nagdeklarar nga law-ay sa usa ka album sa grupong rock nga 2 Live Crew nga, sumala sa usa sa mga kritiko niini, nasudlag “87 ka kabatbatan sa seksong agi sa baba, 116 ka paghisgot sa kinatawo sa lalaki ug babaye ug ubang mga pamulong nga nagatumong sa paggula sa binhi sa lalaki.” Ang hukom sa korte sa ulahi giapelar ug gibalit-ad. Bisan pa niana, ang usa ka tag-iyag tindahan sa rekord gidakop ug sa ulahi nahukmang sad-an ug namultahag $1,000 pinasukad sa mga sumbong sa kalaw-ayan tungod sa pagbaligya sa album. Ang iyang mga abogado nagplano sa pag-apelar sa kaso.

Hinuon, dili ang tanan masakit sa maong pag-atake sa kalaw-ayan. Sa The Olympian, usa ka mantalaan sa Washington State, U.S.A., usa ka tigtuki karong bag-o nagpasigarbo sa konsiyerto sa usa ka popular nga bandang heavy-metal. Siya miingon nga ang grupo ‘tingali nakahimog usa ka rekord’ pinaagi sa paggamit ug ngil-ad, matin-aw sa seksuwal nga pulong “kapin sa 200 ka beses panahon sa iyang mga komento sa taliwala sa mga awit. Ang panon misanong sa sama. Kadto usa ka kagabhion sa kalaw-ayan, rock ’n’ roll ug sa Amerikanhong paagi, ug nalipay ang panon.” Ang grupo, siya misuma, “maoy labing talagsaon.”

Ang mga sukdanan sa pipila sa musika karong adlawa ug ang mga kritiko tinong halayo kaayo gikan sa maalamong tambag sa Bibliya: “Walay daotang mga pulong ang kinahanglang mogawas sa inyong mga ngabil.” (Efeso 4:29, The New English Bible) Ang mga mahigugmaon ug musika, batag tigulang, maayo nga dili usab magtugot nga ang maong kalaw-ayan moagi usab sa ilang mga igdulongog.