Gikan sa Among mga Magbabasa

Mga Ginikanang Nagbulag Ang inyong artikulong “Mga Batan-on Nangutana . . . Sa Unsang Paagi Maantos Ko ang Panagbulag sa Akong mga Ginikanan?” (Oktubre 22, 1990) daw gibuhat alang kanako, ug kana nagdasig kanako. Ako 16 anyos, ug ang akong mga ginikanan nagbulag. Usahay ako mobatig kasubo ug kaluya, apan si Jehova maoy akong suod nga Higala, ug siya nakatabang ug dako kaayo kanako. Nasabtan nako nga walay kapuslanan ang pagkabalaka sa labihan bahin sa panagbulag sa akong mga ginikanan. Nakakaplag akog maayong mga higala sulod sa Kristohanong kongregasyon. Nadiskobrehan ko usab nga makapalig-on ang mga tigom ug ubang Kristohanong kalihokan.

D. B. G., Brazil

Suliran sa Hubble Ang inyong mga komento diha sa “Pagpaniid sa Kalibotan” (Disyembre 8, 1990) daw nagpaila nga ang Hubble nga teleskopyo maoy bug-os nga kapakyasan. Bisan pa niana, nabuntog nila ang pipila sa unang mga suliran niini, ug kini makakita sa mga butang uban ang labi pang dakong katin-aw kay sa mga teleskopyong diha sa yuta.

D. N., Tinipong Bansa

Dili among tuyo ang pagtawag sa Hubble nga teleskopyo nga “bug-os nga kapakyasan” apan gipaila ang dako kaayong kahiubos sa siyentipikanhong komunidad sa dihang ang pangunang espeho nakaplagang may dakong depekto.​—ED.

Dihadihang Katagbawan Salamat kaayo sa inyong mga artikulong “Pagbaton Nianang Tanan, Pagbaton Niana Karon!” (Enero 22, 1991) Sila daw mao ang tubag sa akong tim-os nga mga pag-ampo ug naghatag kanakog daghan nga palandongon. Gipasalamatan ko ilabina ang mopukaw-sa-hunahunang mga pangutana nga inyong gisukna. Sila mapamatud-ang bililhon kaayo dihang ako matental sa pagsunod sa dalan sa dihadihang pagtagbaw.

P. D., Tinipong Bansa

Pagmata! Gidayeg Ang basahon nga magtingob sa mga ulohan nga hinungdanon kaayo sa atong katilingban (sama sa medisina, sosyolohiya, ug ekolohiya), nga ipasabot sa dili-politikanhong paagi ug may diyutayng relihiyosong kahulogan, ug nga nagsalig sa Basahon sa mga basahon alang sa mga katin-awan niini​—ang maong basahon lisod kaayong hikaplagan karong mga adlawa. Busa naghangyo ako nga kini sa opisyal mahitala diha sa Rekord sa Miting nga ang Pagmata! makadawat ug botos sa pagdayeg, ilabina ang iyang Nobyembre 8 ug 22, 1990, nga mga isyu mahitungod sa mga UFO ug sa sistema sa imyunidad.

N. B., Konseho sa Munisipyo sa Tietê São Paulo, Brazil

Sistema sa Imyunidad Abi kog nasabtan ko ang mga pulong sa Salmo 139:​14: “Pagadayegon ko ikaw [Diyos] tungod kay sa makalilisang nga paagi ako kahibulongang pagkabuhat.” Apan salamat sa inyong tin-aw, mugbong mga artikulo bahin sa ulohang “Atong Sistema sa Imyunidad​—Usa ka Milagro sa Kalalangan” (Nobyembre 22, 1990), karon ako nasayod na sa bug-os nga kahulogan sa maong kasulatan! Ang kalibotan sa mga selula sa sulod kanato makalilisang. Ang mga buhat sa atong Maglalalang tinuod nga kahibulongan. Salamat sa inyong walay-pagkakapoy, mapinadayonong panukiduki sa maong mga matang sa ulohan. Ang mga artikulo tinuod nga makapalig-on sa pagtuo.

D. J., Tinipong Bansa

Ang mga artikulo yanong kahimut-anan ug edukasyonal kaayo. Samtang nagbasa kanila, ako nahingangha kaayo kang Jehova ug sa pagkakahibulongan sa iyang pagbuhat kanato. Lisod tuohan nga gihunahuna sa pila ka tawo nga kining tanan nahitabong sulagma.

Y. S., Tinipong Bansa

Ambut unsaon nako pagpasalamat kaninyo tungod nianang kahibulongang mga artikulo. Wala pa ako sukad makadungog o makabasag katin-awan nga yano kaayo, pero detalyado. Sanglit ako nagsakit man sa usa sa mga sakit nga inyong gihisgotan, mas makasabot ako sa gisulti kanako sa doktor ug makasagubang sa akong suliran sa panglawas.

M. R. O., Brazil