Gikan sa Among mga Magbabasa
Pagkadili-Makakitag Kolor Ang akong bana naoperahan sa mata ug sa pagkakaron dili makabasa. Sa dihang nadawat namo ang artikulo mahitungod sa Daltonism [pagkadili-makakitag kolor] sa Pebrero 22, 1991, nga gula, gihangyo niya ako sa pagbasa niini alang kaniya. Sa bata pa, dili siya makaila sa itom ug puti nga hulagway sa TV gikan sa de-kolor nga hulagway, apan walay usa sa iyang pamilya ang nabalaka. Diha lamang nga mikuha siyag eksamin sa lisensiya sa pagmaneho nga iyang nahibaloan nga siya dili-makakitag kolor. Busa ang akong bana nagpahayag ug pasalamat sa inyong artikulo. Kon nabatonan pa unta niya kini niadto, malikayan unta niya ang daghang makauulawng mga situwasyon!
M. D., Italya
Mga Panimalay nga Nabahin sa Relihiyon Ang inyong artikulo mahitungod sa “Mga Batan-on Nangutana . . . Sa Unsang Paagi Ako Magkinabuhi sa Usa ka Nabahin sa Relihiyon nga Panimalay?” (Enero 22, 1990) nakatabang gayod kanako sa pagsagubang. Usahay gusto sa akong papa nga magpuyo lang ako sa balay gikan sa pagtambong sa Kristohanong mga tigom aron lang sa pagtan-aw ug TV. Ang inyong artikulo nakatabang kanako ug sa akong mama sa pagpadayon sa pag-ampo ug paglaom nga abuton ni Jehova ang kasingkasing sa akong papa. Salamat kaninyo!
C. E., Tinipong Bansa
Ang akong amahan dili Kristohanon, ug kana makapaguol kanako usahay. Naglaraw ako sa paggamit sa inyong makatabang nga mga punto sa pagsulay sa pagdani kaniya.
L. M., Tinipong Bansa
Kooperasyon sa Doktor-ug-Pasyente Salamat sa inyong artikulong “Pagsumpay sa Kal-ang Tali sa mga Doktor ug sa mga Pasyenteng Saksi.” (Nobyembre 22, 1990) Ako adunay gamayng anak nga lalaki nga natawo nga may sakit nga hydrocephalus ug spina bafida. Naoperahan siya sa unom ka higayon sa wala pa siyay usa ka tuig. Bisag miarang-arang ang iyang kahimtang, siya nagkinahanglan gihapon ug pag-atiman sa doktor. Tungod sa among baroganan maylabot sa dugo [ingong mga Saksi ni Jehova], nagkinabuhi ako nga kanunayng walay kasegurohan kon mokooperar ba ang mga doktor. Naglaom kami nga ang kahikayan sa pagbaton ug nabansayng Kristohanong mga igsoon sa pagtabang kanamo sa pakiglabot sa mga doktor moabot sa dili madugay sa Argentina.
A. M., Argentina
Ang Hospital Liaison Committees ginatukod pa sa Argentina.—ED.
Sidlakang Uropa Sukad nagsugod ang dili pa dugay nga kausaban sa Sidlakang Uropa, naikag ako mahitungod sa mga Saksi ni Jehova nga nagpuyo nianang bahina sa yuta. Diyutay ra kaayong impormasyon ang makita diha sa atong mga publikasyon. Busa imong mahanduraw ang akong katagbawan sa dihang nadawat nako ang Enero 8, 1991, nga gula sa artikulong “Mga Saksi ni Jehova sa Sidlakang Uropa.” Naglaom ako nga magpadayon kamo sa pagpahibalo kanamo mahitungod sa kauswagan sa buluhatong pagsangyaw nianang bahina sa kalibotan.
E. S. L., Brazil
Sistema sa Imyunidad Buot kong masayran ninyo kon unsa ka maayo ang mga artikulo sa medikal nga panukiduki maylabot sa sistema sa imyunidad (Nobyembre 22, 1990). Ako nagtrabaho diha sa hematology-oncology ug miapresyar gayod sa binatid ug tin-awng paagi sa pagkapresentar sa artikulo. Akong giaporan ug usa ka kopya sa magasin ang mga doktor ug mga nars nga akong kauban sa trabaho.
E. S. L., Brazil
Usa ako ka magtutudlo sa siyensiya, ug sa maong higayon, maoy among gihisgotan ang bahin sa imyunidad diha sa klase dihang ang gula sa Pagmata! gipatik. Akong giaporan ug usa ka kopya ang matag usa ka estudyante, ug kami nakahimog abante nga sesyon sa siyensiya binase niana.
R L., Tinipong Bansa
Mga Droga Sa dihang nabasa ko ang artikulong “Mga Droga? Pakiglamano na Lang Kang Satanas!” (Nobyembre 8, 1990), nakahilak ako. Ang taho makasubo apan, sa samang higayon, makapalig-on. Gipatin-aw sa artikulo nga dili takos ibaylo si Jehova sa bisan unsa nga ikatanyag niining daang kalibotan.
M. C. P., Brazil