Sulat Gikan sa Usa ka Bumabati

DILI pa dugay usa ka sulat ang nadawat gikan sa usa ka bumabati diha sa nasod sa Aprika diin ang buluhaton sa mga Saksi ni Jehova gidili. Ang tawo misulat:

“Minahal nga Ginoo,

“Dili na ako magpalikoliko pa; buot lang nakong pahinumdoman kamo nga gidili sa gobyerno dinhi ang kalihokan sa inyong iglesya. Pagkadako sa akong kalagot niini!

“Wala na ako makadawat sa akong Pagmata! sa regular. Apan sultihan ko kamo, ang Pagmata! tingali mao ang labing maayong magasin nga akong nahibaloan sukad. Kini nagatambag sa mga magbabasa kon unsaon sa pagpalakaw sa ilang kaugalingon nga malamposon ug sa hustong paagi, sa legal ug sa espirituwal. Katingad-anan na gani kini.

“Bisag pustahan pa walay lekturero sa unibersidad ang daghan kaayog nahibaloan o nagatudlo nga sama ka detalyado. Labi na ang among ‘mga pastor.’ Ug bisan pa niana ang among gobyerno nag-ingon nga kining mga magasina ug ang samang mga magasin, nga matudloon kaayo, gidili. Ngano? Tungod kay ang mga magpapatik dili mosaludo sa bandera. Maayo.

“Apan usa ka pangutana: Kon may mosaludo ug unya iwaldaswaldas ang kuwarta sa nasod, modawat ug hiphip, maglikay sa pagbayad sa buhis, mopatay, ug uban pa, kana ba matawag nga maunongon? Mao kanay ginahimo sa atong ‘mga Kristohanon.’ Sila nagasaludo sa bandera diha sa paradahan ug dalhon pa gani kini sa ilang mga simbahan ug mosaludo niana didto. Unsang matanga kini nga Kristohanon! Ako nahibalo nga ako dili-hingpit o matarong sa panan-aw sa Diyos. Apan kini dili gayod mao ang paagi.

“Kamong mga Saksi dili mosaludo sa bandera, dili magpadugang ug dugo, dili mosaulog sa Pasko ug sa Pasko sa Pagkabanhaw ug nagadumili sa krimen, paghukhok, paghiphip, pagbuno. Ug nagadumili sa panapaw ug pakighilawas. Hisgoti ang mga bisyo, ug ang mga Saksi seguradong nagadumili.

“Naglaom ug nag-ampo ako nga makasabot ang gobyerno ug hatagan ang inyong iglesya ug kagawasan sa pagtudlo.”