Dili Pinakamaayong mga Paagi sa Pag-usab

SA DIHA nga matukod ang mga sumbanan sa kagawian, sa unsang paagi mahimo ang pag-usab? Kinsa may imong kadangpan, ug unsang mga metodoha ang magamit aron mapatungha ang malungtarong kauswagan?

Hisgotan nato ang pila ka hinobrang lakang nga gigamit karong adlawa.

Politikanhong Pagpugos

Minilyong mga tawo karong adlawa nagpuyo ubos sa mga pagmando nga nagtinguha nga magabuot sa mga mithi ug sa mga kalagdaan sa pamatasan. Kanang mga kagamhanana nagagamit sa gahom nila aron idasig ang kausaban​—ang pipila sa malalangong paagi, ang uban sa mapugsanong paagi. Gigamit sa pipila ang mga teknik sa brainwashing, nga kasagaran naglakip sa panghadlok, pagbilanggo, ug pagsakit. Pinaagi sa pagbuot sa palaumagian sa balita ug sa ubang sistema sa edukasyon, sila nagtinguha nga mapulihan ang tanang natukod nang mga ideya sa mga gusto sa presenteng nagamando hamili nga pundok. Ang tanang pagsupak sa pinugos sumpoon. Si bisan kinsa nga dili gustong maedukar pag-usab tingali ipailalom sa makalilisang nga tratasyon nga kasagarang makapakang-a sa espiritu sa indibiduwal.

Psychosurgery ug Electrical Stimulation

Ang pila ka bahin sa utok nailhan nga makaapektar sa tino nga mga buot ug sa mga matang sa kagawian. Ang psychosurgery naglangkit sa pisikal nga pagkuha o pagdaot sa tisyu sa utok nianang bahina sa utok. Sa diha nga makuha na, kanang bahina sa imong utok dili na makaobra pag-usab, ug bisan unsang kagawian nga impluwensiyado niana mahanaw.

Giingon nga linibo sa maong mga operasyon gihimo, ilabina sa mga tawo nga may masukihon ug peligrosong kagawian sa sekso. Ang pipila gisuksokan ug gagmayng electrodes sa kahiladman sa ilang utok, ug sa dihang gipakoryentehan, kini nagpalihok o nagsumpo sa trabaho sa utok nianang bahina. Giangkon nga kini makapausab sa mga aghat nga magaapektar sa kagawian nga kontrolado nianang bahina sa utok.

Mga Droga

Kaylap ug kasagarang gikinahanglan ang paggamit ug droga diha sa sikyatriya. Adunay mga droga aron sa pagpakalma, mga droga sa pagpakatulog, mga droga sa pagpalagsik, ug mga droga sa pagtul-id sa mga kadili-timbang sa kemikal diha sa utok. Adunay mga droga usab nga gigamit ingong pagsilot diha sa mga bilanggoan ug sa ubang koreksiyonal nga institusyon. Duha nianang maong mga drogaha mao ang apomorphine ug Anectine.

Ang apomorphine idapat sa mga binilanggo kansang kagawian giisip nga dili dalawaton. Kini magpahinabo sa grabeng pagkakasukaon ug sa pagsuka. Ang binilanggo sultihan nga kon siya magdinaotan pag-usab, siya hatagag dugang apomorphine. Kini gitawag usab nga aversive therapy. Ang Anectine magpahinabo sa gihubak, dili-makaginhawa nga pagbati sa nagminalditong binilanggo. Siya maghunahuna nga siya mamatay. Kon siya magminaldito na usab, hatagan siyag dugang Anectine.

Kini ba mao ang mga paagi nga imong gamiton sa pag-usab sa imong kagawian?

Ang kadaghanan sa mga metodo sa ibabaw nagalapas sa kagawasan sa paghukom. Kana naglangkit usab sa impluwensiya sa mga tawong may gahom ibabaw sa lain apan sa kanunay wala sa hunahuna ang kaayohan niya. Ang politikanhong gahom ba nagatinguha sa kaugalingong kaayohan o sa indibiduwal? Sa psychosurgery, kinsay nagkupot sa kutsilyo? Kinsay nagakontrolar sa swits sa dihang gamiton ang electrical stimulation? Unsa ka malungtaron ang aversive therapy? Kasaligan ba ang terapista?

Atong hisgotan ang labi pang dalawaton nga metodo.