“Ang Kinadak-ang Gasa”
ANG mga ginikanan nga nagabuhat sa ilang labing maarangan sa pagmatuto sa ilang mga anak aron mahimong ligdong, masundanon-sa-balaod, ug mahadlokon-sa-Diyos malipay pag-ayo sa dihang ipahayag sa ilang mga anak ang apresasyon alang sa ilang mga paningkamot. Kini matuod ilabina niining “kataposang mga adlaw” sa dihang ang usa ka ilhanan sa mga panahon mao ang lapnag nga ‘pagkamasukihon ngadto sa mga ginikanan.’—2 Timoteo 3:1, 2.
Si Nancy, usa ka 15-anyos nga estudyante sa hayskul, gipadako sa mga ginikanan nga mga Saksi ni Jehova. Usa ka adlaw ang iyang magtutudlo sa Ingles mihatag sa klase ug asaynment sa pagsulat mahitungod sa kinadak-ang gasa nga ilang sukad nadawat. Ang mosunod mao ang gitunol ni Nancy, ubos sa ulohang “Ang Kinadak-ang Gasa”:
“Adunay daghang matang sa mga gasa ug mga maghahatag. Adunay mga gasa sa gugma, mga higala, ug mga hiyas. Usab, adunay mga gasa nga dili nimo gusto, sama sa pagdumot ug kakabos. Adunay daghang matang sa mga maghahatag. Kadtong mohatag nga mahakogon ug kadtong mohatag tungod kay gusto nila. Ang kinadak-ang gasa nga sukad akong nadawat mao ang gasa nga gihatag kanako sa akong amahan, ang gasa sa kahibalo bahin sa Diyos.
“Kining gasaha maoy gasa nga molungtad sa tibuok nga kinabuhi, dili sama sa ubang mga gasa nga igalabay sa dihang madaan sila. Ang mga butang akong nakat-onan modasig kanako sa tibuok kong kinabuhi ug mag-impluwensiya sa tanan nga akong ginabuhat. Pinaagi sa pagtuon bahin sa Diyos sa Bibliya, ako siyang nailhan sa personal, ingong usa ka higala nga akong gidayeg ug gitahod.
“Hangtod sa pagkamatay sa akong amahan niining tuiga, ako nagsalig kaniya sa dihang gikinahanglan ko ang giya. Ang uban nagsalig usab kaniya. Kasagaran dili nako makita ang akong amahan inig-uli niya sa balay gikan sa trabaho kay siya puliki sa pagduaw ug paghatag pagpaluyo niadtong atua sa ospital. Karon nakaamgo ako unsa ka mahinatagon siya sa iyang panahon. Bisan pag siya wala na uban kanako karon sa paghatag nako sa pagpaluyo ug giya nga akong gikinahanglan, ako makasalig sa akong langitnong Amahan alang sa mga butang akong gikinahanglan sa tibuok kong kinabuhi.
“Gipabilhan ko pag-ayo kining gasaha, ug nagapasalamat ako sa Diyos tungod sa paghatag kanakog lig-on kaayo ug matinumanon nga amahan. Ang iyang panig-ingnan magbaton ug walay-kataposang epekto diha kanako. Hinaot pa unta, ako makapakita sa akong pagpabili samtang ako magkaedaran ug makasunod sa panig-ingnan nga gihatag sa akong Amahan alang kanako.
“Ang kahibalo sa Diyos mao ug kanunay mamaoy akong labing bililhong gasa, ug nagapasalamat ako sa akong mga ginikanan sa paghatag nako niining gasaha. Ang ilang dakong panig-ingnan sa pagkamatinumanon kanunay nga magpabiling uban nako.”
Ang maong sinulat gipabilhan sa magtutudlo, kinsa miingon nga kadto nakatandog kaayo kaniya, ug gibasa niya kadto ngadto sa klase. Gimarkahan niya ang sinulat sa duha ka A-plus, ang usa alang sa unod, ug ang lain alang sa gramarya ug punctuation.
Ang inahan ni Nancy nagpabili usab sa sinulat. Matud niya: “Ako nahimuot kaayo niadto. Kay wala masayod sa eksakto unsay pagbati sa imong mga anak sa tanang panahon, kadto nakatabang nako sa pagsabot nga si Nancy nagauswag ug nagadawat sa mga hitabo sa labing maayo nga iyang mahimo.”