Ang Guryon—Higala o Kaaway?
MAO pay pagbalhin sa bag-ong mga silingan. Sila, nga nagpapahawa sa nangagi nga mga molupyo ug nag-abog sa ukitan nga mga tumatan-aw, nagpahiluna aron sa pagpadayon sa matag-adlaw nga trabaho sa pagpatungha ug sa pagpakaon sa usa ka pamilya.
Ang ilang ngalan, ang guryon, gipadapat sa daghang nagkadaiyang mga langgam, apan kasagaran nagatumong kini sa mga sakop sa pamilya sa weaver. Ang mga guryon kasagaran gagmay, dili-himatikdang mga langgam nga dunay abohon, brawon, ug itom nga balhibo. Daghan maoy hanas nga mga mag-aawit.
Hinuon, basin ang mga guryon dili ang matang sa mga silingan nga palabihon nimo. Kay bisan pag sila dinayeg sa pipila tungod sa ilang kaisog ug kamapahiuyonon, kining gagmayng mga langgam nahimong dili popular sa pila ka dapit.
Kon Nganong Giisip nga Kontrabida
Ang guryon sa balay (Passer domesticus), o English sparrow, nadala gikan sa Uropa ngadto sa Amerika del Norte niadtong 1851 nga gilaoman nga maghinlo sa kakahoyan sa madaotong cankerworm. Bisan pa niana, nasayran sa wala madugay sa mga guryon nga mas hayahay ang pagpuyo sa siyudad kay sa pagpuyo sa banika. Busa inay mokaon ug mga insekto, sila nangaon sa mga sobrang pagkaon ug wala madugay nahimong hanas sa arte sa pag-utingkayg mga basurahan. “Ang kamapahiuyonon ug kaagresibo” sa guryon sa balay, matud sa librong North American Birds, “motumbas sa kinaiya sa balhiboon nga mga imigrante sama sa brawon nga ilaga, itom nga ilaga, ug ilaga sa balay.”
Ang mga guryon nagagama sa ilang gubot, di-hinlong mga puy-anan diha sa tanan nga suok. Ang mga balhibo, balhibo sa karnero, ug gilabay nga panapton nahilakip sa mga galamiton nga pinalabi nila sa paggama ug salag. Kasagaran nga ilang abogon ang lumad nga kalanggaman ug kaway-ulaw mobanos sa ilang mga salag, nga ipagawas ang mga itlog sa gipapahawang mga molupyo. Dugang pa, ang mga guryon tigdaot sa lainlaing klase sa prutas, ug mokaon sila sa nahinog nang mga liso ug sa humok, linghod pang utanon.
Sa Brazil, diin ang guryon sa balay gituyo usab sa pagpasulod, kini dili lang nagdaot sa mga tanom kondili nag-abog usab sa minahal tico-tico nga langgam. Ang tico-tico, nga susama sa gidak-on ug sa kolor sa guryon, maoy tighugoyhugoy, mapuslan gamay nga langgam nga mopatay sa mga insekto nga modaot sa mga tanom.
Makapabakwing mga Kinaiya
Hinuon ang mga guryon masadyang mga langgam nga tigsiyapsiyap ug tigpiyakpiyak, ug daghang tawo ang gusto nga motan-aw nila samtang sila manglupad gikan sa ilang batoganan paingon sa yuta ug balik na usab sa taas. Usa ka tigsud-ong sa langgam miasoy: “Kami may mga pito ka salag sa guryon duol sa among balay. . . . Usa ka grupo sa mga langgam makita nga magdungan sa pagdula sa tubig, nga mabangga sa usag usa sa pagdula. Maukyabon kaayo ang pipila. Mosalom ug motihaya sila, ug mopalingpaling, nga mangapakapa hangtod nga mabasa na sila pag-ayo. Unya, manglukso sila paingon sa koral, magpahid sa mga sungo nila, magkirigkirig sama sa himoon sa iro, motan-aw sa tubig ug mosalom pag-usab. Kana mahimong mopadayon tingali sa usa ka oras sa usa ka panahon, ug dayon manglupad sila ug unya mamalik sa usa o duha ka oras.” Usahay ang mga guryon makita usab nga maligo sa abog sa ugang yuta ubay sa dalan o sa gitamnan sa bulak.
Makaikag, ang mga guryon gihisgotan sa Bibliya. Sa makaduha, si Jesus migamit niining wala kaayo matagad nga mga langgam aron ihulagway ang mabinationg pag-amoma sa Diyos. Sa gisugo ang iyang 12 ka apostol sa pagwali, si Jesus nangutana kanila: “Dili ba ang duha ka guryon gibaligya sa usa ka dako?” ug dayon siya misaysay: “Apan walay mausa kanila ang mataktak sa yuta nga wala mahibaloi sa inyong Amahan. Busa ayaw kamo kahadlok: kamo labaw pa ug bili kay sa daghan nga guryon.” Sa kaulahian sa iyang ministeryo, gisubli ni Jesus ang maong ilustrasyon, sa ingon gipasiugda nga sanglit ang Diyos dili mahikalimot bisan sa usa ka guryon, Siya dili mahikalimot niadtong nagaalagad Kaniya.—Mateo 10:29, 31; Lucas 12:6, 7.
Dayag, gipabilhan ni Jehova nga Diyos ang tanan niyang linalang, ang gagmay ug dagko. Ug bisan pag ang mga kinaiya sa pila ka linalang tingali dili sa kanunay makapamahal nila kanato, ang daghan ug nagkalainlaing matang sa buhing mga butang nagsumbalik-silaw sa kaalam sa atong Dakong Maglalalang.—Salmo 104:24.