Gikan sa Among mga Magbabasa
Panghasi sa Eskuylahan Nalipay kaayo sa pagdawat sa artikulong “Mga Batan-on Nangutana . . . Unsay Akong Himoon Aron Dili na Niya Ako Hilabtan?” (Mayo 22, 1991) Una nakong tuig kini sa hayskol, ug daghan nang mga lalaki ang namugos kanako sa pagsulod ug usa ka relasyon. Dili gayod ako lung-an sa usa kanila. Iya akong gihangyo nga ubanan ko siya sa prom, sa pagpangaon, ug bisan sa hinapos sa semana ngadto sa mga bukid. Wala gayod siya mohunong bisag gibalibaran. Apan ang artikulo nakapalig-on sa akong desisyon sa pagsikway kaniya.
P. B., Tinipong Bansa
Bisag 17 anyos pa lamang ako, nakaatubang na ako ug sama nianang gihubit sa artikulo. Kay nalipay sa gipakitang atensiyon, wala gayod ako mosulay sa pagsanta niana. Karon nasabtan na nako ang panginahanglan sa pagsanta dihadiha dayon sa mga pagbirigbirig.
L. A. R., Brazil
Ang artikulo nakatabang kanako sa pag-atubang sa nagakagrabeng imoralidad sa akong trabahoan. Gipunting niadto ang mga kapeligrohan ug gisuportahan ang mga argumento ug mga panig-ingnan sa Kasulatan. Matin-aw nga kining mga artikuloha nakatabang dili lamang sa mga batan-on kondili sa mga dili-minyo usab sa tanang panuigon.
K. H., Alemanya
Ang artikulo nakatabang kanako sa paglig-on sa akong determinasyon, sama sa dalagang Shulamita, sa pagkahimong “usa ka paril.”
E. S., Pilipinas
TMJ Syndrome Salamat sa artikulo, “Gikan sa mga Apapangig—Ang Dakong Impostor.” (Hunyo 22, 1991) Magpakadungog ako ug kusog nga pagbagting sa akong mga dalunggan sulod sa duha ka tuig tungod sa TMJ syndrome. Ang inyong artikulo nakatabang kanako sa pagdesider kon unsang matanga sa doktor ang akong konsultahon. Gibati ko nga gitagana ni Jehova kining artikulo alang kanako ug sa ubang dili-maisip nga mga nag-antos sa TMJ.
R. B., Tinipong Bansa
Ang “Pagmata!” wala magduso ug medikal nga tambag, apan nalipay kami nga mapaambit ang makatabang nga impormasyon sa among mga magbabasa. Dili ikahibulong, ang artikulo bahin sa TMJ nakakuha ug talagsaon daghang pagsanong gikan sa mga magbabasa sa tibuok kalibotan.—ED.
Pagtabako Sanglit nakabasa sa duha ka artikulo sa “Mga Batan-on Nangutana . . .” bahin sa pagtabako (Agosto 8 ug 22, 1991), ikaingon ko nga tinuod gayod ang nahasulat. Misugod ako sa pagtabako sa edad 13, nadani sa mga higala sa eskuylahan. Apan sa dihang nahimo akong usa ka Kristohanon sa edad 15 ug mihunong sa pagtabako, nakita ko nga gitalikdan ako sa akong “mga higala.” Sa ulahi, gipugos na usab ako sa pagtabako sa akong mga kaubanan sa trabaho. Makalilipay, ako karon empliyado sa usa ka kaubang Kristohanon, ug ang hangin sa akong palibot karon mahinlo—sa literal ug sa espirituwal.
B. S., Alemanya
Rehabilitasyon Salamat sa inyong artikulo “Ang Gahom sa Kamatuoran sa Pagbag-o.” (Hulyo 22, 1991) Sa pagkakaron gialagaran ko ang sentensiya sa pagkabilanggo ug nadasig sa pagkadungog sa usa ka tawo nga nagbag-o sa iyang kinabuhi. Ang mga awtoridad naningkamot sa pagbag-o sa mga krinimal, apan ginapadala lamang nila ug balik sila ngadto sa kalibotan ni Satanas aron sa pagpakasala pag-usab. Akong nakaplagan, uban sa tabang sa pipila ka masinabtanong mga ministro sa mga Saksi ni Jehova, nga ang bugtong dumalayong rehabilitasyon nalangkit sa pagpangita ug sa pag-alagad sa Diyos.
J. S., Tinipong Bansa
Lugar nga Kapuy-an Buot kong magpasalamat alang sa inyong artikulo “Dag-a ang Piot nga Puy-anan!” (Abril 22, 1991) Kami nagpuyo sa usa ka gamay nga apartment, ug daw daghan ra kaayo kami ug butang. Kining artikuloha mapuslanon kaayo kanamo tungod kay nakadesider kami sa pagdispatsar sa tanang butang nga wala namo gamita. Dili kini masayon nga butang buhaton, ug among gipaningkamotan kanang buhaton. Salamat kaayo kaninyo, daw kining artikuloha gisulat ilabina alang kanamo.
L. C., Guatemala