Gikan sa Among mga Magbabasa

Kidnapping Daghan kaayong salamat kaninyo tungod sa artikulong “Ayaw Pagbinuang, kay Kondili Patyon Ti Ka” (Nobyembre 22, 1991) ako natandog ug nakahilak. Ako wala gayod makasinati ug bisan unsa sama sa giagian ni Lisa Davenport, apan may kagul-anan sa dugay-dugay nang panahon, usahay ako mobati nga gusto nakong mamatay. Ang artikulo, hinoon, nakapahinuktok nako ug lalom mahitungod sa kusganong tabang nga ginahatag ni Jehova nga Diyos ug kon sa unsang paagi siya kanunay nagahatag ug tabang sa dihang gikinahanglan.

N. O., Hapon

Mga Pamilya Makigsuod Ako nalipay kaayo mahitungod sa serye sa mga artikulo “Mga Pamilya​—Makigsuod sa Dili pa Ulahi ang Tanan.” (Septiyembre 22, 1991) Ang akong mga mata napunog luha sa dihang akong nakita ang nindot nga hapin. Usab, ang matag pulong ug prase maampingong gipili ug gisulat uban sa tuman nga kamabination! Salamat kaninyo sa pagpahinumdom kanamo sa kahinungdanon sa pagbaton ug suod nga pamilya.

K. E., Tinipong Bansa

Ang mga artikulo maoy kauban sa labing makatandog nga akong nabasa masukad. Daghan kanamo nagtuo nga kon sa yano kami motuon ug Bibliya uban sa among mga anak, kuyogon sila sa Kristohanong panagkatigom, ug ikuyog sa pagpakigbahin sa buluhatong pagsangyaw, kami mahimo nang molampos ingong mga ginikanan. Akong nakaplagan, hinoon, nga ang malamposong mga ginikanan usab may suod personal nga relasyon uban sa ilang anak​—usa ka bugkos nga nagapasalig sa usa ka bata sa paghigugma sa ginikanan. Kining puntoha napagawas sa miaging mga artikulo, apan ang iyang epekto kanako karon dako kaayo masukad.

T. H., Tinipong Bansa

Una pa maminyo, ako usa ka tinidor de libro. Ako nalipay ug dako sa akong trabaho. Pagkahuman makabaton ug mga anak, ako mihukom sa paghunong ug trabaho ug mipuyo sa balay kauban ang mga bata. Usahay, hinoon, ako mibati nga wala gayoy hinungdan ug nangandoy sa pagbalik ug trabaho. Pagkatapos mabasa ang inyong artikulo ako nakabati sa nabag-o nga pagsabot sa responsabilidad ngadto sa akong mga anak.

S. M., Tinipong Bansa

Pagsugal Salamat kaninyo alang sa artikulong “Mga Batan-on Nangutana . . . Ang Pagsugal Tinuod Bang Daotan?” (Nobyembre 8, 1991) Sa among eskuylahan, ang pagsugal popular kaayo. Usa ka dula sa sugal nagabayad ug 20 yen sa dumadaog; pila ka mga kasaring modala ug 2,000 yen sa eskuylahan! Kas-a ako giagda sa pag-apil. Ako nagsugod sa paghunahuna kon ang pagsugal tinuod ba gayod nga daotan, ug ako natental sa pagsulay niini sa makausa lamang. Apan human mabasa ang artikulo, ako karon nasayran nga ang pagsugal dili maayo nga butang ug nga kon ikaw mosulay niana ug makausa lang, lagmit ikaw gusto nga mohimo niana usab ug usab.

N. N., Hapon

Kamatinud-anon Ako nagsulat labot sa artikulo nga “Mapuslanon ba nga Magmatinud-anon?” (Oktubre 22, 1991) Sanglit ang mga Saksi ni Jehova wala magadasig sa human-eskuyla nga mga kalihokan sa isports, ako mibati nga kining artikulo nagpadala ug makapalibog nga mensahe.

C. P., Tinipong Bansa

Ang artikulo nagtug-an kon sa unsang paagi ang usa ka batang lalaki nga nagadula sa usa ka dula sa besbol gigantihan tungod sa kamatinud-anon. Hinoon, ang kasinatian gipaila sa magasin nga “Sports Illustrated.” Busa ang batan-on nga nalangkit dili usa ka Saksi ni Jehova. Sa bisan unsang paagiha, ang artikulo gipatik, dili sa pagtuboy sa pagsalmot sa isports, kondili sa pag-ilustrar sa bili sa kamatinud-anon.​—ED.

Gikan sa Among mga Magbabasa Ako kanunay nagalantaw sa unahan nga makabasa sa mga sinulat “Gikan sa Among mga Magbabasa.” Ako nahingangha lamang sa pagkamataktikanhon nga inyong gipakita sa inyong mga pagtubag. Kon may nasipyat sa pagprinta o sayop, kamo sa kamapainubsanon modawat niana. Bisan pa, walay sapayan kon sa unsang paagi masilo ang usa ka magbabasa, kamo wala gayod mouk-ok gikan sa kamatuoran sa Pulong sa Diyos. Ug ngani kamo may katistis pa! Maayo nakong agik-ik tungod sa inyong tubag ilalom sa ulohang “Nasayop sa Pag-ila” diha sa Pebrero 22, 1991, nga isyu.

C. W., Tinipong Bansa