Butang Mas Maayo Kay sa Butang Ilis sa Wala

HALOS tanan nga sugarol mosangko nga mas pobre kay sa dihang sila wala pa manugal. Kasagaran na, bisan ang pipila nga makadaog ug dagkong mga kantidad makadiskobre nga ang ilang mga nadaog dili pasaporte sa kalipay.

Usa ka 36-anyos nga ulitawo sa Hapon nakadaog ug $45,000 sa loteriya. Pinaagi sa iyang daog siya nagplano nga mopalit ug balay, apan siya gikasinahan pag-ayo ug gilibak nga siya mihukom nga dili kadto takos. Sa katingala sa mga kauban niya sa trabaho, gisunog niya ang iyang tiket nga nakadaog samtang sila naglantaw kaniya.

Gidakop sa mga polis sa Florida ang usa ka babaye si kinsa, bisan pag nakadaog ug $5 milyon sa loteriya, nagplano sa pagpatay sa iyang umagad-babaye. Ang iyang anak miingon nga siya nataranta tungod sa naalkansing mga pangapital ug sa sobrang gastos nga nakahurot sa iyang bahandi.

Usa ka Napildi nga Nahimong Mananaog

Si Domingo usa ka lunod-patay nga sugarol ug amahan sa lima. Siya misaysay: “Kon makadaog ako, kana labing daotan. Ako maghunahuna nga ako henyo, ug ako mobalik dayon sa mga sugalan sa pagpamatuod nga kadto dili talagsaong aksidente.

“Sa mikupot kanako kanang hiliga, nahisama kadto nga ako gidroga. Andam ako nga mobiya sa akong asawa ug mga anak aron ipadayon lang ang panugal. Bisan pag sa balikbalik ako nanaad sa akong asawa nga dili na ako mousab sa pagsugal, nasayod ako sulod sa akong kasingkasing nga walay pulos kadtong mga saara. Ako nahinumdom nga kausa gipasaligan ko ang akong asawa nga ako dili na manugal hangtod sa hangtod, sa dihang niadtong gutloa mismo, ako nagplano kon sa unsang paagi ako makasapi aron ipusta.

“Gipildi ko ang tanan kong kuwarta, ang kuwarta sa akong asawa, ug akong negosyo, ug ako nahibanlod sa daghan kaayong utang. Walay usa ka adlaw ang molabay nga walay usa ka matang sa pusta, hangtod nga may nahitabo nga napugos ako sa pagtulotimbang sa akong kaugalingon. Misugod ako sa pagtuon sa Bibliya uban sa mga Saksi ni Jehova. Ako nahibulong sa akong natun-an, apan wala dayon ako mohunong sa pagpanugal. Mapasalamaton ako nga ang Saksing nagtuon uban kanako mapailobon kaayo.

“Apan ang mensahe sa Bibliya sa wala madugay misugod sa pag-apektar kanako. Kana mitabang nako sa pagbiya sa akong gidamgong kalibotan ug sa pagkakita sa akong kaugalingon sumala sa pagkakita sa Diyos kanako. Kadto nakapakurat. Gibati ko ang dakong kaulaw, sama niadtong si kinsa gisulatan ni apostol Pablo sa unang siglo: ‘Nan, unsa ang bunga nga inyong nabatonan niadtong panahona? Mga butang nga inyo karong igakaulaw. Kay ang kataposan nianang mga butanga mao ang kamatayon.’​—Roma 6:21.

“Ang pagkaila sa Diyos, sa iyang ngalan, iyang personalidad, ug ilabina ang iyang kaluoy mitukmod kanako sa pagtinguha sa pag-usab sa akong pagkinabuhi, sa paghunahuna sa uban inay sa akong kaugalingon. Sa kataposan ako nahigawas sa hingpit sa bisyo sa panugal, ug ang akong asawa ug ako nabawtismohan.

“Si Jesus miingon nga ang kamatuoran magapagawas kanato. (Juan 8:32) Kana matuod gayod sa akong kahimtang. Ang kamatuoran sa Pulong sa Diyos mao ang mihatag kanako ug butang mapuslanon nga pagakinabuhian, nagpasig-uli kanako sa akong pagtahod-sa-kaugalingon, ug naghatag kanakog dakong katagbawan. Ako nakatabang gani sa usa sa akong kanhing mga higala sa sugal sa pagbag-o sa iyang kinabuhi sama sa akong nahimo. Sa dihang siya ug ang iyang asawa nabawtismohan, kana mihatag kanako ug mas dakong kalipay kay sa nahimo sukad sa bisan unsang pagdaog sa sugal.

“Sa miaging 20 anyos, ako wala na mamusta, bisan sa gamay nga kantidad. Ako dili moingon nga kadto sayon, apan dili usab kadto lisod. Ug ang gihatag sa Diyos kanako labaw pang nagtagbaw sa mga panginahanglan nga gitinguha ko nga tagbawon pinaagi sa panugal.”a

Ang Kasulatanhong hunahuna labawng hinungdanon alang niadtong buot mobuhat sa kabubut-on sa Diyos. Ug kadtong mosunod sa tambag sa Diyos dili lamang makalingkawas sa kaguol nga dad-on sa panugal apan makakaplag nga siya may ginatanyag nga butang nga labaw kay sa daog sa sugal.

Bahandi nga Labaw pag Bili

Si Pablo, sa pagsulat kang Timoteo sa unang siglo, miingon: “Pahimangnoi [sila] nga dili ibutang ang ilang mga paglaom sa butang walay kapihoan sama sa salapi, kondili diha sa Diyos, si kinsa sa madagayaon nagahatag kanato sa tanang butang aron pagakalipayan. Pahimangnoi sila sa pagbuhat ug maayo . . . , nga maandam sa paghatag ug pagpaambit, ug sa ingon mabatonan ang usa ka bahandi nga mahimo unyang maayong patukoranan alang sa umaabot. Niana ilang makuptan ang kinabuhi nga maoy tinuod nga kinabuhi.”​—1 Timoteo 6:17-19, The New English Bible.

Usa ka bahandi nga pagakuptan mao ang maayong ngalan uban sa Diyos. Kini mosangpot sa usa ka “kinabuhi nga maoy tinuod nga kinabuhi”​—kinabuhing walay kataposan, ang kinadak-ang ganti nga natanyag sukad. Si Jesus miingon diha sa pag-ampo ngadto sa Diyos: “Kini nagkahulogan sa kinabuhing walay kataposan, ang ilang pagbaton ug kahibalo mahitungod kanimo, ang bugtong matuod nga Diyos, ug kaniya nga imong gipadala, si Jesu-Kristo.”​—Juan 17:3.

Lahi sa walay-kapihoan nga mga ganting salapi, ang ganti nga ginatanyag sa Diyos madaog ni bisan kinsa ug sa matag usa nga nagabuhat sa kabubut-on sa Diyos. Dugang pa, ang pagbuhat sa kabubut-on sa Diyos motagana sa tanang kaukyab nga mapangandoy ni bisan kinsa, ug kini nagahatag sa tawo sa pagtahod-sa-kaugalingon ug sa kinabuhing makahuloganon. Kasamtangan, tungod sa pait nga panimayad sa panugal, hinumdomi ang tambag sa usa ka karaang sanglitanan sa Inglaterra: “Ang kinamaayohang tugpo sa dais mao ang paglabog niana.”

[Footnote]

[Hulagway sa panid 10]

Ang kinabuhing walay kataposan sa usa ka paraisong yuta maoy labaw kaayong ganti kay sa bisan unsang maangkon pinaagi sa panugal