Malipayon Kaayo nga Nabuhi!
“MALIPAYON kaayo ako nga nabuhi!” masibotong miingon si Bernice, usa ka himsog nuybe-anyos nga batang babaye nga nagpuyo sa habagatang Alemanya. Siya may linain nga rason sa pagkalipay.
Usa ka adlaw samtang nagtubo pa si Bernice sa tagoangkan sa iyang inahan, ang iyang igsoong babaye nagkasakit. Siya gitipdas! Nalisang ang inahan, sanglit kining makatakod nga sakit mapasa ngadto sa bata nga wala pa matawo sa panahong gisabak ug mopahinabog grabeng depekto sa lawas sa bata.
Human gisusi ang mga sampol nga dugo, miaksiyon dayon ang doktor nga kusganong mirekomendar sa pagtapos sa pagsabak. Sumala sa nakita sa pagtuon sa dugo, wala gayod siya magduda nga ang inahan ug ang bata nga gisabak may tipdas. Dugang pa, ang mga eksaminasyon nagpakita nga dako kaayong posibilidad nga matawo ang bata nga grabe ang pagkadepekto.
Ang mga ginikanan, hinunoa, nagtuo nga supak sa mga balaod sa Diyos ang paghulog sa bata nga gisabak. Ingong mga Saksi ni Jehova, sila wala mosugot sa pagdawat sa maong paagi. Bisan pa, ang doktor miinsister, naghulagway ug mangil-ad nga larawan sa sangpotanan sa ilang pagdumili. Iyang gihisgotan ang mga sulirang nalangkit sa pagpadakog grabe ug depekto nga anak. Apan malig-on ang mga ginikanan, gisaysay ang ilang Biblikanhong hunahuna bahin sa paghulog sa bata nga gisabak. Sila andam sa pag-atubang sa bisan unsang kahimtang nga basin ug motungha ug sa pagmahal sa bata bisan unsa pay mahitabo.
Nakadayeg kaayo ang doktor. Siya miadmiter nga siya mismo dili pabor sa paghulog sa bata nga gisabak, nagtuo nga kini daotan gayod. Apan may obligasyon siya sa pagpresentar sa mga kamatuoran ug sa mga sangpotanan sa matin-aw.
Sa milabay ang siyam ka tuig, si Bernice, nga usa ka normal ug himsog nga bata, miduaw sa usa ka doktor. Ang sampol sa iyang dugo nagpakita nga siya wala gayod matakboyi ug tipdas. Tingali, ang paghiling nga gihimo sa wala pa siya matawo sayop. Pagkamaayo nga nagpabiling malig-on ang mga ginikanan sa ilang pagtuo! Dili ikahibulong si Bernice nakaingon: “Malipayon kaayo ako nga nabuhi!”