Gikan sa Among mga Magbabasa
Pakigbugno sa Sakit Buot kong ipahayag ang akong apresasyon sa kasinatian ni Hans Augustin diha sa artikulong “Ang Akong Pagpakig-away nga Mabuhi.” (Abril 22, 1992) Ako nag-antos gumikan sa daot nga panglawas, apan wala gayod akoy mga suliran nga ingon ka grabe sa iyaha. Ako napahinumdoman sa estorya sa usa ka tawo nga naghunahuna nga siya naalaot tungod kay siya walay sapatos—hangtod iyang nakit-an ang usa ka tawo nga walay tiil! Sa bisan unsang paagi, ang mapait nga estorya ni Hans Augustin maoy makapalig-on gayod sa akong pagtuo, ug ilakip nako siya sa akong mga pag-ampo.
A. M. M., Tinipong Bansa
Ako nagaantos sa mga sakit sa ulo, pamanhod sa akong tuong kamot ug tiil, nagkahanap nga panan-aw, ug nagapadayong pagkalipong. Nagpa-CT scan na ako, apan kana walay gipakitang diperensiya. Ako naguol tungod kay gamay na lang ang akong mahimo sa pag-alagad sa Diyos. Ako usab mobating desperado sa dihang ako maghunahuna sa akong ugma-damlag. Ugaling, si Hans Augustin nagdasig sa mga magbabasa sa pagbug-os sa pagtagad sa espirituwal nga mga butang, ug buot ko siyang sundogon sa iyang positibong panlantaw. Ako naeskedyul sa dugang mga pagsusi, apan bisag unsay mahimong resulta sa mga pagsusi, ako natabangan na sa paglantaw sa unahan ug sa pagsukol sa balatian.
K. T., Hapon
Kalibotan sa Komersiyo Usa ka mubong sulat sa pag-apresyar sa seryeng “Ang Pagsulbong ug Pagkahapay sa Komersiyo sa Kalibotan.” (Enero 8–Marso 22, 1992) Gidahom nako sila nga lisod basahon, apan nakaplagan ko sila nga maayong pagkasulat, nga wala akoy suliran sa pagsabot kanila. Sa bug-os ako nalingaw sa serye.
D. H., Tinipong Bansa
Mga Suliran sa Pagkaon Buot ko kamong pasalamatan ug dako sa pagpatik ug artikulong “Pagtabang sa May Suliran sa Pagkaon.” (Pebrero 22, 1992) Kadto nakatabang kanako sa kataposan sa pagdawat nga ako nagaantos gikan sa suliran sa pagkaon. Sa unang higayon, nasabtan nako nga ang suliran walay kalabotan mahitungod sa pagkaon apan sa laing mga isyu, sama sa akong kinabuhing pamilyahanon. Ang akong suliran nakapakomplikado sa daghang mga bahin sa akong kinabuhi, lakip ang akong karera diha sa ministeryo. Sukad sa pagbasa sa artikulo, ako naghimog daghang pagdukiduki, ug akong nasabtan nga ako may hataas, lisod nga dalan sa pagkaayo sa unahan nako. Apan ang pagkasayod nga si Jehova mapailobon ug mahigugmaon usa ka dakong tabang kanako.
J. S., Tinipong Bansa
Ako 15 anyos ug nagaantos sa suliran sa pagkaon sulod sa pipila ka tuig na karon. Sukad nga nabasa sa akong inahan ang artikulo, siya nahimong mas masinabtanon ug mapaluyohon sa hustong paagi. Sa pagkatinuod ako mibati nga nakakontrol na sa akong kinabuhi karon, ug kinahanglan kong isulti kon unsa ka dako ang pag-apresyar ko sa inyong mga artikulo. Sila kanunay mao gayod ang akong gikinahanglan.
M. G., Tinipong Bansa
Pagkaulay Salamat kaninyo alang sa artikulong “Mga Batan-on Nangutana . . . Nganong Magpabiling Ulay?” (Abril 22, 1992) Ako nakahilak sa dihang akong gibasa ang mga pulong sa usa ka 14-anyos nga babaye nga nawad-an sa iyang pagkaulay pinaagi sa pakighilawas. Ang tinuod, ako mao usab. Bisag unsa ka daghan sa luha ang ipaagay sa paghilak dili gayod paigo sa pagpakita kon unsa ako ka mahinulsolon ingong usa ka Kristohanon tungod sa pagkapakyas sa paghupot sa akong pagkaulay. Sa dihang nahibaloan kana sa akong amahan, kadto maoy unang higayon nga nakita ko siyang mihilak. Sa usa ka paagi, bisan tuod ang Diyos sa kamaayo mopasaylo, sa matag karon ug unya ang mga kagahapon mobalik, ug ang mga luha mosugod na usab sa pagdagayday. Pagkamaayo gayod nga huptan sa usa ang iyang pagkaulay kay sa moani sa daotang mga sangpotanan gikan sa pagkahimong dulaanan sa usa ka lalaki.
I. M., Hapon
Usa ka babaye sa eskuylahan mihangyo kanako sa makadaghan nga makigsekso kaniya, apan gibalibaran ko siya sa matag higayon. Ingong resulta, iya akong gipasanginlan nga usa ka bayot. Ang inyong artikulo nakapalig-on sa akong pagtuo nga ang akong pagkaulay maoy usa ka maayong butang. Tungod niana, ako may dakong purohan nga molampos diha sa kaminyoon kay sa usa nga maoy matugoton sa seksuwal.
D. L., Tinipong Bansa