Ang Ubang mga Batan-on Dili Gustong Mabuhi
ANG paghikog sa mga batan-on makapakurat nga kiling sa India. Ang mga tigdukiduki nianang nasora nagbanabana nga sa matag duha ka minuto dunay usa nga buot motubok sa iyang kinabuhi, ug sa matag napulo ka minuto dunay usa nga molampos.
Sa katuigan sa 1960 dihay mga 60,000 ka tawo ang naghikog sa India, ug “halos katunga kanila nagpanuigong 18 ug 35,” miingon ang magasing India Today. Ang ubang mga biktima sa paghikog maoy ingon ka bata sa diyes anyos. Ang tinuod nga gidaghanon sa mga tawong naghikog sa India wala mahibaloi tungod kay daghang pamilya ang mopalabi sa pagtaho sa mga paghikog ingong mga aksidente aron malikayan ang kaulaw.
Ang India Today miingon nga “kapin sa 2,500 ka batan-on ang naghikog tungod sa dili malipayong mga butang sa gugma” sa panahon sa 1990. Sumala sa mga sikyatrista, ang laing katarongan sa nagatubong gidaghanon sa mga paghikog mao ang pagpiit sa kompetisyon ug sa kahimoan diha sa tunghaan, nga magsugod sa sayo nga edad.
Ang magasin midugang nga “ang mga sikyatrista nagtuo nga ang pagkahugno sa nagadugang nga pamilya dakog kalabotan sa kasubo ug kamingaw nga mohaling sa mga pagbati sa paghikog” sa kabataan. Usa ka sikyatrista, si Dr. S. G. Dastoor, miingon: “Kon ang mga ginikanan mogugol lang unta ug dugang panahon sa ilang mga anak ug sayron kon unsay nakasamok kanila, maluwas unta ang ilang mga kinabuhi. Ako makahunahuna hinoon nga ang mga ginikanan ang nagkinahanglag tambag.”
Ang Bibliya nagdasig sa Kristohanong mga ginikanan sa paggugol ug panahon sa ilang mga anak ug tudloan sila sa mga prinsipyo sa Diyos. (Deuteronomio 6:4-9) Ang Kasulatan usab nagtambag sa mga ginikanan sa dili-pagpasuko sa ilang mga anak kondili agakon sila “diha sa disiplina ug sa pahamatngon ni Jehova.”—Efeso 6:4.
Dugang pa, ang Kristohanong mga batan-on makasagubang sa mga pagpiit karong adlawa pinaagi sa pagpadapat sa maalamong tambag nga makita diha sa Bibliya sa Filipos 4:6, 7, nga nagaingon: “Ayaw kamo pagkabalaka mahitungod sa bisan unsang butang, hinunoa sa tanang butang ipahibalo ninyo sa Diyos ang inyong mga hangyo pinaagi sa pag-ampo ug pagpangamuyo uban ang pagpasalamat; ug ang kalinaw sa Diyos nga molabaw sa tanang pagpanabot magabantay sa inyong mga kasingkasing ug sa inyong mga hunahuna diha kang Kristo Jesus.”