Pagpaniid sa Kalibotan
Usa ka Peligrosong Estilo-sa-Kinabuhi
Gilista sa AHA (American Heart Association) ang daghang hinungdan nga makaamot sa sakit sa kasingkasing. May listahan usab sa mga hinungdan nga makadugang sa sakit. Ning bag-o pa, ang pagkawalay obra sa lawas gilista apil sa dili kaayo peligrosong “mga hinungdan nga makaamot” sa sakit. Apan, sumala pa sa University of California at Berkeley Wellness Letter, “giklasipikar [sa AHA] ang pagkawalay obra sa lawas sa listahan niini sa ‘mga hinungdan nga makaamot’ sa sakit sa kasingkasing diha sa mas peligroso nga kategoriya nga ‘makadugang’ sa sakit.” Ang Wellness Letter midugang nga “giklasipikar niini ang estilo sa kinabuhi nga kanunay lang molingkod nga managsama ra sa hataas nga presyon sa dugo, pagtabako, ug hataas nga kolesterol sa dugo.”
Hugaw nga mga Kamot
Nakita sa dili pa dugayng pagtuon nga ang mayoriya sa mga trabahante sa pag-atiman sa panglawas sa Tinipong Bansa dili manghugas sa ilang mga kamot sa dili pa mohiling sa ilang mga pasyente. Lain pa, sumala sa The Washington Post, “ang ubang pagtuon nagsugyot nga dili ilisan sa mga doktor ang ilang mga guwantis nga angay na gayod ilisan.” Kini nga problema sa walay duhaduha ang nakadugang sa pagkaylap sa sakit. Ang Post nagtaho nga sumala sa The New England Journal of Medicine, ang walay-hugas nga mga kamot taliwala sa mga doktor ug mga nars “mopatin-aw kon nganong ang mga pasyente maimpeksiyon nga mokantidad ug $10 bilyones dolyares sa usa ka tuig sa pagpatambal.”
Kabos nga mga Bata sa Amerika
Ang Tinipong Bansa, nga usa sa labing adunahang mga nasod sa kalibotan, usab maoy pinuy-anan sa pipila ka labing kabos nga mga bata. Sumala sa The New York Times, usa ka pagtuon nga gidumala sa Children’s Defense Fund nakakaplag nga “ang gidaghanon sa mga batang Amerikano nga nagkinabuhi sa kakabos miuswag ug kapin sa 1 ka milyon sulod sa mga tuig sa 1980, nga may sukod sa pag-uswag diha sa 33 ka estado.” Sa 1989 kapin sa 25 porsiento sa mga bata sa mga estado sa Arkansas, Louisiana, New Mexico, ug sa West Virginia nagpuyo diha sa mga pamilya nga may kita nga ubos sa sukod sa kapobrehon nga gitukod sa pederal nga kagamhanan. Ang estado sa Mississippi ang may kinatas-ang ihap, nga may 33.5 porsiento sa tanang mga bata nga nagkinabuhi sa kakabos.
Mga Hungaw Diha sa Koreyo
Gigamit sa mga laboratoryo sa tibuok kalibotan ang mga sistema sa koreyo sa pagpadalag buhing mga mikroorganismo. Adunay nagadakong kabalaka bahin niining batasana tungod kay “regular nga ginahatod ang peligroso kaayong bakterya gikan sa usa ka laboratoryo ngadto sa lain,” sumala pa sa magasing New Scientist. Ang Olandes nga mga tigdukiduki nagpasidaan nga ang nadaot nga mga pakete diha sa koreyo mahimong mopagawas ug mga organismo diha sa kalikopan. Dili pa dugay, gisusi sa usa ka grupo sa mga siyentipiko ang ubay-ubayng mga pakete sa koreyo gikan sa mga laboratoryo sa Australia, Netherlands, Singapore, ug sa Tinipong Bansa. Ilang nakaplagan nga walay mga pakete sa koreyo ang nakaabot sa mga lagda nga gilatid sa Komite sa mga Eksperto sa UN sa Paghatod sa Delikadong mga Butang. Usa ka Olandes nga laboratoryo, nga nagadawat ug usa ka libong mga sampol tuig-tuig, mihimog linaing mga panagana aron masanta ang maong mga aksidente. Bisan pa, kini “nagadawat gihapon ug mga lima ka buak nga culture nga mga ampulya diha sa koreyo tuig-tuig,” miingon ang New Scientist.
Mga Paghikog sa Argentina
Ang Argentina dunay kinatas-ang ihap sa paghikog diha sa mga nasod sa Amerika. Ang mantalaang La Nación miingon nga ‘sumala sa opisyal nga taho, duolan sa 10 porsiento sa tanang gikatahong paghikog sa nasod naglangkit sa mga nagkahingkod nga batan-on ug batan-ong mga hamtong tali sa panuigong 10 ug 22, ug ang kadaghanan mga lalaki.’ Ang Ministri sa Panglawas nag-ingon nga sa matag 30 ka oras usa ka nagkahingkod nga batan-on ang maghikog sa Argentina.