Nganong Mahinamong Nagapaabot sa Bag-ong Kalibotan?
Ang Kataposan sa Kalibotan—Unsa ka Duol?
UNSAY kahulogan sa kataposan niining kalibotana? Kalaglagan ba sa yuta pinaagi sa kalayo, sama sa gitudlo sa pipila ka relihiyon? Dili; sa unsang paagi mahitabo kana, sanglit ang Salmo 104:5 nag-ingon: “Kini dili gayod matarog sa walay kataposan, o hangtod sa kahangtoran?”
Ang tubag mapadayag sa dihang motan-aw kita ug balik sa daghang siglo ngadto sa usa ka kalibotan nga gisundan niini. Kini nahimong daotan ug mialsa sa Diyos, busa “ang kalibotan niadtong panahona gilaglag sa dihang kini gilunopan sa tubig.” Apan sa dihang ang maong kalibotan, nga gilangkoban sa mga langit ug yuta, nalaglag sa Lunop sa mga adlaw ni Noe, ang literal nga langit ug yuta wala mahanaw. Ni nagkahulogan ang kataposan sa kalibotan ug kalayonhong kalaglagan alang sa daghag bituong kalangitan ug sa planetang Yuta.—2 Pedro 3:5, 6; Genesis 6:1-8.
May mga panahong gamiton sa Bibliya ang mga terminong “mga langit” ug “yuta” sa mahulagwayong paagi. Ang “mga langit” mahimong gamiton nga magkahulogan kang Satanas, ang diyos niining kalibotana; ang mga magmamando sa kalibotan ubos sa iyang gahom; ug ang daotang espirituhanong mga puwersa sa langitnong mga dapit—nga ang tanan nagagamit ug demonyohanong impluwensiya ibabaw sa katawhan. (2 Corinto 4:4; Efeso 6:12) Ang “yuta” subsob nga gigamit sa pagpunting sa mga tawo ibabaw sa yuta. (Genesis 11:1; 1 Hari 2:1, 2; 1 Cronicas 16:31; Salmo 96:1) Mao kining mahulagwayong mga langit ug yuta niining daotang kalibotan karon ang giingon sa 2 Pedro 3:7 nga malaglag pinaagig “kalayo.”—Galacia 1:4.
Unya mihatag si Pedro ug malipayong balita nga kining karaang kalibotan pagapulihan sa usa ka bag-ong kalibotan: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug diha niana magapuyo ang pagkamatarong.”—2 Pedro 3:13.
Usa ka Bag-ong Kalibotan nga Walay mga Luha o Kamatayon
Ang gipahayag ni Pedro nga magapuyo ang pagkamatarong diha nianang bag-ong kalibotan maoy makapalipay nga balita, apan ang gidugang ni Juan mahitungod niana mopatugob sa usa ug bug-os nga kalipay! Bahin niana siya miingon sa Pinadayag 21:3, 4: “Uban niana nadungog ko ang makusog nga tingog gikan sa trono nga nag-ingon: ‘Tan-awa! Ang puloy-anan sa Diyos anaa uban sa mga tawo, ug siya magapuyo ipon kanila, ug sila mahimong iyang katawhan. Ug ang Diyos gayod mao ang magpakig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, wala na usab unyay pagminatay ni paghilak ni kasakit. Kay ang unang mga butang nangagi na.’”
Inay laglagon ang yuta pinaagi sa kalayo, katuyoan ni Jehova nga kini pagapuy-an sa walay kataposan: “Kini ang giingon ni Jehova, ang Maglalalang sa mga langit, Siya mao ang matuod nga Diyos, ang Mag-uumol sa yuta ug ang Magbubuhat niana, Siya ang Usa nga malig-ong nagtukod niana, nga wala magbuhat niana alang sa walay kapuslanan, nga nag-umol niana aron pagapuy-an.”—Isaias 45:18.
Ang pagkamatarong magapuyo didto tungod kay walay mga tawong daotan ang makita didto: “Ang mga matul-id magapuyo sa yuta, ug ang mga matarong magpabilin diha niana. Bahin sa mga daotan, sila pagaputlon gikan sa yuta; ug ang mga mabudhion, sila pagalukahon gikan niana.”—Proverbio 2:21, 22.
Ubos sa pagdasig ang salmistang David usab nagpamatuod niini: “Sa dili madugay ang usa nga daotan mawala; ug pagasusihon mo ang iyang dapit, ug siya mawala diha. Apan ang mga maaghop magapanunod sa yuta, ug sila makatagamtam ug tugob nga kalipay tungod sa kadagaya sa pakigdait.”—Salmo 37:10, 11.
Gipamatud-an kini ni Jesus mismo, nag-ingon diha sa iyang Wali sa Bukid: “Malipayon ang mga maaghop, sanglit sila makapanunod sa yuta.” Ingong ilang kagamhanan, kini nga mga maaghop pagapanalanginan ug matarong bag-ong mga langit nga ilang ginaampo: “Paanhia ang imong gingharian. Matuman ang imong kabubut-on, maingon sa langit, ingon man usab sa yuta.”—Mateo 5:5; 6:10.
Ang tugob nga pakigdait nga matagamtaman sa mga molupyo nianang bag-ong kalibotan moabot bisan ngadto sa mga hayop: “Ang lobo mopuyo makadiyut uban sa nating karnero, ug ang leopardo mohigda uban sa nating kanding, ug ang nating baka ug ang nating leyon ug ang maayong pagkapakaon nga mga hayop manag-ipon; ug batang gamay lamang ang magamando kanila. . . . Dili nila pagadaoton o gub-on ang bisan unsa diha sa tibuok kong bukid nga balaan; tungod kay ang yuta mapuno sa kahibalo kang Jehova ingon sa mga tubig nga nagatabon sa dagat.”—Isaias 11:6-9.
Unsa ka Duol?
Kon kiling ka sa pagsalikway niini ingong dili makab-ot nga paglaom, ingong dili katuohan, hunong pag-usab ug palandonga. Dugang pa sa mga bahin sa malangkobong ilhanan sa presensiya ni Kristo Jesus, adunay kronolohiya sa Bibliya nga nagpunting sa 1914 nga mao ang sinugdanan sa iyang presensiya. Gipahibalo sa mga Saksi ni Jehova ang petsa nga 1914 ingong usa ka makahuloganong tuig diha sa kaugmaran sa pagmando sa Gingharian ni Jehova sa yuta, gihimo kana diha sa magasing Watch Tower sa Hulyo 1879. Daghang mga historyador ug mga tigpaniid sa mga kalihokan sa kalibotan nakamatikod nga ang tuig 1914 nagpasulod sa usa ka bug-os lahi ug talagsaong yugto sa tawhanong kasaysayan, ingon sa gipaila sa nag-ubang kahon.
Ang laing hitabo nga gihatag ni Jesus makita diha sa Mateo 24:21, 22: “Kay unya moabot ang dakong kasakitan nga ang ingon wala pa mahitabo sukad sa sinugdan sa kalibotan hangtod karon, dili, dili na gayod kini mahitabo pa. Sa pagkatinuod, gawas kon pamub-on kadtong adlawa, walay unod ang maluwas; apan tungod sa mga pinili kadtong mga adlawa pamub-on.”
Gipaila usab ni Jesus nga kining malangkobong ilhanan matapos sulod sa gitas-on sa kinabuhi sa kaliwatan nga nakakita niini nga nagsugod sa 1914. Sa Mateo 24:32-34, siya miingon: “Karon gikan sa kahoyng igira tun-i ninyo ang usa ka ilustrasyon niining puntoha: Inigpanalingsing na sa linghod nga mga sanga niini ug manahon, kamo mahibalo nga haduol na ang ting-init. Niining paagiha usab kamo, inigkakita ninyo niining tanang mga butanga, hibaloi nga siya haduol na sa mga pultahan. Sa pagkatinuod ako magaingon kaninyo nga sa dili pa mahanaw kining kaliwatana kining tanang mga butanga magakahitabo gayod.”
Ang pagtan-aw niining daang kalibotan—uban sa tanang gubat niini, kagutom, mga sakit, ug kamatayon—nga pagataposon mohatag ug hinungdan sa pagkalipay. Sa pagkakita niini nga pulihan ni Jehova nga Diyos ug usa ka bag-ong kalibotan sa pagkamatarong—motapos sa tanang pagbalata, mga luha, sakit, ug kamatayon—mohatag ug hinungdan sa walay kataposang selebrasyon ug kasadya ug walay kataposang pagdayeg kang Jehova nga Diyos, ang Dakong Maglalalang ug Soberano sa Uniberso.
Uban niining palaaboton sa unahan, dili ikatingala nganong daghan ang may ingon nga kahinam nga moabot dayon ang bag-ong kalibotan ni Jehova sa pagkamatarong ug ilisan kining daang kalibotan nga puno sa kaguol, krimen, sakit, ug kamatayon! Dili ikatingala nga ang ilang kahinam dako kaayo nga sila kiling sa pagbutang ug sayong mga petsa sa pag-abot niini! Apan, karon wala nay nahilaing mga bahin sa ilhanan sa pag-abot niini nga makatental kanato sa pagpalanog ug sayop nga mga alarma. Karon ato nang makita ang bug-os malangkobong ilhanan nga nagakatuman sa paghatag ug malig-ong patukoranan alang sa atong mahinamong pagpaabot sa kataposan niining daotang kalibotan ug pulihan sa bag-ong kalibotan ni Jehova.
[Kahon sa panid 11]
1914—Lisoanang Punto sa Kasaysayan
BISAN human sa ikaduhang gubat sa kalibotan, daghan ang mopunting sa 1914 ingong ang dakong lisoanang punto sa kasaysayan:
“Sa pagkatinuod ang tuig 1914 inay ang Hiroshima ang nagtimaan sa lisoanang punto sa atong panahon.”—René Albrecht-Carrié, The Scientific Monthly, Hulyo 1951.
“Sukad sa 1914, ang tanan nga nahibalo sa kiling sa kalibotan natugaw gayod nianang daw palad ug gimbut-ang-daan nga martsa ngadto sa mas dako pa nga katalagman. Gibati sa daghang tawong maugdang nga wala nay mahimo aron kapugngan pa ang kalaglagan.”—Bertrand Russell, The New York Times Magazine, Septiyembre 27, 1953.
“Ang modernong panahon . . . nagsugod sa 1914, ug walay usa ang nasayod kanus-a o sa unsang paagi kini matapos. . . . Kini mahimong matapos sa pinakyaw nga kalaglagan.”—The Seattle Times, Enero 1, 1959.
“Ang tibuok kalibotan sa pagkatinuod mibuto sa Gubat Kalibotan I ug kita wala gihapon masayod kon ngano. . . . Maayo ang mga palaaboton. Dihay pakigdait ug kauswagan. Unya ang tanan mibuto. Kita wala nay nahimo sukad niadto.”—Dr. Walker Percy, American Medical News, Nobyembre 21, 1977.
“Sa 1914 ang kalibotan nawad-an ug panaghiusa nga wala na maulii sukad niadto. . . . Nahimo kining panahon sa talagsaong kagubot ug kapintasan, latas sa nasodnong mga utlanan ug sa sulod kanila.”—The Economist, London, Agosto 4, 1979.
“Ang tanan mas moarang-arang pa. Mao kini ang kalibotan nga akong nahimugsoan. . . . Sa kalit, wala dahoma, usa ka buntag sa 1914 ang tanan natapos.”—Estadista sa Britanya nga si Harold Macmillan, The New York Times, Nobyembre 23, 1980.
[Hulagway sa panid 10]
Tugob ang pakigdait alang sa tanan diha sa gisaad nga bag-ong kalibotan