Ang Musika Makadaot ba Gayod Kanimo?
PALANDONGA kini: Ikaw dapiton sa usa ka kaila sa trabahoan nga manihapon sa iyang balay. Ikaw modawat. Sa lakat sa kagabhion, daghang makalilisang nga mga butang ang masayran nimo bahin sa imong tagbalay. Siya sadistikog kinaiya, nagpadayag sa kiling sa paghikog, law-ayg sinultihan, ug nagpasiugda sa pagsimba sa Yawa. Karon, makiling ka ba nga mogugol ug laing gabii uban kaniya? “Dili!” motubag ka.
Dugang pa, unsa man kon girekord sa maong kaila ang iyang balikong mga pagtuo ug mga tinamdan niadtong gabhiona ug gihatag kanimo ang teyp? Imo bang iladlad ang imong kaugalingon sa pagpatokar nga balikbalik niana? Lagmit dili.
Bisan pa niana, ang kamatuoran mao nga karong adlawa minilyon nagladlad sa ilang kaugalingon niining paagiha. Ingong sangpotanan, daghan nga mamati niining musikaha nagsagop sa panghunahuna ug kagawian nga gidasig niini.
Unsang musikaha ang gitumong namo? Ang daotang mga impluwensiya makaplagan sa hapit bisan unsang uso sa musika. Kon kaha ang usa mopalabi sa klasikal, jazz, o laing matang sa musika, gikinahanglan ang pagbantay ug kamapilion.
Hinuon, adunay pila ka matang sa musika diin tin-aw nga giapil ang labing ngil-ad nga mga ulohan. Kini linaing hagit. Ang U.S.News & World Report nagbatbat sa pangunang tema sa musikang heavy metal ingong “pagrebelde sa tin-edyer, nga kompleto sa dagkong dosis sa bangis nga sekso ug panalagsang mga paghunahuna sa paghikog.” Si Dr. David Elkind naghisgot bahin sa pila ka grupong rock nga “nagagawing ngil-ad kaayo kon bahin sa law-ayng sinultihan ug kagawian nga nagdaot sa tibuok industriya sa musikang rock.” Sa pila ka dapit ang pila ka plaka ug teyp gisulatan ganig pasidaan bahin sa law-ay nga unod niana.
Ang mga tawo ba naghinobra lang sa pagsanong sa musika nga wala nila hiangayi sa personal, o may tinuod kahang hinungdan sa pagkabalaka? Tukion natog maayo ang pipila sa musikang rock nga karon nagaabot sa dagkong mga seksiyon sa publiko pinaagi sa mga album, mga video sa musika sa telebisyon, ug personal nga mga konsiyerto. Susiha kon sa unsang paagi apektado niana ang katawhan. Unya hukmi sa imong kaugalingon kon kaha ang maong kalingawan dili makadaot o hilo sa hunahuna. Kana ba butang nga ikaw o ang imong pamilya makigsuod o maladlad?