Kinabuhing Minyo—Paghimo Niining Labi Pang Malipayon

Unsay makapalampos sa kaminyoon?

Kansang giya ang mahimong motultol sa kalipay sa kaminyoon?

Sa unsang paagi masulbad ang mga suliran sa komunikasyon?

KAY naimpluwensiyahan sa mga libro nga ilang gibasa mahitungod sa kagawasan sa kababayen-an, si Yasuhiro ug ang iyang hinigugma, si Kayoko, nagsugod sa pagpuyopuyo, nga naghunahuna nga mahimong taposon nila ang ilang relasyon bisan kanus-a. Human lamang sa pagkamabdos ni Kayoko nga sila nagpalegal sa ilang kaminyoon. Apan, si Yasuhiro padayong nagduhaduha sa kahikayan sa pamilya. Sa pagtungha sa mga suliran sa panalapi ug sa pagbati nga sila dili angay sa usag usa, sila nagbulag gayod.

Pipila ka panahon human sa ilang panagbulag, ug wala mahibaloi sa usag usa, si Yasuhiro ug Kayoko nagsugod sa pagtuon sa Bibliya uban sa mga Saksi ni Jehova. Sa wala madugay, nasayran kini sa matag usa ug nakapaniid sa mga kausabang nahimo sa ilang kinabuhi pinaagi sa pagpadapat sa mga prinsipyo sa Bibliya. Sila mihukom nga magminyo pag-usab. Karon, tungod sa ilang diyosnong panglantaw sa kaminyoon, sila andam nga mohimog mga sakripisyo aron sa pagsulbad sa ilang mga suliran.

Unsay nakapalampos sa ilang ikaduhang kaminyoon? Kadto mao ang ilang pagtahod sa Tigpasiugda sa kaminyoon. (Genesis 2:18-24) Ang paggiya nga gihatag sa labing eksperyensiyadong magtatambag sa kaminyoon, si Jehova nga Diyos, mao ang yawi nga magabukas sa ganghaan sa kalipay sa kaminyoon.

Ang Yawi sa Kalipay sa Kaminyoon

Ang mga suliran sa kaminyoon mahimong masulbad ug ang mga kaminyoon maampingan sa dihang ang magtiayon magpadapat sa giingon ni Jesu-Kristo: “‘Kinahanglang higugmaon nimo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong hunahuna.’ Kini mao ang kinadak-an ug ang unang sugo. Ang ikaduha, nga susama niana, mao kini, ‘Kinahanglang higugmaon nimo ang imong silingan sama sa imong kaugalingon.’” (Mateo 22:37-39) Ania ang yawi sa kalipay sa kaminyoon. Ang bana ug asawa kinahanglang mahigugma kang Jehova una magahigugma sa ilang kaugalingon o sa usag usa. Kining maong relasyon mahimong ikatandi sa tulo ka bakokon nga pisi. “Kon ang usa ka tawo modaog batok niadtong nag-inusara, ang duha makasukol kaniya. Ug ang tulo ka bakokon nga pisi dili daling mabugto.”​—Ecclesiastes 4:12.

Sanglit ang gugma sa Diyos nagkahulogan ug pagtuman sa iyang kasugoan, ang bana ug ang asawa kinahanglang magbutang sa iyang kabalaoran ug mga prinsipyo sa tawhanong pamatasan nga una sa ilang kinabuhi. Pinaagi sa pagbuhat niana sila nagahimo ug tulo ka bakokon nga pisi nga ang labing malig-ong lanot mao ang ilang gugma kang Jehova. Ug “ang iyang kasugoan dili mabug-at,” nag-ingon ang 1 Juan 5:3.

Kini motultol sa pag-isip sa kaminyoon ingon nga dumalayong kahikayan. (Malaquias 2:16) Kay may ingon nianang patukoranan sa ilang kaminyoon, ang magtiayon matukmod sa pagsulbad sa mga suliran sa kaminyoon inay motalikod sa mga suliran pinaagi sa pagpakigbulag.

Pagpakitag Gugma sa Imong Kinadul-ang Silingan

Aron makabaton ug malungtarong bugkos uban sa imong kapikas, kinahanglang palamboon nimo ang imong gugma kaniya, ang imong kinadul-ang silingan. Kining gugmaha kinahanglang dili mahakogon. Matikdi giunsa pagdasig sa Bibliya kining prinsipyoha: “Hupti ang samang gugma, sanglit nahiusa diha sa kalag, nga maghupot sa samang hunahuna, nga dili magbuhat sa bisan unsa sa tuyo sa panagbingkil o sa tuyo sa pagpagarbo sa kaugalingon, apan uban sa pagpaubos sa hunahuna isipa ang uban nga labaw kaninyo, nga magtagad, dili lamang sa inyong kaugalingong kahimtang kondili sa mga kahimtang usab sa uban.”​—Filipos 2:2-4.

Tinuod, malisod ang pagbuhat nga dili sa tuyo sa panagbingkil o sa tuyo sa pagpagarbo sa kaugalingon niining mahakogong kalibotan. Kon ang imong kapikas dili mouna sa pagpakitag gugma, ang pagkadili-mahakogon mas lisod pa; apan pinaagi sa pagpaubos, nga magaisip nga ang imong kapikas labaw kanimo, makaplagan nimong mas sayon ang paghunahuna sa kaayohan sa imong kapikas. Ang Bibliya nagtambag kanato sa pagbaton sa panghunahuna nga diha kang Kristo Jesus. Siya gamhanang espirituhanon, apan siya “nagsul-ob sa dagway sa ulipon,” nga nahimong usa ka tawo. Dili lang kana ra, apan sa dinhi pa siya sa yuta, siya “nagpaubos sa iyang kaugalingon ug nahimong masinugtanon bisan hangtod sa kamatayon,” nga naghatag kaayohan bisan ngadto sa mga tawo nga wala modawat kaniya. (Filipos 2:5-8) Pinaagi sa pagpasundayag niining maong tinamdan, nadani ni Jesus ang mga kasingkasing sa daghang magsusupak, ug pinaagi sa pagsundog kang Jesus, nakabuhat usab sa ingon ang iyang mga sumusunod. (Buhat 6:7; 9:1, 2, 17, 18) Ang susama mahimong mahitabo kanimo. Pinaagi sa pag-isip sa imong kapikas nga labaw kanimo ug sa pagtagad sa mga kahimtang sa imong kapikas, mahimong sa hinayhinay madani mo ang iyang kasingkasing.

Apan, ang pag-isip sa imong kapikas nga labaw wala magkinahanglan ug walay-timik nga pagnunot sa asawa sa pagharihari sa bana, ingon sa kahimtang sa Sidlakan. Ang bana ug ang asawa kinahanglang mag-isip sa usag usa nga labaw sa pagkaagi nga ang matag usa andam nga mohimog pagsakripisyo alang sa kapikas. Sa dihang ang magtiayon maghisgot sa ilang mga suliran uban niining maong pagpaubos, magbanaag ug dili mahakogong interes sa usag usa, ug mosunod sa balaang tambag, sila anaa na sa dalan sa kasulbaran sa ilang mga suliran. Atong tagdon karon ang pipila ka tambag sa Diyos.

Himoa Ninyo nga “ang Higdaanan sa Kaminyoon Dili Mahugawan”

Si Jehova, nga maoy nagsugod sa kahikayan sa kaminyoon, adunay detalyadong plano alang sa hustong relasyon tali sa lalaki ug sa iyang asawa. Sa dihang gipangutana kon subay ba sa balaod nga ang lalaki mobulag sa iyang asawa sa bisan unsang katarongan, si Jesu-Kristo nag-ingon: “Ang gihiusa sa Diyos sa tawo dili pagabulagon sila.” Siya nagpakita nga adunay usa lamang ka angayng pasukaranan sa panagbulag ug pagminyo pag-usab nga gitugot pinaagi sa padayong pag-ingon: “Ako nag-ingon kaninyo nga si bisan kinsa nga mobulag sa iyang asawa, gawas kon ang hinungdan mao ang pakighilawas, ug maminyo sa lain siya nakapanapaw.”​—Mateo 19:3-9.

Ang sekso sa gawas sa kaminyoon, bisan kon gihimo sa ngalan sa gugma, dili gayod mahigugmaon, sa bahin sa duha. Usa ka lalaki sa sentro sa Hapon nakigrelasyon sa daghang kababayen-an gawas sa iyang kaminyoon. Ang iyang asawa nahimong madudahon ug mibati nga pakyas. Ang ilang kaminyoon nag-atubang ug kalisdanan. Unya miabot ang adlaw nga ang usa sa iyang mga hinigugma nag-ingon kaniya nga ipahibalo niya ang ilang relasyon ngadto sa iyang asawa ug namugos nga siya makigminyo kaniya. “Ang maong mga relasyon dili maghimo kang bisan kinsa nga malipayon,” siya nahinumdom uban ang pagbasol. Mitunga lamang siya gikan sa yanang human makapasakit sa tanan nga nalangkit. Ang sukdanan sa Bibliya tin-aw niining butanga. “Himoa ninyo ang kaminyoon nga madungganon sa tanan, ug ang higdaanan sa kaminyoon dili mahugawan, kay ang Diyos magahukom sa mga makihilawason ug mga mananapaw.” (Hebreohanon 13:4) Pinaagi sa pagtuman niining sugoa, ang usa makalikay sa mga sakit nga napasa sa pakigsekso, mga kabalaka sa kaminyoon, ug ang kahigwaos sa tinagong relasyon.

Mga Bana, Higugmaa ug Mahala ang Inyong mga Asawa

Ang prinsipyo sa pagkaulo sulod sa pamilya gilaraw usab sa Diyos. “Ang mga asawa kinahanglang magpasakop sa ilang mga bana ingon nga sa Ginoo, tungod kay ang bana mao ang ulo sa asawa maingon nga si Kristo mao ang ulo sa kongregasyon,” nag-ingon ang Efeso 5:22, 23. Ang pagpadapat niining tambaga dili sayon. “Kadto dako kaayong hagit alang kanako,” miangkon si Shoko, kinsa kanhi nangilog sa katungod sa iyang bana sa paghimog kataposang mga desisyon. Kay naghunahunang ang usa ka lalaki kinahanglang mopalit ug balay sa dihang magpanuigon ug duolan sa 30, iyang gipugos ang iyang bana sa pagpalit sa balay nga iyang nakita. Apan, sa dihang iyang nakat-onan ang mga prinsipyo sa Bibliya nga nalangkit, siya misugod sa paglantaw sa iyang bana diha sa lahi nga paagi. Ang daw walay-timik ug dili kinaiya sa lalaki, sa dihang nakita sa hustong panglantaw, maoy masinaboton, mapainubsanon, ug maaghop.

Kining prinsipyoha nagkinahanglan sa mga bana nga makaamgo nga sila nailalom sa hataas nga awtoridad ni Kristo Jesus. (1 Corinto 11:3) Sanglit nailalom sa awtoridad ni Kristo, ang bana kinahanglang maghigugma ug magmahal sa iyang asawa sa samang paagi nga si Jesus nahigugma sa iyang mga sumusunod. (Efeso 5:28-30) Busa, ang Kristohanong bana mahunahunaong magtagad sa mga pagbati, mga pangandoy, ug mga kahuyangan sa iyang asawa sa dili pa mohimog mga desisyon.

“Tinimplahag Asin”

Dihay suliran si Hisako sa pagpakigsulti sa iyang bana. Sa dihang siya mosulay sa paghisgot ug usa ka butang uban kaniya, siya molikay sa panaghisgot pinaagi sa pag-ingon: “Buhata kon unsay imong gusto.” Si Hisako nahinumdom: “Sa akong hunahuna ang kakulang sa kamabination sa akong bahin maoy hinungdan sa among suliran. Tingali maarang-arang kadto kon ako nagsulti nga hinay.” Karon, siya ug ang iyang bana makahisgot sa mga butang nga mapahiyomon. Ang kausaban nahitabo sukad nga gipadapat ni Hisako ang mosunod nga tambag: “Himoa kanunay nga madanihon ang inyong sinultihan, nga tinimplahan ug asin, aron inyong mahibaloan kon unsaon ninyo pagtubag kang bisan kinsa.” (Colosas 4:6) Maingon nga ang pagkaon nga tinimplahag asin mas lamian, ang maayong-pagkahunahuna nga mga pulong nga gilitok nga madanihon sayon nga dawaton. (Proverbio 15:1) Sa pagkatinuod, pinaagi sa pagkamahunahunaon sa imong pagsulti, ang kabingkilan sa kaminyoon sagad masanta.

Oo, mosaler gayod ang paghigugma kang Jehova nga Diyos ug pagtahod sa iyang mga prinsipyo. Ang gugma kang Jehova mopalihok kanimo sa paglantaw sa imong kaminyoon ingon nga dumalayong bugkos ug motabang kanimo nga mahimong determinado sa pag-amping niana. Ang Diyos nagtagana ug maayong mga giya nga motabang kanimo sa pagsagubang sa tanang kabingkilan sa kaminyoon ug sa pagsulbad sa inyong mga suliran, bisan unsa kini ka dagko. Dili, sa daghan pang kahimtang ang diborsiyo dili mao ang ganghaan ngadto sa labi pang malipayong kinabuhi, kondili mao ang pagpadapat sa mga prinsipyo sa Bibliya. Ikaw makabukas nianang maong ganghaan pinaagi sa pag-ugmad sa imong gugma kang Jehova. Nganong dili mokat-on ug dugang mahitungod sa iyang tambag gikan sa labing awtoritatibong giya sa kaminyoon, ang Bibliya?

[Kahon sa panid 9]

Sa Dihang ang Diborsiyo Maoy Kapilian

BISAN kon ang Bibliya nagtugot sa diborsiyo ug pagminyo pag-usab nga ang hinungdan mao ang pakighilawas, ang pagpanapaw dili awtomatikong magtapos sa relasyon tali sa bana ug asawa. Ang inosenteng kapikas adunay kapilian sa pagpakigbulag o dili.​—Mateo 19:9.

Si Yasuko nag-atubang niining maong desisyon. Ang iyang bana nakigpuyo sa iyang babaye. Ang iyang ugangang babaye nagbasol kang Yasuko ug nag-ingon: “Ikaw ang sad-an nga ang akong anak naggawi nga ingon niini.” Walay hunong ang paghilak ni Yasuko. Daghang tawo nagtambag kaniya, apan walay usa nga nagsaway sa pagpangerida sa iyang bana. Unya, ang iyang kaugalingong inahan, nga nagsugod sa pagtuon sa Bibliya, nag-ingon kaniya: “Sa Bibliya, tin-awng giingon nga sayop ang pagpanapaw.” (1 Corinto 6:9) Si Yasuko nahupay kaayo sa pagkasayod nga aduna gihapon ing sukdanan sa maayo ug daotan niining kalibotana karon.

Karon si Yasuko dihay kapilian. Bisan siya naghunahuna sa pagbulag sa iyang bana, iyang nasabtan human sa iyang pagtuon sa Bibliya uban sa mga Saksi ni Jehova nga siya wala usab magbuhat sa iyang katungdanan. Busa siya mihukom sa pagsulay sa pagsulbad sa iyang mga suliran pinaagi sa mga prinsipyo sa Bibliya. Siya misugod sa pagpadapat niana. (Efeso 5:21-23) “Dili kadto sayon,” siya nahinumdom. “Ako padayong nakasinatig pagbalik sa kanhing kinaiya sa makadaghan. Daghang panahon nga ako nag-ampo kang Jehova nga naghilak.” Samtang siya nausab, ang iyang bana sa hinayhinay nausab. Mga lima ka tuig sa ulahi, ang iyang bana mibulag sa iyang babaye. Si Yasuko mihinapos: “Ako nagtuo nga ang pagsugot sa Pulong sa Diyos tinong mapuslanon.”

[Kahon sa panid 11]

Seksuwal nga Pagkadili-angay ug Diborsiyo

DAGHANG magtiayon naghisgot sa seksuwal nga pagkadili-angay ingong ilang katarongan sa diborsiyo. Nga nagpunting kon hain maggikan ang suliran, usa ka libro nga naghisgot bahin sa nagakausab nga kahikayan sa pamilya sa atong adlaw, nga nag-ulohang Sekkushuaritii to Kazoku (Seksuwalidad ug Pamilya), nag-ingon: “Karong adlawa wala magkauyonay ang usay-kapikas nga kahikayan sa kaminyoon ug ang erotomania nga impormasyon sa sekso. Ang bul-og sa impormasyon sa sekso nagtuis sa Eros sa magtiayon ug nagdaot sa ordinaryong pagbati. Dili lang ang pagbaligya sa sekso apan ang pornograpikong mga videoteyp ug komiks nga naghulagway sa mga lawas sa babaye ingong palaliton nagtuis sa tawhanong pagbati ug kasingkasing. Busa, ang mga asawa nag-antos sa samag-panglugos nga paagi sa pagpakigsekso [sa ilang mga bana], ug ang mga bana nga gibalibaran nawad-ag gahom sa pagpakigsekso.”

Ang imoral nga mga publikasyon, mga video, ug mga programa sa TV nagtuis sa sekso. Sila wala magtudlo kon unsay makahatag ug tinuod nga kalipay diha sa kaminyoon. Gidaot usab nila ang pagsalig nga kinahanglang ugmaron sa bana ug asawa aron makabaton ug malamposong kaminyoon. Ang Psychology Today nag-ingon: “Ang pagsalig makapaarang kanimo sa pagtugyan sa imong kinasulorang pagbati ug kahadlok ngadto sa imong kapikas, nga nahibalong iya kanang ampingan. Samtang ang gugma o ang seksuwal nga kahinam mahimong motubo o mokunhod sa lakat sa panahon, nga mithionon, ang pagsalig makanunayon.”

Ang sekso dili maoy pasukaranan sa malamposon nga kinabuhing minyo. Ang usa ka asawa nga nakasagubang ug malisod nga mga suliran sa kaminyoon nag-ingon: “Labawng nakadasig kanako ang mga pulong sa librong Paghimo sa Imong Pamilyahanong Kinabuhi nga Malipayon: ‘Sa kinatibuk-an, kon ang tanang ubang relasyon diha sa kaminyoon maayo, kon adunay gugma, pagtahod, maayong komunikasyon ug pagsinabtanay, nan ang sekso panagsa rang mahimong suliran.’”a

Ang tinuod nga nakapahinabo sa suod personal nga relasyon tali sa mga magtiayon dili mao ang sekso kondili ang gugma. Walay kapuslanan ang seksong walay gugma, apan ang gugma mahimong molungtad bisan walay sekso. Pinaagi sa pagbutang sa sekso diha sa dapit niini, nga dili himoon kini nga sentro sa ilang kinabuhi, ang magtiayon magmalipayon sa ilang panag-uban ug makasulbad sa suliran sa seksuwal nga pagkadili-angay.

[Footnote]

[Hulagway sa panid 10]

Ang pagtahod sa mga prinsipyo sa Bibliya motabang sa magtiayon sa bukas nga komunikasyon