Gikan sa Among mga Magbabasa
Pagkahilo sa Tingga Daghang salamat sa mga artikulo mahitungod sa pagkahilo sa tingga. (Nobyembre 22, 1992) Ang inyong paghisgot sa taas nga presyon sa dugo, sakit sa rinyon, sakit sa tiyan, ug pagsuka—mga sulirang akong ginaantos sa katuigan—nag-aghat nako nga magpahiling alang sa posibleng pagkahilo sa tingga. Ang mga resulta nagpakita ug hilabihang napundo nga tingga. Nanghinaot ako nga ang pagtambal nako magmalamposon.
T. W., Alemanya
Tin-aw nga kamo naghimo ug bug-os nga panukiduki alang sa inyong mga artikulo. Ako nagtrabaho sa usa ka instituto sa panukiduki sa Department of Organic Coatings. Sa among nasod, ang may-tingga nga mga pintura gigamit sa daghang katuigan tungod sa pagsugakod niini sa kadaot sa panahon. Karon ang paggamit niini estriktong gikutohan, apan sumala sa inyong gisulat, ang kapeligrohan sa pagkahilo sa tingga nagpabilin. Kining artikuloha nagtabang kanako sa pagpakita sa akong mga kaubanan nga ang Pagmata! wala lamang magtubag sa relihiyosong mga pangutana apan nagtabang usab sa mga tawo sa pagsulbad sa ilang mga suliran bisan kon sila dili mga magtutuo. Salamat.
A. A., Republikang Czech
Iron Lung Kinahanglan nakong ipahayag ang akong halalom nga pagpabili sa kasinatian ni Laurel Nisbet nga nag-ulohang “Bisan ang ‘Iron Lung’ Dili Makapugong Kaniya sa Pagsangyaw.” (Enero 22, 1993) Pagkamaayo kaayong panig-ingnan sa kaisog, pagtuo, pagkamalahutayon, ug kasibot! Ako adunay lupus, apan ang akong mga suliran daw dili kaayo grabe sa dihang akong hunahunaon ang pag-antos nga gilahutay ni Sister Nisbet ug kon unsa ka dugay.
R. L. H., Tinipong Bansa
Sanglit ako naparalisar ug dili makalakaw, ako nagreklamo nga dili kaayo ko makasangyaw. Karon ako nakaamgo nga kon kining babayhana, nga nagkinabuhi sa usa ka iron lung sulod sa 37 ka tuig, nakasangyaw ug nakahimog mga tinun-an, nan ako usab magmatagbaw kon unsay akong mahimo.
M. L., Italya
Among gipabilhan ang maong mga komento. Hinuon, ang matinumanong panig-ingnan ni Sister Nisbet sa bisan unsang paagi wala magpamenos sa pagpakigbisog sa daghan sa ubang seryosong mga suliran sa panglawas nga daw dili kaayo makapaluya apan nakapahinabo gihapon ug igo-igong pag-antos.—ED.
Tinapay Salamat sa artikulong “Atong Tinapay sa Matag-Adlaw.” (Disyembre 8, 1992) Akong gisulayan ang inyong resipe sa tinapay, ug ako nalipay nga sayon ra diay ang paghimog tinapay ug lamian pa kaayo kini.
M. M., Tinipong Bansa
Ako adunay daghang libro sa pangluto sa estante, apan walay resipe niadtong mga libroha ang nagpatunghag resulta nga sama ka maayo sa inyong resipe. Daghang salamat!
S. H., Alemanya
Paglutos sa Nazi Ako nadasig kaayo sa artikulong “Ang mga Nazi Dili Makapugong Kanamo!” nga gisulat ni Erwin Klose. (Nobyembre 22, 1992) Lahi sa ubang mga kasinatian mahitungod sa mga Nazi nga napatik na, ang estorya ni Erwin Klose giasoy nga may pagkakataw-anan. Usahay dili ako makapugong sa pagkatawa! Ako nadasig sa iyang malipayon ug positibong paagi sa paglantaw sa mga butang.
T. K., Hapon
Mga Kombensiyon sa Rusya Buot ko gayod nga pasalamatan kamo sa artikulong “Ang Unang Internasyonal nga Kombensiyon sa mga Saksi ni Jehova sa Rusya.” (Disyembre 22, 1992) Bisan tuod, usa ako ka dugay nang alagad ni Jehova nga Diyos, kinahanglan nakong dawaton nga ang akong pagpabili sa mga tagana sa Diyos dili ikatandi nianang ilaha sa mga Kristohanon sa Rusya! Ang ekspresyon sa nawong sa igsoong babaye sa dihang nadawat niya ang iyang unang personal nga kopya sa Bibliya nakapaamgo kanako kon unsa ka daghan ang akong nabatonan—ug wala kaayo pabilhi. Ang artikulo mitabang nako sa pagkakita sa mga dapit diin ako kinahanglang mohimo ug mga pagpasibo.
B. T. A., Tinipong Bansa