Gikan sa Among mga Magbabasa

Inhustisya sa Krimen Buot kong ipaambit kaninyo kon sa unsang paagi gigamit ko ang daang isyu sa Pagmata! Ang akong anak nga babaye gitionag-posil sa hold-aper diha sa iyang kotse. Ang kawatan nasentensiyahan, apan bahin sa sumbong sa iyang paggamit ug posil, ang ebidensiya wala dawata. Naguol, gipasulti ako alang sa akong anak nga babaye sa panahon sa pagsentensiya sa tawo. Sayosayo pa niini, nakita ko ang artikulong “Mapuslanon ba ang Krimen?” (Enero 8, 1986) Gigamit ang materyal diha sa kahon nga nag-ulohang “Ang Sistema sa Inhustisya sa Krimen,” gisultihan ko ang korte nga ang “kriminal may kapilian​—sa pagkomiter ug krimen o dili. Ang biktima walay kapilian.” Ang kawatan gibilanggo, nga nakadawat ug kinadak-ang sentensiya.

D. M., Tinipong Bansa

Mapasagarong mga Ginikanan Daghan kaayong salamat kaninyo sa artikulong “Mga Batan-on Nangutana . . . Nganong Dili Magpakitag Dugang Interes Kanako ang Akong mga Ginikanan?” (Nobyembre 8, 1992) Mitulo ang mga luha sa akong mga mata samtang ako nagbasa niini. Sa miaging duha ka bulan, gibati ko nga gipasagdan, busa ako mirebelde. Dako tingali akog kasuko ug kasakit sa sulod. Ang artikulo nagpahunahuna kanako sa nahitabo. Salamat sa pagkamatinagdanon kanamong mga batan-on sa paghatag kanamo niining hinungdanong impormasyon.

N. C., Tinipong Bansa

Ang artikulo nakaabot sa kasingkasing sa akong diyes-anyos nga batang babaye. Ingong nag-inusarang ginikanan, ako naningkamot gayod, apan wala akoy kusog ug pailob kanunay sa pagpakiglabot sa kapit-os nga akong ginasagubang adlaw-adlaw. Human nga gihisgotan ang artikulo uban kaniya, siya mas nakasabot sa akong bation usahay. Kaming duha mihilak, ug iyang naamgohan nga ako siyang gihigugma.

C. L., Tinipong Bansa

Ibabaw sa Uropa Gusto kong pasalamatan kamo sa inyong artikulong “Ngadto sa Ibabaw sa Uropa Pinaagig Tren.” (Disyembre 8, 1992) Kini nakadasig kanako sa pagduaw sa Jungfraujoch, duol sa Interlaken, Switzerland. Sa gihabogong 3,454 metros ibabaw sa lebel sa dagat, labaw pa nakong napabilhan ang katahom sa buhat sa Diyos ug sa kadakoon sa kinaloag-niyebe nga kabukiran.

P. L., Italya

Musika Ako 12-anyos. Ang artikulong “Mga Batan-on Nangutana . . . Unsay Daotan sa Akong Musika?” nakatabang ug dako. (Pebrero 8, 1993) Ako usab dili makapalong sa akong musika, nagapamati pa gani niana samtang ako nagatuon. Ako usab adunay daghang compact disc nga dili kaayo maayo, ug nagkabangi pa ako sa akong mga ginikanan sa daghang higayon tungod niana. Sa dihang akong nabasa kon sa unsang paagi ang pagpamati sa musika nagaimpluwensiya kanako, gibati ko nga daw gidunggab ang akong dughan. Nagapalandong na ako karon sa pagdispatsar sa tanang disc nga adunay dili maayong mga butang. Daghan kaayong salamat kaninyo.

M. H., Hapon

Nakaplagan ko ang artikulo nga talagsaon ug ulohan. Dili katuohan kon sa unsang paagi daghan kaayong batan-on nagpalangkit sa rebelyosong mga awit ug mga estilo sa sinina. Kining mga artikuloha panalipod gayod alang kanamong mga batan-ong Kristohanon.

M. M., Italya

Gipresentar sa artikulo ang musikang rap sa dili gayod paborableng paagi. Matag karon ug unya duyog sa ubang mga batan-on, kami magpatokar ug rap. Tinuod, dunay mga awit nga dili maayog mga pulong. Apan ang paghisgot sa katibuk-an bahin sa musikang rap dili husto.

B. R., Alemanya

Ang artikulo wala mohimog katibuk-ang pagsaway sa rap ingong usa ka matang sa musika. Hinunoa, kini nagpasidaan batok sa pagpakiglangkit sa bisan unsang matang sa musika kansang katibuk-ang mensahe ug espiritu wala makakab-ot sa mga sukdanan sa Bibliya. Ang ebidensiya tin-awng nagpakita nga ang musikang rap dako ug kakulangan niining bahina.​—ED.