Mga Saksi ni Jehova Gilabanan sa Kaso Mahitungod sa Katungod sa Paghupot sa Bata
SI Ingrid Hoffmann nakigbisog aron makabaton ug katungod sa paghupot sa iyang duha ka anak sukad pa sa milabayng lima ka tuig. Usa ka Austriana, siya natawo ug gimatuto ingong Romano Katoliko. Siya naminyo ug isigka-Katoliko, ug nagpahimugso ug anak nga lalaki sa 1980 ug anak nga babaye sa 1982. Apan sa 1983 nagdiborsiyo ang magtiayon; ang duha ka ginikanan nagtinguha sa katungod sa paghupot sa mga anak. Ang amahan misumbong nga ang relihiyon sa inahan—siya nahimong usa ka Saksi ni Jehova—makadaot sa mga bata, maghikaw kanila sa normal, mahimsog nga pagmatuto. Iyang gihisgotan ang mga isyu sama sa pagdumili sa mga Saksi sa pagsaulog sa pila ka pangilin nga komon sa iyang nasod ug ang ilang pagdumili sa pagpaabuno ug dugo.—Buhat 15:28, 29.
Kining daw makataronganong mga argumento wala makapakombinsir. Ang piskaliya ug ang korte sa apelasyon nagsalikway sa mga pangangkon sa amahan ug naghatag sa katungod sa paghupot sa mga anak ngadto sa inahan. Apan, sa Septiyembre 1986, ang Korte Suprema sa Austria nagbali sa desisyon sa ubos nga mga korte. Kini mihukom nga kining maong mga desisyon nagsupak sa Akta sa Relihiyosong Edukasyon sa Austria, usa ka balaod nga nagkinahanglan nga ang mga batang natawo nga Katoliko edukahon ingong Katoliko. Ang korte naghukom usab nga dili alang sa kaayohan sa mga bata ang pagtugot kanila nga matutuon ingong mga Saksi ni Jehova!
Unsay kadangpan ni Ingrid Hoffmann batok sa maong dayag nga pagpihigpihig sa relihiyon? Sa Pebrero 1987 ang iyang kaso gipresentar sa Uropanhong Komisyon sa Tawhanong mga Katungod. Sa Abril 13, 1992, kining maong komisyon, nga nalangkoban sa mga hurado nga naghawas sa lainlaing membro nga nasod sa Uropanhong Konseho, miduso sa kaso ngadto sa Uropanhong Korte sa Tawhanong mga Katungod alang sa bug-os nga husay.
Mipakanaog ug hukom ang korte sa Hunyo 23, 1993. Kini nag-ingon: “Busa ang Uropanhong Korte midawat nga adunay kalainan sa pagtagad ug kanang maong kalainan gipasukad sa relihiyon; kining maong konklusyon gipaluyohan sa tono ug pagkahan-ay sa mga pulong sa mga katarongang sinulat sa Korte Suprema [sa Austria] mahitungod sa praktikal nga mga sangpotanan sa relihiyon sa aplikante. Ang maong kalainan sa pagtagad maoy mapihigon.” [Italiko amoa.] Kini dugang nag-ingon nga ang Korte Suprema “nagtimbangtimbang sa mga kamatuoran nga lahi sa ubos nga mga korte, kang kansang pangatarongan gipaluyohan usab sa sikolohikanhon ekspertong opinyon. Bisan pa sa bisan unsang posibleng kontra-argumento, ang pagpihig nga ilabinang gipasukad sa kalainan sa relihiyon lamang dili dalawaton.”
Pinaagi sa boto nga lima kontra sa upat, ang mga huwes mihukom nga pabor kang Ingrid Hoffmann ug batok sa Austria, nga sa ingon nagpahayag nga ang Austria may pagpihigpihig batok kaniya pinasikad sa iyang relihiyon ug milapas sa iyang katungod sa pagmatuto sa iyang pamilya. Dugang pa, pinaagi sa boto nga walo kontra sa usa, ang mga huwes mihukom sa pagganti kaniya ug salapi ingong danyos.
Kining talagsaong kadaogan alang sa relihiyosong kagawasan nahitabo usa ka bulan human ang laing kadaogan sa mao gihapong korte—ang kaso nga Kokkinakis v. Greece, nga nagpamatuod nga ang Gresya nakalapas sa katungod sa tawo sa pagtudlo sa Pulong sa Diyos sa balay-balay. Ang mga mahigugmaon ug kagawasan sa tibuok kalibotan malipay sa dihang ang maong mga paningkamot sa pagpukgo sa relihiyosong kagawasan dili molampos ug ang personal nga mga katungod sa pagsimba sa Diyos ug pag-atiman ug pamilya sumala sa mga prinsipyo sa Bibliya napanalipdan.