Gikan sa Among mga Magbabasa
Siyensiya Nagsulat ako aron sa pagpahalipay kaninyo mahitungod sa inyong unom-ka-bahin nga seryeng “Siyensiya—Ang Padayong Pagpangita sa Katawhan sa Kamatuoran.” (Abril 8 hangtod sa Hunyo 22, 1993) Ang inyong mga artikulo walay-gidapigan ug matulon-anon. Ingong usa ka siyentipiko mismo, nahingangha ako sa pagkahibalo kon unsa ka dako ang impluwensiya sa Gregong mga pilosopo, sama kang Aristotle, Plato, ug uban pa, sa siyentipikanhong panghunahuna.
O. O., Tinipong Bansa
Sa bahin sayis sa inyong serye (Hunyo 22, 1993), kamo miingon: “Ang pagkadaot sa palibot nga gipahinabo sa siyensiya maoy dako kaayo.” Ang siyensiya dili responsable sa dili hustong paggamit sa namugna niini. Ang mabasol mao ang mga kagamhanan nga nagapadapat sa karaang legal nga mga paagi sa pagdumala sa paggamit sa teknolohiya.
C. C. R., Tinipong Bansa
Ang serye wala mosulay sa pagbasol lamang sa mga siyentipiko tungod sa mga suliran sa kalikopan sa yuta. Sa pagkatinuod, ang nag-unang tudlingpulong tin-awng nag-ingon nga ang siyensiya yanong “mitabang sa pagmugna” sa maong mga suliran. Ang miaging mga artikulo sa serye nagpakita nga ang mga siyentipiko kinahanglang makigbahin sa tulubagon uban sa mga politiko, negosyante, ug mga pumapalit.—ED.
Nahilain Salamat sa sugilanon sa kinabuhi ni Pepita Abernathy, “Usa ka Tugob nga Kinabuhi Bisag Nahilain.” (Pebrero 22, 1993) Kadto nakapahilak kanako. Kanunay akong nalisdan sa pagsangyaw sa mga higala o sa pagbuhat sa teritoryo nga wala kaayoy pagsanong. Apan si Pepita Abernathy nagsangyaw sa lainlaing bahin sa kalibotan bisan kon wala siya mahibalo sa pinulongan! Karon ako may lahi nang tinamdan mahitungod sa buluhatong pagwali.
J. W., Tinipong Bansa
Musika Bag-o lang nakong nahuman pagbasa ang serye sa “Modernong Musika—Dili Makadaot nga Kalingawan?” (Hunyo 8, 1993) Sa dihang ako nagtungha sa hayskul, ako nabihag sa heavy-metal nga musika. Ang akong daotang mga batasan ug maalsahong tinamdan maoy bunga sa mga panghunahuna nga gihulagway niining mangiob, yawan-og-honi nga musika. Apan samtang nagakasuod ako kang Jehova, labaw kong gikapungtan bisan ang honi sa maong musika!
L. K., Tinipong Bansa
Gihatagan ninyo kaming mga batan-on ug mapuslanong tambag nga pinasukad sa nunot-sa-panahon ug kasaligang mga tinubdan. Ang pipila naghunahuna nga dalawaton ang musika kon kini dili maisip nga heavy-metal o rap, bisan pag kana nagdasig sa imoralidad, kapintasan, ug paggamit sa droga. Kining mga artikuloha nagpanghimakak niining sayop nga ideya. Karon kaming tanan nasayod na kon unsaon pagkahimong labi pang mapilion sa dihang nagapili sa among musika.
F. M., Italya
Ang akong anak nga lalaki nga tin-edyer bag-ohay pang napalagpot gikan sa Kristohanong kongregasyon. Gihimo nako ang akong maarangan sa pagpugong kaniya sa pagpaminaw sa rap nga musika—nangatarongan uban kaniya, nagpakita kaniya sa mga prinsipyo sa Bibliya, nagpakig-ambit kaniya sa mga artikulo mahitungod sa ulohan. Apan siya nagpadayon sa tago nga pagpaminaw sa rap, nga mibating kana walay epekto kaniya. Ugaling, gibuhat niya ang daghang daotang mga butang nga gihimaya niining musikaha. Wala pa ako maulii sa akong pagbati gumikan sa pagkapukan sa akong anak. Ako naglaom nga ang tanang Kristohanong ginikanan magpakitag apresasyon niining impormasyona pinaagi sa pagbasa ug pagtuon niana uban sa ilang mga anak.
G. C., Tinipong Bansa
Dili lang kay gipakita ninyo kon unsang matanga sa musika ang kinahanglang likayan, kondili gipaluyohan ninyo ang inyong mga pulong ug dili malalis, apan malumo ug mahigugmaong pangatarongan. Kami mibati nga ang inyong dulot nga tinguha mao ang pagtabang sa mga batan-on sa pagkalagiw gikan niining dunot gayod nga kalibotan.
B. V., Pransiya