Unsa ang Bag-ong Panahon nga Kalihokan?

KINI dili usa ka organisasyon, apan ginatos ka organisasyon ang nagpasiugda sa mga pagtulon-an niini. Kini walay sentral nga pangulo, apan ang mga pilosopo ug mga magtutudlo niini lagmit mokabat sa linibo. Kini walay opisyal nga basahon sa mga doktrina ug mga tinuohan, apan ang mga sumusunod makapalambo sa ilang pagtuo diha sa halos tanan nga publikong librarya sa tibuok kalibotan. Kini walay personal nga diyos nga pagasimbahon, apan kini sagad nagpasiugda sa ideya sa usa ka diyos nga makaplagan sa tanang dapit ug sa bisan diin.

Unsa ba kini? Kini ang Bag-ong Panahon nga kalihokan: usa ka dili-tino nga panagsagol sa relihiyoso, kultural, sosyal, politikanhon, ug siyentipikanhong mga ideolohiya, nga dinuyogan sa pagkaikag sa Sidlakanhong mistisismo, ang paranormal, ang okulto, ug bisan sa pila ka matang sa modernong sikolohiya. Ang panagsagol naglakip sa pagtuo sa astrolohiya, reinkarnasyon, kinabuhi sa gawas sa yuta, ebolusyon, ug kinabuhi luyo sa kamatayon. Ang mga kabalaka sa kalikopan ug panglawas maoy hinungdanon usab nga mga sangkap.

Si bisan kinsa mahimong moanib sa maong kalihokan. Wala ing rituwal sa pag-entra o bawtismo. Ni kinahanglang biyaan sa mga tawo ang relihiyoso nilang mga tinuohan aron masakop niini. Sa laing bahin, daghan ang mayugot nga pagailhon sa ngalang “Bag-ong Panahon” tungod lamang kay sila nagtuo sa pipila sa mga ideyang gituohan sa Bag-ong Panahon nga kalihokan o malingaw sa pipila sa giingong Bag-ong Panahon nga arte o musika.

Ang mga sumusunod talagsa rang magpaila nga sila mga magtutuo sa Bag-ong Panahon. Sa pagkatinuod, ang pamulong “Bag-ong Panahon” gigamit kasagaran sa palaumagian sa balita. Di pa dugay, ang Bag-ong Panahon nga mga libro, mga tindahan, mga seminar, ug mga programa kasagarang naglikay sa termino. Ang Library Journal nagsaysay nga “ang hingaping paghisgot sa radyo, telebisyon ug mantalaan sa hinapos sa katuigang 1980 mimugnag daotang reaksiyon bahin sa daghan pang kaduhaduhaang mga tinuohan ug mga paagi sa Bag-ong Panahon nga pilosopiya (mga UFO, pakigkomunikar sa mga espiritu, mga kristal alang sa pagpang-ayo ug pamalandong, ubp.); kini gipadayag sa kamatuorang ang dagkong mga kompaniyang tigpublikar . . . ug bisan ang Bag-ong Panahon nga mga magpapatik anam-anam nga nagasalikway sa terminong Bag-ong Panahon.” Busa, daghang tawo ang tingali nailalom sa impluwensiya sa Bag-ong Panahon nga ideya nga wala gani makaamgo niini.

Unsay Bag-o Bahin Niini?

Ang Bag-ong Panahon nga kalihokan giisip sa daghan nga usa ka modernong talagsaong hitabo. Sumala kang Propesor Carl Raschke sa University of Denver, ang Bag-ong Panahon nga panghunahuna sa paninugdan maoy “usa ka nabiling dan-ag sa kultura sa kabatan-onan sa katuigang 1960.” Ang ubang tig-analisar nagpunting usab sa katuigang 1960, uban sa mga hippie nga nangitag kagawasan ug kamatuoran, ingong sinugdanan sa Bag-ong Panahon nga kalihokan. Daghang kanhing mga hippie, nga karon anaa sa mga edad nga 40 hangtod 59, nagapangita gihapon nianang idlas nga kamatuoran. Apan ang pagpangita nila dili na ihikling ingon nga kapritso sa mga tin-edyer. Daghan kanila maoy mga propesyonal diha sa madungganong mga natad sa kahibalo, maoy aktibo sa politika, ug giisip na karon nga maalamong mga sakop sa komunidad.

Sa katuigang 1970 ug 1980, gigamit nila ang ilang pangutok ug pinansiyal nga kahinguhaan aron ipadayon ang ilang pagpangita. Ang sangpotanan? Ang sagol nilang mga tinuohan kanat nga gituohan ug gitahod. Ang palaumagian sa balita daling nakapapopular niini, nga misangpot sa kaylap nga pagkahibalo bahin sa Bag-ong Panahon nga pilosopiya.

Sa pagkatinuod, diyutay ra kaayo ang bag-o mahitungod sa Bag-ong Panahon nga mga pagtuo. Pananglitan, ang pilosopiya niini gibase ilabina sa Sidlakanhong mistisismo, nga maoy libolibo ka tuig ang edad. Tagda ang pila lang ka Bag-ong Panahon nga mga ideya.

Ang Bag-ong Panahon nga Paglaom

Kay haduol na kaayo ang tuig 2000, ang ideya bahin sa mas maayong kaugmaon, mas maayong milenyo, nagakabantog. Ang usa ka pangunang pagtuo mao nga ang modernong katilingban sumala sa nasayran nato pagapulihan sa usa ka Utopianhon nga katilingban.a Sumala sa Bag-ong Panahon nga mga magtutudlo, kini mahitabo pinaagi sa bug-os nga pag-usob sa sagad dinawat nga panghunahuna pinaagi sa mistikanhong kahibalong gitago o wala panumbalinga hangtod sa bag-ohay nga katuigan. Sila nag-ingon nga kining bag-ong yugto nga may panaghiusa magpagawas sa tawhanong katakos ug magpasulod sa tibuok-kalibotang espirituwal nga kalinaw.

Kining paglaoma morag gibase sa panguna sa mga panagna sa mga astrologo nga nagpunting sa atong adlaw ingon nga ganghaan tali sa lumalabay nga panahong Pisces ug sa taliabot nga panahong Aquarius. Ang mga manlalaban sa maong teoriya nag-ingon nga ang senyal nga Pisces sa zodiac may negatibong epekto diha sa katawhan sulod na sa halos 2,000 ka tuig. Sila nag-akusar sa Kakristiyanohan ingon nga pangunang mabasol sa paglalang sa materyalistikanhon ug way-kabangkaagan nga katilingban. Giakusar ang Kakristiyanohan sa pagbabag sa pag-uswag sa kamatuoran. Apan karong adlawa kanang kamatuorana giingon nga makaplagan kono diha sa okulto ug mapatin-aw sa umaabot nga panahong Aquarius, ang panahon sa espirituwal nga kalamdagan, ang bag-ong panahon.

Ang mga magtutuo sa Bag-ong Panahon wala magkauyon bahin sa kon kining bag-ong katilingban ipatungha pinaagi sa dili-personal nga gawas-sa-yutang mga puwersa o pinaagi sa paningkamot sa tawo. Usa ka teoriya nag-angkon nga “ang usa ka rasa sa bag-ong matang sa Homo sapiens sa Bag-ong Panahon, nga mogula gikan sa henetikong mga binhing gitanom sa nalamdagan nga utokang mga tawo 3,500 ka tuig kanhi, sa dili madugay mosanay ug magluwas sa kalibotan gikan sa kadalo.”​—The Wall Street Journal, Enero 11, 1989.

Hinuon, kanang paglaom sa usa ka bulawanong panahon, sa Utopia, o sa bag-ong kalibotan, dili bag-o. Ang kasugiran sa halos tanang dagkong kultura naglakip sa paglaom sa umaabot Utopianhong katilingban. Ang Sumerianhon, Gresyanhon, Romanhon, ug Scandinavian nga mga mitolohiya naglakip sa maong pagtuo. Ang Encyclopedia of Religion nag-ingon: “Ang pangandoy sa usa ka utopia diin ang usa mahigawas sa kakabos ug diin ang kalinaw ug kadagaya magahari maoy di-malaksing bahin sa relihiyon sa mga Insek sukad sa una-Ch‘in nga kapanahonan (una pa sa 221 WKP).” Ang labing karaang sagradong basahon, ang Bibliya, naghisgot sa usa ka milenyo sa dihang ang katawhan pagahingpiton, ug ang gubat, krimen, kasakit, ug kamatayon pagawagtangon.​—Pinadayag 21:1-4.

Usa ka Relihiyon Bahin sa Kaugalingon

Diha sa iyang pelikulang Out on a Limb nga kasaysayan sa iyang kaugalingong kinabuhi, ang bantogang artista ug Bag-ong Panahon nga awtor nga si Shirley MacLaine nagtindog sa baybayon nga kusog ang huros sa hangin uban sa mga bukton nga dinupa ug mituwaw: “Ako maoy Diyos! Ako maoy Diyos!” Sama kaniya, daghang magtutuo sa Bag-ong Panahon nagpasiugda sa pagpangita sa usa ka binayawng kaugalingon ug sa ideya bahin sa usa ka diyos sa kahiladman. Sila nagtudlo nga kinahanglan nga pauswagon lang sa mga tawo ang kaamgohan nila sa pagkaplag sa ilang pagkadiyos.

Sa diha nga mahimo na kini, sila nangangkon, ang katinuoran sa panaglambigit sa tanang butang sa uniberso mahimong tin-aw​—ang tanang butang maoy diyos, ug diyos ang tanang butang. Kini dili gayod usa ka bag-ong ideya. Ang karaang mga relihiyon sa Mesopotamia ug Ehipto nagtuo sa pagkadiyos sa mga hayop, tubig, hangin, ug langit. Mas bag-o pa, si Adolf Hitler giingon nga nagdasig sa uban sa pagsagop sa “lig-on, maisogong pagtuo sa Diyos diha sa Kinaiyahan, Diyos diha sa kaugalingon natong katawhan, diha sa atong dulnganan, diha sa atong dugo.”

Ang Bag-ong Panahon nga kultura natuphan sa katitikan, mga seminar, ug mga programa sa pagbansay bahin sa natagong-katakos-sa-kaugalingon ug pagpauswag-sa-kaugalingon. “Ang pagsabot sa akong kahiladmang pagkatawo” maoy popular nga panultihon. Ang mga tawo gidasig nga sulayan ang bisan unsa ug ang tanang butang nga makatabang sa pagpagawas sa kaugalingon nilang mga katakos. Sumala sa pagpahayag niini sa usa ka magsusulat diha sa magasing Wilson Quarterly, “ang pangunang pagtulon-an sa kalihokan mao ‘nga dili hinungdanon kon unsay imong gituohan basta mosaler kini alang kanimo.’”

Si Margot Adler, usa ka manlalaban sa pilosopiya sa Bag-ong Panahon, misaysay nga daghan sa mga babayeng miduyog sa Bag-ong Panahon nga mga kalihokan sa kababayen-an nagbuhat niini “tungod sa mga katarongang personal kaayo. . . . Gidumtan nila ang ilang mga lawas, gidumtan nila ang ilang kaugalingon. Sila moentra niining mga kalihokana nga sa panguna magaingon kanimo, ‘Ikaw ang Diyosa, ikaw talagsaon.’”

Ang magasing New York nagbatbat sa pangagpas sa usa ka grupo sa binayaw nga kaugalingon: “Usa ka babaye mokanta, ‘Kami ang mga magtutudlo sa Bag-ong Banagbanag. Kami ang mga Mahinungdanon.’ Ang ubang mga sumasalmot, nga nagsul-ob ug mga purong sa ulo nga may sungay, mga maskarang may balhibo, ug sihag tag-as nga mga biste, mosayaw agi sa lasang, nga magaagumod ug magkompaskompas, magadaghong ug magaagulo.”

Gipanindot nga Okultismo

Ang pila ka Bag-ong Panahon nga mga ideya nagpasiugda sa usa ka bag-o, gipanindot nga pagtuo sa okulto. Ang pagsimba kang Satanas wala na ilambigit sa okulto diha sa mga hunahuna sa daghang magtutuo sa Bag-ong Panahon. Usa ka magsusulat sa magasing Free Inquiry mipahayag: “Nagakadaghan ang mga tighimo sa barang, nga walay usa kanila ang dunay mga pagtuo nga nagsagop sa Satanismo.”

Usa ka bag-ong surbi sa Alemanya nagpadayag nga may 10,000 ka aktibong barangan nianang nasora. Bisan ang mga bata sa kamalalangon nadani sa okulto. Ang Aleman nga librong Der Griff nach unseren Kindern (Ang Pagdani sa Pagtagad sa Atong Kabataan) nagsaysay nga pinaagi sa “mga cassette sa drama sa kabataan, ang mga bata nagakaanad sa bag-ong dagway sa barangan ingong normal nga babaye nga nagagamit ug salamangka alang sa maayong mga katuyoan.” Ang libro midugang: “Ang pagtagad sa bisan gagmayng mga bata sa ingon madani sa usa ka Bag-ong Panahon nga paagi nga mahimong motultol kanila ngadto sa espiritung mga gahom.”

Diha sa iyang mga libro, gipasiugda ni Shirley MacLaine ang ideya nga ang okulto mao lamay tinagong kahibalo ug ang pagkatinago niini wala magkahulogan nga dili kini kamatuoran. Kining pilosopiyaha nakahaylo sa di-maihap nga katawhan sa pag-eksperimento sa katingalahang mga buhat sa espiritismo, sama sa pagtagna, astrolohiya, telepatiya, ug pagpakigsulti sa mga espiritu. Ang ulahi nailhan sa linibong katuigan ingon nga pagpakigsulti sa espiritu pinaagig pagdiwata. Apan gitawag kining channeling sa mga magtutuo sa pilosopiya sa Bag-ong Panahon. Ang ilang teoriya nangangkon nga ginapili sa mga espiritu sa mga patay ang pila ka tawo aron mahimong agianan nila sa pagpakigsulti sa katawhan.

Kining gituohan nga mga tawong agianan mapunawan kon gusto nila ug makasulti o makasulat sa mga mensahe sa “kalamdagan,” nga gituohan nga naggikan sa mga patay o gikan sa mga linalang nga dili taga-yuta. Ang mga espiritu sa mga patay giisip nga mga batid sa kaalam nga nagahulat sa hustong panahon sa pagkabuhi pag-usab ingong laing linalang. Kasamtangan, sila nagagiya kono sa mga tawo ngadto sa bag-ong panahon.

Daghang magtutuo sa pilosopiya sa Bag-ong Panahon regular nga nagapamati kon unsay ikasulti niining maong mga batid kono pinaagi sa ilang mga agianan. Ug ang mga magtutuo makapili sa mga espiritu nga konsultahon. Lakip niadtong nagasulti kono karong adlawa mao ang mga espiritu ni John Lennon ug ni Elvis Presley, mga dili taga-yuta nga may mga ngalang sama sa Attarro ug Rakorczy, ug ang mitolohikanhong 35,000-anyos nga manggugubat nga taga-Atlantis nga si Ramtha.

Bag-ong Panahon ug Panglawas

Ang nagakadaghang doktor nagtuo nga ang mga pasyente dili lamang tambalan nga samag nagubang mga makina ug ang pagtagad angay ihatag ngadto sa kahimsog sa hunahuna ug sa emosyon sa tawo. Kining paagiha sa pagtambal nailhang holistic o wholistic nga medisina, gikan sa pulong “whole,” ug kini dili gayod konektado sa Bag-ong Panahon nga uso. Bisan pa niana, daghang magtutuo sa pilosopiya sa Bag-ong Panahon sa kamaikagon nagsagop sa holistic nga medisina. Ang librong The Cosmic Self nagsaysay nga bisan wala magsalikway sa kanunay sa naandang paagi sa pagpanambal, gipasiugda sa Bag-ong Panahon nga mga magtutuo ang pagtambal sa pasyente isip tibuok nga tawo, “usa ka buhing linalang nga kompleto sa lawas, hunahuna, ug espiritu.”

Ang Bag-ong Panahon nga mga magtutuo nangangkon nga ang maayong panglawas mahimong hikaplagan sa gawas sa dominyo sa naandang pagpanambal. “Ang dapit diin kadaghanang tawo unang makahibalag sa Bag-ong Panahong mga ideya maoy sa kalibotan sa kapuli nga pagpanambal,” matud sa Britanikong mantalaan nga The Herald. Ug ginasusi ang labing talagsaong mga ideya. Pananglitan, ang Australianong beterinaryong siruhano ug awtor nga si Ian Gawler misugyot nga ang kanser mahimong mamaayo pinaagi sa meditation o pagpalandong. Ang ubang mga paagi sa pagpanambal nga nailado ingong Bag-ong Panahon nga mga paagi naglakip sa pagrekonosir sumala sa mga bituon ug mga planeta, pag-analisar sa sanag nga kinaiya nga ibanaag gikan sa tawo, hipnoterapiya, operasyong dili mogamit ug kutsilyo, ug nangaging-kinabuhi nga terapiya. Kining maong mga paagi sa pagpanambal sagad gipasiugda diha sa linaing mga magasin bahin sa panglawas, mga tambal sa kinaiyahan, mga bitamina, ehersisyo, ug pagkaon.

Bag-ong Panahon ug mga Kristal

Usa ka popular nga paagi sa Bag-ong Panahon nga pagpanambal naglangkit sa paggamit ug mga kristal ug sa mga mahalong bato, sama sa kuwarso, ametista, topacio, rubi, opal, ug esmeralda. Ang Bag-ong Panahong tiggamag alahas nga si Uma Silbey nangangkon: “Sa tibuok kasaysayan makakaplag kag mga pananglitan sa mga kultura nga nagtuo nga ang kuwarso makapauswag sa sikikong enerhiya ug sa mga gahom sa pag-ayo.” Midugang siya: “Ang mga Sumeriano, Maya ug ubang sibilisasyon migamit ug kuwarsong mga kristal alang sa mga katuyoan sa pagpanambal.”

Sa unsang paagi gigamit ang mga kristal? Ang mga terapista pinaagig kristal nangangkon nga ang mga sakit sa lawas ug hunahuna mamaayo pinaagi sa pagpatong sa kuwarso ug ubang mahalong bato sa tinong mga bahin sa lawas. Si Katrina Raphaell, usa ka Bag-ong Panahon nga batid sa kristal, misaysay nga ang mga kristal “ikabutang sa ilalom sa unlan inigkatulog aron madasig ang hamili ug matagnaong mga damgo. Sila magamit sa mga pagpanambal sa paglig-on sa katingad-ang mga emosyon, sa paghupay sa libog nga mga hunahuna ug sa pagtabang sa pag-ayo sa mga kadili-balanse diha sa lawas. Kana makuptan sa panahon sa pagbati aron manganak ug proseso sa pagpanganak alang sa dugang kusog.”

Bag-ong Panahon ug ang Kalikopan

Ang Bag-ong Panahon nga kalihokan maoy “maayo, kini mahunahunaon sa kalikopan, kini ang uso,” kanay giingon sa TSBeat, usa ka Britanikong magasin alang sa mga tin-edyer. Ang aktibong pagsalmot sa pagpasiugda sa pagkaamgo sa ekolohiya ug pagpanalipod sa kalikopan nakaamot sa positibong dagway alang sa Bag-ong Panahon nga kalihokan, ug kining makaayo-sa-kalikopan nga mensahe nakadani ug daghan sa mga pagtulon-an niini. Ugaling, ang Bag-ong Panahon nga mga kabalaka sa kalikopan sagad gipahayag ingong direktang pagsimba sa kinaiyahan, uban sa mga rituwal nga kaamgid sa karaang mga seremonya nga gipahinungod sa diyosang yuta.

Kining modernong kapahayagan sa karaang mistisismo mao ba ang sulbad sa atong mga suliran? Maluwas ba ang planeta pinaagi sa kaalam sa mga barangan ug sa mga dili taga-yuta? Moabot ba gayod ang usa ka bag-ong panahon nga may kalinaw ug kadagaya?

[Footnote]

[Kahon sa panid 6]

Si MacLaine, ang Bag-ong Panahon, ug si Ramtha

“ANG natad nga gawas sa pisikal nga natad maoy tinuod bisan pag dili nato makita o masukod kini pinaagi sa mga terminong maylabot sa gitas-on. Adunay labawng katinuoran kay sa atong ‘gisabot’ naamgohang katinuoran. Kana ang gitawag ang bag-ong panahon sa panghunahuna. Usa ka bag-ong panahon sa kaamgohan. . . .

“Akong giduaw ang giilang mga diwatahan nga nagpaagi sa espiritung mga giya gikan sa kalibotan sa mga espiritu. Naugmad nako ang mga relasyon uban nianang ‘mga espiritung linalang.’ . . . Ang usa mas talagsaon kay sa uban. Ang iyang ngalan maoy . . . Ramtha ang Usang Linamdagan. . . . Siya miingon nga siya nahimong usa ka tawo panahon sa yugtong Atlantis ug nakakab-ot sa bug-os nga kaamgohan nianang kinabuhia. . . . Samtang gitan-aw ko ang mga mata ni Ramtha, nabatian ko nga ako miingon, ‘Ikaw ba mao ang akong igsoon sa pagkatawo nimo sa panahong Atlantis?’

“. . . Mitubod ang mga luha gikan sa iyang mga mata. ‘Oo, minahal ko,’ matud niya, ‘ug ikaw mao ang akong igsoong lalaki.’”

Si MacLaine mipadayon sa pag-ingon: “Ang punto sa iyang espirituwal nga pagtudlo alang kanako mao ang pagpasa sa kamatuoran nga kami maoy Diyos. Takos kami sa kahibalo sama kaniya.”​—Dancing in the Light, nga sinulat ni Shirley MacLaine.

Itandi ang Genesis 3:5, diin ang Serpente (Satanas) sa kabakakon miingon kang Eva: “Ang Diyos nahibalo nga sa adlaw mismo sa inyong pagkaon gikan niini ang inyong mga mata mangabuka ug kamo mahisama sa Diyos, nga nahibalo sa maayo ug daotan.” Kadtong matinguhaon sa pag-uyon sa Diyos kinahanglang molikay sa pagpakiglangkit sa daotan ug malimbongong espiritung mga linalang. Ang Kasugoan ni Moises miingon: “Ayaw kamo pagliso sa mga diwatahan, ug ayaw kamo pagkonsulta sa propesyonal nga mga mananagna sa mga hitabo, aron kamo dili mahimong hugaw tungod kanila. Ako mao si Jehova nga inyong Diyos.”​—Levitico 19:31.

[Kahon sa panid 9]

“Laing Droga sa Katilingban nga Mahiligon ug Droga”?

“ANG Bag-ong Panahon nga kalihokan​—ang labing bag-ong amot sa hataas natong kasaysayan sa katingad-ang espirituwal nga mga uso ug mga tambal sa tanang sakit​—nagdapit sa nagkasagol nga pagtamay ug sa masuk-anon nga pagpasidaan. Dili lang ang pagkadaot sa pagkabalaan kondili ang dayag nga komersiyalismo niini nagdasig sa katahap sa dako kaayong relihiyosong panikas. . . .

“Ang Bag-ong Panahon nga kalihokan nagtinguha sa pagsagol sa pamalandong, positibong paghunahuna, pagpanambal pinasukad sa pagtuo, . . . mistisismo, yoga, mga tambal nga tubig, acupuncture, insenso, astrolohiya, sikolohiya ni Jung, biofeedback, extrasensory perception, espirituwalismo, . . . ang teoriya sa ebolusyon, Reichian nga seksuwal nga terapiya, karaang mga mitolohiya, . . . panghipno, ug daghan pang laing teknik nga gilaraw aron mapauswag ang kaamgohan, nga naglakip sa mga elementong hinulaman gikan sa mga tradisyon sa dagkong mga relihiyon. . . .

“Ang Bag-ong Panahon nga mga kapuli sa relihiyon mohupay sa tanlag inay motulisok niini. Ang panguna nilang pagtulon-an mao nga dili hinungdanon kon unsay imong gituohan basta mosaler kini alang kanimo. ‘Kini tinuod kon motuo ka niini’: panultihon sa Bag-ong Panahon. . . .

“Ang pangutana maoy dili kon ang Bag-ong Panahon nga mga terapiya mosaler ba gayod kondili kon ang relihiyon angay bang himoon na lang nga terapiya. Kon magatanyag lang kini sa espirituwal nga pagbati sa kalalim, ang relihiyon nahimong laing droga sa katilingban nga mahiligon ug droga.”​—“Ang Bag-ong Panahon nga Kalihokan: Walay Kahago, Walay Kamatuoran, Walay mga Solusyon, mga Nota Bahin sa Gnostisismo​—Bahin V,” ni Christopher Lasch, Watson Propesor sa Kasaysayan sa University of Rochester, New York, T.B.A.

[Hulagway sa panid 7]

Bag-ong Panahon nga mga kulto nag-eksperimento sa astrolohiya, telepatiya, pamalandong, ug sa mga kristal, apil sa uban pang mga butang

[Hulagway sa panid 8]

Ang Bag-ong Panahon nga mga paagi sa pagtambal naglakip sa paggamit ug mga kristal