Ang Kawalay Kalihokan sa Pisikal Makapatay Kanimo
MAO kanay mensahe sa American Heart Association ug sa Heart and Stroke Foundation sa Canada. Sa daghang dekada, ang pagsigarilyo, alta presyon, ug taas nga sukod sa kolesterol diha sa dugo gilista ingong mao lamang ang pangunang mapugngan nga hinungdan sa mga risgo sa sakit sa kasingkasing. Apan niadtong 1992 laing hinungdan ang gidugang—ang kawalay kalihokan sa pisikal. Tingali kini mao ang labing sayon nga mapugngan.
“Himoa lang kana ug himoa kana sa regular,” matud pa ni Dr. John Duncan sa Dallas, Texas. Ikasubo, ang kadaghanan dili regular nga mag-ehersisyo. “Adunay sayop nga pagtuo sa Amerika nga tungod kay nauso ang pisikal nga pagpahimsog sa miaging tulo o upat ka tuig, mas daghang Amerikano ang nakigbahin sa pisikal nga kalihokan,” miingon si Tom McMillen, luyoluyong tsirman sa President’s Council on Physical Fitness and Sports. “Dili kana tinuod. Duolan sa 250,000 ka kamatayon tuig-tuig ang maipasangil sa kawalay buhat.”
“Karon 22 porsiento lamang sa mga Amerikano ang aktibo sa pisikal sa sukod nga girekomendar alang sa kaayohan sa panglawas,” sumala pa ni Dr. Walter R. Dowdle, temporaryong direktor sa U.S. Centers for Disease Control. “Usa ka tibuok nasod nga paningkamot ang gikinahanglan aron masuklan ang hataas nga sukod sa kawalay buhat sa lawas sa Tinipong Bansa.”
Ang hago nga buhat dili kinahanglan, sumala sa gitaho sa Medical Post sa Canada: “Ang bag-ong panukiduki nagpamatuod nga bisan ang hinay nga paglakawlakaw mohatag ug mga kaayohan sa panglawas.” Si Dr. Anthony Graham, punoan sa cardiology sa Wellesley Hospital sa Toronto, Canada, nagpatin-aw: “Ang atong gihisgotan dinhi maoy mahitungod sa kasagarang pisikal nga buhat, usa ka matang sa regular nga buhat nga mahimong ingon ka kasarangan sa pagtrabaho sa imong tanaman sa daghang beses matag semana sa regular nga paagi, o makadiyot nga mga paglakawlakaw. . . . Karon among nasayran nga bisan kining kalihokana nga himoon sa regular nga paagi makakunhod sa risgo sa sakit sa kasingkasing. Aduna gayoy pipila ka paagi nga ang tanan makaehersisyo.”
Si Dr. Russell Pate sa University of South Carolina miuyon, nga nag-ingon: “Kombinsido ako nga milyon-milyon sa publiko nagtuo nga kon dili sila makaapil sa usa ka spa ug magpalabay didto ug lima ka oras matag semana, nan wala silay mahimo labot sa pisikal nga pag-ehersisyo. Ako nagtuo nga kinahanglang opisyal nato nga iduso ang ideya nga ang usa ka maayo, komportable nga paglakawlakaw libot sa bloke human manihapon maoy usa ka maayong butang nga himoon.”
Sanglit bisan ang kasarangang pisikal nga kalihokan makaayo sa imong panglawas, ikaw ba makahimo sa regular sa paglakaw o sa pagsaka kanaog sa hagdan inay mosakay sa elibetor? Nganong dili iparada ang imong kotse nga may igong gilay-on sa imong adtoan, tingali sa groseriya, ug lakwon ang nahibilin nga distansiya? “Ang bisan unsa mas maayo na lang kay sa wala,” miingon si Dr. Robert E. Leach, tsirman sa ortopediko sa Boston University Medical Center.