Gikan sa Among mga Magbabasa
Mga Selebrasyon Human mabasa ang seryeng “Mga Selebrasyon—Kon Nganong ang Pipila ka Bata Dili Mosaulog Niini” sa Nobyembre 22, 1993, nga Pagmata!, nakaplagan nako ang mga luha sa kalipay nga midagayday sa akong nawong. Gimatuto ako ingong usa sa mga Saksi ni Jehova ug mibati sama sa daghang kabataan nga gikutlo. Buot kong komendahan ang atong mga batan-on tungod sa pagkahimong maayong mga panig-ingnan! Ingong ginikanan, nadasig ako sa pagkasayod nga daghang bata ang buot mopahimuot kang Jehova sa ingon ka linghod nga mga panuigon.
T. K., Tinipong Bansa
Ako nuybe anyos, ug wala gayod ako masayod nga ang Halloween hilabihan kangil-ad. Wala nako batia nga adunay wala nako masinati nga butang nga tilinguhaon.
A. C., Tinipong Bansa
Sa bata pa ako, naghinamhinam ako sa Pasko ug Easter. Apan karon ako nakasabot nga kini maoy paganong mga pista ug nga walay kapuslanan ang pagsunod lamang sa tradisyon. Ang pagpatin-aw nga gihatag kompleto ug malukpanon.
S. L. P., Alemanya
Gimatuto ako ingong usa ka Saksi sugod sa nag-edad pa ako ug 6 anyos ug karon anaa na ako sa sayong bahin sa 30 anyos. Daghang tawo nagtuo nga ang akong igsoong lalaki, akong igsoong mga babaye, ug ako hinikawan. Akong gisaysay kanila nga kami nakadawat ug mga regalo sa tibuok tuig ug nga ang among mga ginikanan libreng naghatag sa ilang panahon ug sa ilang kaugalingon. Duyog kaming naghimo sa mga butang. Ang akong papa matinumanon usab sa pagdumala sa among senemana nga pagtuon sa Bibliya sa pamilya. Kadto mao ang kinamaayohang espirituwal nga gasa! Wala gayod ako masuko nga wala magsaulog sa mga selebrasyon.
D. Y., Tinipong Bansa
Ako 14 anyos ug ako makasanong sa kon unsay giingon. Mapasalamaton ako nga kining artikuloha gipatik. Kini nagpalig-on kanako sa pagkasayod nga ang ubang mga batan-on nagbarog dapig sa kamatuoran.
C. A., Tinipong Bansa
Wala nako batia nga adunay nawala kanako pinaagi sa dili pagsaulog sa mga selebrasyon. Ang akong pamilya naghatag kanakog mga regalo ug naghatag kanakog salapi sa dihang magkinahanglan ako niana. May pipila usab ako sa samang mga dulaan nga gipahimuslan sa mga bata nga sama nakog edad [12].
L. C., Tinipong Bansa
Kining artikuloha mao ang tubag sa daghang pag-ampo. Dili gayod nimo masabtan ang mga kalipay ug mga kahadlok sa pagmatuto sa bata hangtod nga aduna ka nay duha ka mata nga napuno sa luha nga nagtutok kanimo nga daw nangutana kon nganong adunay nagbugalbugal kaniya. Ang among anak babaye nagsugod sa kindergarten niining tuiga, ug bisan gitan-aw namo ang mga impormasyon mahitungod sa mga selebrasyon, nalisdan pa gihapon siya. Nag-ampo kami matag gabii aron siya mahimong lig-on ug maisogon sa tunghaan. Unya miabot ang mga artikulo sa Pagmata! Makabasa siya sama sa anaa sa siyete-grado, busa ang ako lang gibuhat mao ang paghatag niana kaniya aron basahon. Nagmaisogon ang iyang kasingkasing samtang siya nagbasa sa mga pahayag sa ubang kabataan ug nakakita sa ilang mga hulagway. Sa misunod nga adlaw mipahimutang siya ug kopya sa iyang magtutudlo.
G. M., Tinipong Bansa
Ang pipila ka bata sa tunghaan nagbiaybiay kanako tungod kay wala ako mosaulog sa mga selebrasyon, busa mihimo akog kopya sa magasin ug naghatag ug pipila kanila. Seguro ako nga mohunong ang pagyagayaga tungod kay karon nasayod na sila nga ako dili hinikawan.
K. H., Tinipong Bansa
Biyahe Pinaagig Bus Sa dihang ako magmagul-anon, usahay magtahi ako ug maminaw sa akong mga cassette nga Pagmata! Natingala gayod ako kon sa unsang paagi ang artikulong “Usa ka Biyahe Pinaagig Bus Ngadto sa Sentro sa Australia” naglipay kanako. (Hunyo 8, 1993) Morag didto ako, nga nakig-ambit sa mga kalipay ug kahinam nga napahimuslan niining maong mga magpapanaw. Daghan kaayong salamat.
A. W., Tinipong Bansa