Giihap na ang mga Adlaw sa Satanismo
GILALANG ni Jehova nga Diyos si Adan ug Eva, gibutang sila diha sa usa ka paraisong tanaman, ug gisugo sila sa pagdaghan ug pun-on ang yuta sa matarong nga mga anak. Sila mao ang moatiman sa tanaman, ugmaron ug galamon kini, ug mabuhi nga walay kataposan, ang tanan may usa lamang ka sayon nga kondisyon: ‘Dili ka magakaon sa bunga sa usa ka kahoy nga anaa taliwala sa tanaman. Kon mokaon ka niana, ikaw mamatay.’—Genesis 1:27, 28; 2:8, 9, 15-17; Isaias 45:18.
Usa ka gamhanang manulonda mirebelde batok sa Diyos ug nahimong Satanas, nga nagkahulogang “Magsusupak,” tungod kay buot niyang ilogon ang pagmando. Buot niya nga siya ang simbahon sa tawhanong kaliwatan. Iyang giimpluwensiyahan si Eva sa pagkaon sa gidiling bunga, kinsa miingon nga kini maayong kan-on ug nga siya dili mamatay kondili mahisama sa Diyos, makahimo sa paghukom alang sa iyang kaugalingon kon unsa ang maayo ug kon unsa ang daotan. Ang una niyang desisyon daotan; siya mihukom nga ang pagkaon sa gidiling bunga maayo. Si Eva mikaon, gihatagan si Adan sa bunga ug siya mikaon, ug silang duha sa kataposan namatay. Busa si Adan nagdala sa sala ug kamatayon diha sa ilang kaliwat, nga mamatay sukad niadto. (Genesis 3:1-6; Roma 5:12) Ang unang tawhanong paris mipili sa pagsunod kang Satanas ug nahimong unang mga kabig sa pagsimba kang Satanas. Hangtod karong adlawa, minilyon ang mihukom nga ang relihiyon niadtong orihinal nga mga ginikanan maayo gihapon alang kanila. “Kon kamo padayong nagapresentar sa inyong kaugalingon kang bisan kinsa ingong mga ulipon sa pagsugot kaniya, kamo mga ulipon niya tungod kay kamo nagasugot kaniya.”—Roma 6:16; Juan 17:15, 16; 1 Juan 5:19.
Gipahayag ni Jehova ang silot nga kamatayon kang Satanas sa kataposan, apan gitugotan siya nga mabuhi sulod sa usa ka panahon. Kini naghatag kang Satanas ug higayon aron pamatud-an ang iyang hagit, nga ang Diyos dili makabutang ug mga tawo sa yuta kinsa magmaunongon Kaniya ilalom sa pagsulay—usa ka hagit nga madulaon kaayong gilarawan ug gitubag ang isyu nga pabor sa kiliran ni Jehova diha sa unang duha ka kapitulo sa basahon sa Bibliya nga Job. Ilalom sa mabangis ug mapintas nga pag-atake ni Satanas, si Job mismo mipili sa pagpabiling maunongon sa Diyos, sa ingon nagpamatuod kang Satanas nga usa ka bakakon. (Genesis 3:15; Exodo 9:16; Job 42:7) Girekord usab sa Hebreohanon kapitulo 11 ang hataas nga listahan sa mga Saksi nga mibarog sa kiliran ni Jehova sa isyu bahin sa pagkasoberano sa uniberso.
Si Kristo Jesus mao ang iladong usa kinsa sa tanang panahon mihatag ug bug-os nga tubag alang sa kiliran ni Jehova bahin sa dakong isyu sa pagkasoberano sa uniberso ug sa pagkamaunongon sa tawo ngadto sa Diyos. Kini maoy usa ka malaglagong kapildihan ni Satanas. Bug-os nga gidumilian ni Jesus ang gitanyag ni Satanas nga ihatag kaniya ang pagmando sa tibuok kalibotan baylo sa usa lamang ka buhat sa pagsimba kang Satanas. Malig-on usab nga giantos ni Jesus ang makalilisang nga pagsulay samtang siya namatay diha sa kahoy sa pagsakit. Iyang gidaog si Satanas ug ang kalibotan ni Satanas, nga naghatag kanatog usa ka hingpit nga panig-ingnan nga pagasundogon.—Mateo 4:8-10; 27:50; Juan 16:33; Hebreohanon 5:7-10; 1 Pedro 2:21.
Tungod sa makuyaw nga mga panahon nga atong gikinabuhian, daw si Satanas labi pang nagakalig-on ug nga ang Satanismo mismo nagkadaghan. Ang basahon sa Bibliya nga Pinadayag, hinunoa, naglarawan ug usa ka lahi kaayo nga hulagway sa kapitulo 12, mga bersikulo 7-9, 12:
“Miulbo ang gubat sa langit: Si Miguel [Kristo Jesus] ug ang iyang mga anghel nakiggubat sa dragon, ug ang dragon ug ang mga anghel niini nakiggubat apan kini wala makadaog, ni may dapit pang nakaplagan alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, kinsa nagapahisalaag sa tibuok gipuy-ang yuta; siya gitambog sa yuta, ug ang iyang mga anghel gitambog uban kaniya. Gumikan niini panagsaya, kamong mga langit ug kamong mga nagapuyo niini! Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.”
Ang mga Adlaw sa Paraisong Yuta Walay Kataposan!
“Kay nahibalo nga siya may mubo nga yugto sa panahon,” gipakusgan ni Satanas ang iyang demonyohanong kalihokan niining “kataposang mga adlaw.” (Santiago 5:1-3) Bisan pa adunay paglaom niining malisod nga mga panahon. Ang Pinadayag 21:1, 3-5 nagbutyag kon unsa kini: “Nakita ko ang usa ka bag-ong langit ug usa ka bag-ong yuta; kay ang kanhing langit ug ang kanhing yuta nahanaw na man, ug ang dagat wala na. Niana nadungog ko ang usa ka kusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.’ Ug ang Usa nga naglingkod sa trono miingon: ‘Tan-awa! Ginabag-o ko ang tanang butang.’ Usab, siya nagaingon: ‘Isulat, tungod kay kining mga pulonga kasaligan ug matuod.’”
Busa, si Kristo Jesus magmando sulod sa usa ka libo ka tuig, nga sa maong panahon pagatumanon ni Jehova ang iyang orihinal nga katuyoan sa paglalang sa yuta ug sa pagbutang sa katawhan diha niana. (Pinadayag 20:1, 2, 6) Imong mahinumdoman nga ang katawhan sa sinugdan gisugo sa pagpuno sa yuta uban sa matarong nga mga anak, sa pag-atiman sa yuta, galamon ang mga tanom ug mga mananap niini, magpuyo sa kalinaw, ug maghigugmaay sa usag usa. Ang katumanan sa maong katuyoan gipalangan aron hatagag panahon si Satanas sa pagsulay sa pagpamatuod sa iyang hagit nga mapahilayo niya ang tanang tawo gikan sa pagsimba kang Jehova nga Diyos. Napaulipon niya ang binilyong mga tawo, apan siya napakyas sa kaso sa pipila ka minilyong mga maghuhupot sa integridad.—Roma 6:16.
Sa panahon sa pagpasig-uli, ang kaluoy ni Jehova pinaagi ni Kristo Jesus moabot bisan ngadto sa lubnganan sa paghatag ug higayon sa bilyonbilyong nangamatay sa milabayng libolibong katuigan ug walay kataposang kinabuhi diha sa usa ka paraisong yuta: “Ayaw kahibulong niini, tungod kay ang takna nagasingabot diin kadtong tanan nga anaa sa handomanang mga lubnganan makadungog sa iyang tingog ug managpanggula, kadtong mga nagbuhat ug maayong mga butang ngadto sa pagkabanhaw sa kinabuhi, kadtong mga nagbuhat ug ngil-ad nga mga butang ngadto sa pagkabanhaw sa paghukom.”—Juan 5:28, 29.
Ang bisan kinsa nga modumili unya sa pagpahiuyon sa matarong nga palibot nianang bag-ong yuta dili magpabilin sa paghugaw o pagdaot niini, sa mga tanom ug sa mga mananap niini, sa pakigdait sa katawhan, o sa matuod nga pagsimba kang Jehova nga Diyos. Ang Salmo 37:10, 11, 29 nagpamatuod niini: “Sa dili madugay, ug ang daotan mangawala; ug pagasusihon mo sa dakong kakugi ang iyang dapit, ug siya mawala diha. Apan ang mga maaghop mismo magapanunod sa yuta, ug sila makakaplag ug tumang kalipay tungod sa kadagaya sa pakigdait. Ang mga matarong magapanunod sa yuta, ug sila magapuyo niana sa walay kataposan.”
Ang Miqueas 4:2-4 nagsaad ug matuod nga pakigdait ug kasegurohan: “Daghang nasod moadto gayod ug moingon: ‘Umari kamo, ug mangadto kita sa bukid ni Jehova ug ngadto sa balay sa Diyos ni Jacob; ug siya magatudlo kanato sa iyang mga dalan, ug kita magalakaw sa iyang mga alagianan.’ Kay ang kasugoan mogula gikan sa Sion, ug ang pulong ni Jehova gikan sa Jerusalem. Ug siya magahukom taliwala sa daghang katawhan, ug magatul-id sa mga butang maylabot sa kusganong mga nasod sa halayo. Ug ilang himoon ang ilang mga pinuti nga mga lipya sa daro ug ang ilang mga bangkaw himoon nga mga galab. Sila dili na mobakyaw sa espada, nasod batok sa laing nasod, ni makakat-on pa sila sa gubat. Ug sila manglingkod, ang matag usa ilalom sa iyang parras ug ilalom sa iyang kahoy nga igos, ug walay magahadlok kanila; kay ang baba ni Jehova sa mga panon ang nagsulti niini.”
Kini nga kalinaw modangat usab diha sa mga mananap, ingon sa gisulti sa Oseas 2:18: “Niadtong adlawa himoon ko [Jehova] ang usa ka tugon alang kanila uban sa mga mananap sa kapatagan ug sa mga langgam sa kalangitan ug sa nanagkamang nga mga linalang sa yuta, ug akong pagabunggoon ang mga busogan sa pana ug espada ug pahunongon ko ang gubat gikan sa yuta, ug pahigdaon ko sila sa kasegurohan.” Ang Ezekiel 34:25 naghisgot usab bahin sa usa ka pakigtugon nga wala na unyay bisan unsang “makuyaw nga mapintas nga mananap.”
Dugang pa, ang Isaias 11:6-9 nagasaad ug kalinaw tali sa mga mananap diha sa Paraiso: “Ang lobo mopuyo sa makadiyut uban sa nating karnero, ug uban sa nating kanding ang leopardo mohigda, ug ang nating baka ug ang nating leyon ug ang maayong pagkapakaon nga mananap manag-ipon; ug usa ka gamayng bata maoy magamando kanila. Ug ang baka ug ang oso managsibsib; ug ang ilang mga nati manag-ipon sa paglubog. Ug bisan ang leyon mosibsib sa kompay sama sa torong baka. Ug ang batang masuso magadula sa lungag sa kobra; ug ang bata nga linutas mokuot sa langob sa halas nga bahion. Dili nila pagadaoton ni pagagub-on ang tibuok ko nga bukid nga balaan; tungod kay ang yuta tinong mapuno sa kahibalo kang Jehova ingon sa mga tubig nga nagatabon sa dagat.”
Ang maaghop magapanunod sa yuta. Ilang atimanon ang hangin, ang tubig, ug ang yuta. Ang mga tuboran ug mga sapa sa tubig magabasa sa uga nga yuta. Ang kalasangan magatabon sa kabukiran nga nahawan tungod sa hakog nga ganansiya. Ang mga kakahoyan molambo ug ang mga disyerto kaniadto mamulak sama sa mga rosas. Ang mga buta makakita, ang mga bungol makadungog, ang mga bakol makalakaw, ug ang mga amang makasulti. (Isaias 35:1-7) Ang pagpabili sa mahimayaong kabukiran ug kawalogan ni Jehova ug ang iyang mga baybayon nga nag-ulang sa nagabul-og nga kadagatan ug kalaworan dili gayod motugot nga motungha pag-usab ang kadalo sa tawo sa pagdaot sa yuta. Siyempre, masayon unya sa hingpit nga katawhan, nga puno sa mga bunga sa espiritu ni Jehova, nga magkalipay, ang matag usa, sa paghigugma sa iyang silingan sama sa iyang kaugalingon, ug labaw sa tanan sa paghigugma kang Jehova sa tibuok niyang kasingkasing, kalag, hunahuna, ug kusog. Oo, ang tanang katawhan magapamunga sa espirituwal nga mga bunga sa “gugma, kangaya, pakigdait, taas-nga-pailob, kalulot, pagkamaayo, pagtuo, kalumo, pagpugong-sa-kaugalingon.”—Galacia 5:22, 23.
Imposibleng Mahitabo?
Sa pagkakaron ang uban sa mga magbabasa tingali moingon, ‘Daw imposibleng mahitabo kanang tanan.’ Apan, dili, daotan na kaayo ang kahimtang karon nga ipadayon pa sa paglungtad. Kita ania sa panahon nga gitawag sa Bibliya nga “ang kataposang mga adlaw.” Tan-awa ang palibot, ug imong makita nga tinuod kana. “Sa kataposang mga adlaw,” ang Pulong sa Diyos nag-ingon, “moabot ang makuyaw nga mga panahong lisod sagubangon. Kay ang mga tawo unya maoy mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos, managbaton ug dagway sa diyosnong pagkamahinalaron apan nagapanghimakak sa gahom niini; ug gikan niini nila magpahilayo ka. Apan ang mga tawo nga tuman-kadaotan ug mga impostor mosamot pa kangil-ad, nagapahisalaag ug ginapahisalaag.”—2 Timoteo 3:1-5, 13.
Bisan uban niining tin-aw nga paghulagway sa atong mga panahon, daghan gihapon ang nagabiaybiay. Kana usab madahom. Ang ilang pagbiaybiay mismo maoy usa ka bahin nga mohaom sa sumbanan sa pamatuod nga kita ania na sa kataposang mga adlaw: “Sa ulahing mga adlaw adunay mangabot nga mga mabiaybiayon uban sa ilang mga pagbiaybiay, nga magapadayon sumala sa kaugalingon nilang mga tinguha ug manag-ingon: ‘Asa na man kining gisaad nga pagkaanaa niya? Tan-awa, sukad sa adlaw nga ang atong mga katigulangan nahikatulog sa kamatayon, ang tanang butang nagapadayon nga mao ra gayod sukad sa sinugdan sa kalalangan.’ . . . Ang mga langit ug ang yuta nga mao karon gikatagana alang sa kalayo ug gikagahin sa adlaw sa paghukom ug sa kalaglagan sa mga tawong dili-diyosnon. . . . Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini nila magapuyo ang pagkamatarong.”—2 Pedro 3:3, 4, 7, 13.
Si Jehova nagsaad nga, diha sa iyang bag-ong kalibotan sa pagkamatarong, kining daotang sistema sa kalibotan ni Satanas dili na gayod motungha sa hunahuna: “Ania ako nagahimog bag-ong mga langit ug usa ka bag-ong yuta; ug ang unang mga butang dili na pagahinumdoman, ni motungha pa sa kasingkasing. Apan managkalipay kamo, ug managmaya sa walay kataposan tungod sa akong ginahimo.” (Isaias 65:17, 18) Giihap na ang mga adlaw sa Satanismo, ug sa pag-abot sa panahon sa Diyos, si Satanas mismo pagalaglagon sa walay kataposan.—Pinadayag 20:1-3, 7-10.
Sa pagkatinuod, ang maayong mga kahimtang nga moabot diha sa Paraiso nga yuta mahitabo gayod; gilantaw ni Jehova ang presenteng mga kahimtang niining daang sistema ilalom ni Satanas nga daotan kaayo nga ipadayon pa.
[Hulagway sa panid 10]
Ang maayong mga kahimtang nga moabot diha sa Paraiso nga yuta mahitabo gayod