“Sa Usa ka Dapit Human sa Lain mga Kamatay”

NIANANG mga pulonga sa itaas, nga makita sa Lucas 21:11, ang pagdaghan sa mga kamatay gihisgotan ingong usa sa mga bahin sa ilhanan sa kataposang mga adlaw. Diha sa Pinadayag 6:8, kadto nga mga kamatay gihulagway daan sa pagdagan sa luspad nga kabayo, ang ikaupat nga kabayo sa Pinadayag kapitulo 6. Ang kolumnista nga si Lawrence Hall nagpresentar sa mga pangunang bahin sa usa ka bag-ong libro ni Andrew Nikiforuk nga nag-ulohang The Fourth Horseman: A Short History of Epidemics, Plagues, Famine and Other Scourges. Kini makita diha sa lindog ni Hall sa Star-Ledger, Pebrero 25, 1994 sa Newark, New Jersey. Mga kinutlo gikan sa lindog ang mosunod.

“Ang Ikaupat nga magkakabayo sa Apokalipsis kusog nga nagdagan niining makuyaw nga mga panahon. Ang katawhan nameligro sa daghang paagi​—bisan pa sa tanang talagsaon, bag-ong mga teknolohiya ug mga kauswagan sa mga siyensiya sa medisina. Daghang antibiyotiko, nga gidayeg niadto ingong milagrosong mga medisina, wala nay puwersa sa grabe ka gamhanang mga kagaw karong adlawa. . . .

“‘Bisag ang . . . mga medisina ug mga bakuna mahimong mohatag ug mini nga pasalig sa pagkaepektibo, ang kamatay magpadayon sa pagpahinumdom sa katawhan nga ang siyensiya sa medisina nagbakbak pa, ug dili pa makahibalo mangilo’ . . . Ako walay tuyo nga hadlokon kamo, apan ang sambingay sa Ikaupat nga Magkakabayo tinuod gayod. Ang tesis nagkadaghan na usab. Ang virus sa AIDS nagpadayon sa paghunos sa mga kinabuhi sa libolibo matag tuig sa tibuok globo . . . Ang ubang mga sakit sama sa tipos, dipteria, kolera, anthrax o sakit sa hayop ug malaria nagahulgag kapeligrohan​—sa dakong kahadlok sa mga propesyonal sa panglawas ug sa publiko sa katibuk-an. . . .

“Ang matag yugto sa kasaysayan sa katawhan nagpatunghag bag-ong mga sakit. . . . Sa panahon sa Renaissance dihay sipilis, ang buti nadala sa Amerika ni Columbus, ug nameligro na usab kita sa AIDS karon. . . . Bisan pa, adunay nanungha nga bag-ong mga hampak ug mga epidemiya samtang ang katawhan nagakapildi sa gubat niini batok sa mga mikrobiyo. . . . Ang gidaghanon sa mga tawo nga may depektoso nga sistema sa imyunidad nagakadaghan.” Si Nikiforuk usab nag-ingon nga “‘usa sa dakong kabakakan sa ika-20ng siglo [mao] nga ang mga antibiyotiko, mga bakuna ug mga doktor makaluwas kanato gikan sa kamatay. . . .

“‘Bisan pag unsay atong paningkamot, dili nato mabuntog ang gamhanan kaayong mga kagaw, hiphipi ang Magkakabayo o ayawg balebaleha ang dili-mabag-o nga paglungtad sa kamatay sa kasaysayan.’”