Mga Batan-on Nangutana . . .

Komosta na man ang Bahin sa mga “Class Trip”?

“MAKAPAHULAY ka ug tuon.” “Makakita pod ka ug butang nga bag-o nga lahi sa naandan.” “Makaila nimog maayo ang imong mga klasmet.”

Mao kini ang giingon sa tulo ka batan-ong Aleman kon nganong gusto nila ang mga class trip. Ang maong mga panaw popular kaayo sa mga batan-on sa tibuok kalibotan.

Hinuon, dili lamang mga estudyante ang adunay taas ug pagtamod sa mga class trip. “Ang maayong pagkaorganisar nga class trip tinuod nga mapuslanon sa usa ka batan-on, nga magpadako sa iyang panglantaw ug makatabang kaniya sa pagbarog sa kaugalingon,” matud pa sa usa ka magtutudlo. “Dugang pa, ang relasyon sa magtutudlo ug sa klase mapalig-on.” Walay duhaduha nga ang mabinantayong mga magtutudlo ug maayog batasang mga estudyante mahimong magkausa sa paghimo sa class trip nga edukasyonal ug makalilipay.

Bisan pa, adunay daghang butang ang nalangkit nga angay tagdon sa Kristohanong mga batan-on ug sa ilang mga ginikanan. Pananglitan, sa Alemanya ug sa ubang kayutaan sa Uropa, ang mga estudyanteng lalaki ug babaye kasagarang magkauban sa pagbiyahe sa tagdugay nga mga class trip. Sagad nga nalangkit niini ang paggugol ug tibuok gabii nga pagkatulog nga layo sa balay. Kasagaran moresulta kini ug problema. Ang 14-anyos nga si Anna-Laura nahinumdom: “Human sa pipila ka adlaw nga biyahe, ang mga butang dili na makontrolar. Bisan sa gabii kami walay kalinaw ug kahilom. Kadaghanan sa klase migawi sa hinakog ug walay-konsiderasyong paagi.”

Nan, unsa ang angay nimong himoon kon hatagan ka ug higayon sa pag-uban sa class trip?

Pagkuwenta sa Bili

Sa Lucas 14:28, si Jesu-Kristo miingon: “Kinsa kaninyo nga buot motukod ug tore nga dili una molingkod ug kuwentahon ang gasto, aron tan-awon kon siya aduna bay igo sa paghuman niini?” Sa dili ka pa ug ang imong mga ginikanan modesisyon kon ang class trip ba alang kanimo, timbanga ug maayo kon unsay nalangkit. Aniay pipila ka pangutana nga angay tagdon:

Asa ka makaabot? Usa man kini ka adlaw nga pagduaw sa usa ka museo sa duol o mas dugay nga biyahe nga mogugol ug tibuok gabii nga pagkatulog adunay dakong kalainan. Dugang pa, kon ang imong mga ginikanan ang mobayad, gusto nilang modesisyon kon sila makaabot ba sa gastos.

Unsang programa ang naplano? Kon organisado kaayo ang matag adlaw nga adunay maayo ug makaiikag nga mga kalihokan, makahupot kini sa klase nga puliki ug magpamenos sa kapeligrohan nga dunay mahitabong dili maayo. Busa susihag maayo ang eskedyul sa programa una modesisyon bahin sa class trip. Ang pagduaw sa mga museo o pag-uban sa field trip bahin sa pagtuon sa kasaysayan sa kinaiyahan mahimong edukasyonal. Apan ang pag-eksperimento sa Yoga ug Asiatikong mga relihiyon​—sama sa giplano sa usa ka class trip​—dili gayod angay alang sa usa ka Kristohanon.​—1 Corinto 10:21.

Aduna bay maayo ug mapinadayonong pagdumala? Usa ka 15-anyos nga Kristohanong dalagita nga ginganlag Julia nahinumdom: “Kauban ako sa usa ka klase nga maayo kaayog pamatasan, busa si Mama ug Papa misugot sa akong pag-uban sa biyahe. Gibantayan kamig maayo sa mga magtutudlo.” Bisan pa, ang maong pagbantay talagsa ra karong mga adlawa. Sama sa giangkon sa usa ka Alemang magtutudlo, ang maayo ug kasaligang pagbantay “dili gayod garantisado.” Sa pagkamatuod, nangandak ang usa ka batan-on human sa class trip: “Sa dihang nailad namo ang among duha ka magtutudlo, gihimo na namo ang among gusto.”

Ang pipila ka estudyante mohimog kasamok bisan pag gihimo na sa mga magtutudlo ang ilang maarangan sa pagkontrolar sa ilang paggawi. Usa ka magtutudlo kanhi nahinumdom: “Ang mga batan-on nakakitag mamugnaong mga paagi sa pagpayuhot ug makahubog nga ilimnon, busa kawang lang ang pagrikesa sa ilang mga kuwarto. Akong naamgohan nga daghan na kaayo silag nainom sa dihang nagsuka ang usa sa mga babaye.” Tataw, mahimong lisod kaayong mapaneguro nga ang biyahe madumalag maayo. Apan mahimo kang makalikay sa tumang kabalaka ug kaulawan kon ikaw ug ang imong mga ginikanan mohimog maampingong pagsusi kon unsa ang gihimong kahikayan alang sa pagdumala. Ang Proverbio 22:3 nag-ingon: “Ang tawong maalamon makakita sa daotan, ug magatago sa iyang kaugalingon, apan ang walay kasinatian molabay ug magaantos sa silot.”

Unsay kasagarang pagsanong sa imong mga kauban sa tunghaan sa mga pahamatngon sa inyong mga magtutudlo? Kini mohatag kanimo ug maayong ideya kon sa unsang paagi sila mogawi sa biyahe sa eskuylahan. Gikataho, nga gipamubo sa usa ka hayskul sa Alemanya ang ilang tulo-ka-adlaw nga class trip tungod kay wala tagda sa badlongong mga estudyante ang “tin-aw ug mapailobong mga pahimangno” sa mga magtutudlo.

Usa ka dalagitang Aleman nga ginganlag Stephanie tigkuyog sa maong mga biyahe sa nangagi ug tungod sa iyang kasinatian nagsugyot nga ipangutana sa imong kaugalingon ang mosunod nga mga pangutana: ‘Ang ako bang mga kauban sa klase may igong kabuot sa pagpaminaw sa mga magtutudlo? Naningkamot ba ang tunghaan nga maampingan ang maayong dungog? Duna bay igong kalig-on ang mga magtutudlo aron makahatag ug hustong pagpanguna? Ang mga batan-on ba nagasubay sa hustong tawhanong paggawi? Sila ba moinom ug makahubog nga ilimnon ug nagdroga?’ Tinuod, miangkon si Stephanie nga “anaa ra kanimo ingong usa ka tawo kon dali ka nga madala o dili.” Apan unsaon nimo pag-ampo kang Jehova nga ‘dili ka dad-on sa pagsulay’ ug unya tuyoon nimo pagbutang ang imong kaugalingon sa makapakompromiso nga situwasyon?​—Mateo 6:13.

Busa ang 17-anyos nga si Petra wala mokuyog sa class trip. “Nahibalo ako kon unsa ang paggawi sa akong mga klasmet,” siya miingon. “Nalantaw na nako nga mabutang gayod sa tinuod nga pagsulay ang akong tanlag sa mga kahimtang nga nalangkit ang alkohol ug sekso. Ingon sa nahitabo, gihuboan sa lima ka lalaki ang usa ka babaye ug gikuhaan siyag mga letrato, nga sa ulahi gipasapasa sa mga estudyante.”

Tahoron ba kaha ang imong relihiyosong pagtuo? Pananglitan, ang batan-ong si Timon, miingon: “Kasagaran adunay pagsaulog sa komplianyo, nga lisod likayan.” Ingong usa sa mga Saksi ni Jehova, siya midumili sa pag-apil sa maong mga selebrasyon.a Tahoron ba sa imong mga magtutudlo ug mga klasmet ang imong panglantaw kon pananglit ang selebrasyong sama niana mahimong bahin sa class trip?

Unsang matanga sa panag-uban nga ikaw maladlad? Ang mga Kristohanon nahibalo nga gihukman sa Diyos ang pagpanigarilyo, paggamit ug mga droga, dili hustong paggamit sa alkohol, o pakigsekso nga wala pay kasal. (1 Corinto 6:9, 10; 2 Corinto 7:1) Mao kanay hinungdan kon nganong maalamong likayan ang mga batan-on nga nagabuhat niining mga butanga. (1 Corinto 15:33) Ang Proverbio 13:20 nagpasidaan: “Siya nga nakig-uban sa mga buang magaantos tungod niana.” Sa panahon sa class trip, mogugol ka ug mas daghang panahon kay sa kasagaran uban niining mga batan-ona, ug kini maoy sa usa ka relaks nga palibot. Kini ang giingon sa batan-ong si Andreas: “Sa panahon sa class trip, maladlad ka sa tanang oras sa espiritu sa kalibotan, uban sa tanang kalibotanong musika ug malaw-ayng panag-estoryahay.”

Lain pang hinungdan mao nga mobati ka dayon ug kamingaw sa dihang mahilayo sa panimalay. Ang mga class trip nagapukaw ug daghang panagtratohay sa tin-edyer. Aduna bay kapeligrohan nga makatrato ka sa usa ka dili magtutuo? Ang 1 Corinto 10:12 nagpasidaan: “Siya nga nagahunahunang siya nagabarog pabantaya nga dili siya matumba.” Ug bisan pa kon ikaw may igong kalig-on sa pagsukol sa tentasyon, ang imo bang pagkuyog sa maong biyahe makapandol sa ubang Kristohanong mga batan-on?​—Itandi ang 1 Corinto 8:7-13; 10:28, 29.

Ang 14-anyos nga si Yvonne wala mouban sa usa ka class trip aron mag-ski. Siya misaysay: “Gugolon ko ang tibuok semana nga ako walay laing kauban kondili ang kalibotanong mga batan-on ug mga magtutudlo. Dugang pa niana, ang pag-ubanay sa akong mga igsoon, ang buluhatong pagsangyaw, ug ang mga tigom​—kining mga butanga ang akong masal-angan gayod. Ang laing katarongan mao ang paggawi sa kadaghanang batan-on sa dihang walay magbantay kanila.”

Bug-os nga Pahimut-i ang Diyos

Sanglit ang mga class trip sa kasagaran wala man gayoy kalabotan sa relihiyon, politika, o ubang kalihokan nga gidili sa mga Kristohanon, ang usa ka estudyante ug ang iyang mga ginikanan kinahanglang modesisyon kon ang mao bang biyahe angay. (Itandi ang Isaias 2:4; Pinadayag 18:4.) Lainlain ang mga kahimtang ug mga sirkumstansiya gikan sa usa ka dapit ngadto sa lain ug gikan sa usa ka klase ngadto sa lain; busa, mahimong makaatubang ang mga Kristohanon sa usa ka dapit ug mga problema nga lahi kay sa ubang dapit.

“Ang akong inahan sinati sa mga batan-on sa akong klase ug nakaila sa magtutudlo ingong responsabli. Mao nga ang class trip malamposon,” miingon si Stephan. “Apan sa dihang mas dako na ako ug nagkahiduol na ang kataposang class trip, ang pangutana kon ako ba mokuyog lahi na kaayo.” Ngano? Siya nagpadayon: “Tulo ka tuig lamang ang miagi, ang akong mga kauban sa klase maayong ikauban ug talahoron. Apan ang mga droga ug imoralidad nahimo nang bahin sa ilang adlaw-adlaw nga kinabuhi. Busa wala ako mouban sa biyahe. Nagkaatol, ang kataposang biyahe wala taposa.”

Apan, sa kataposan ikaw ug ang imong mga ginikanan kinahanglang motimbangtimbang sa tanang nalangkit nga mga butang ug mohimog inyong kaugalingong desisyon. Paneguroa nga, bisan unsay inyong desisyon, ang inyong tumong mao ang “magalakaw nga takos kang Jehova sa katuyoan nga makapahimuot kaniya sa bug-os.”​—Colosas 1:10.

[Footnote]

[Hulagway sa panid 25]

Unsang matanga sa pag-ubanay nga maladlad ka kon mouban ka sa usa ka tibuok gabii nga class trip?