Gikan sa Among mga Magbabasa

Panglimbong sa Siyensiya? Ang inyong dili pa dugayng artikulong “Ang mga Siyentipiko Naglimbong sa Publiko” (Enero 8, 1994) nakaabot sa akong pagtagad. Ang nalangkit nga mga siyentipiko mopatim-aw nga nakahimog diyutayng sayop nga ilang gitul-id sa ulahi. Ingon niini angayng molihok ang siyensiya, apan ang ulohan sa inyong artikulo nagsugyot nga daw kini usa ka kasal-anan. Ang gidudahan nga bagulbagol misangpot nga iya sa usa ka asno, apan kanang butanga walay kalabotan sa pagkatinuod sa ubang mga kaplag sama sa iladong “Lucy” nga kalabera. Kami nahibalo nga kining matanga sa mga linalang naglungtad.

M. P., Tinipong Bansa

Wala namo ipasabot nga ang mga siyentipiko nga nalangkit niining partikular nga diskoberiya kinabubut-on nga limbongan. Sa pagkatinuod, gikutlo namo si Dr. Moyà mismo ug giila ang iyang pagkaprangka. Ang hitabo gigamit sa pag-ilustrar sa paagi nga ang kamatuoran sa siyensiya sagad gisakripisyo alang sa personal, politikal, ug nasodnong mga interes. Tinuod, ang katuohang mga espisimen sa fossil nakaplagan. Apan walay gayoy bisan unsang pamatuod nga kining mga linalanga mao gayod ang mga kagikan sa katawhan. Si “Lucy,” pananglitan, adunay usa ka utok nga un-tersiya ang gidak-on sa utok sa tawo. Tin-aw nga kadto maoy usa lamang ka nawala na karon nga mga espisye sa aliwas.​—ED.

Pagkagiyan Salamat kaayo kaninyo sa serye nga “Pagkagiyan​—Unsay Nagpaluyo Niini?” (Abril 22, 1994) Gibasa nako kaduha ang mga artikulo gikan sa sinugdan hangtod sa kataposan. Abi ninyo, ako may sakit nga nalangkit sa pagkaon. Daw gibati ko nga miarang-arang human nga nagpatambal sa usa ka klinika, apan ako makigbisog gihapon. Napalig-on sa artikulo ang akong desisyon.

T. S., Alemanya

Ako usa ka giyanon sa droga ug alkohol kaniadto. Ang tambag nga inyong gihatag tukma gayod. Ako nadasig usab pinaagi sa pag-ila nga ang pagkagiyan maoy usa ka espirituwal nga babag, sanglit ang usa ka giyanon dili mahimong bug-os nga mahinlo sa panan-aw sa atong Maglalalang.

M. G., Pransiya

Unom ka tuig ug tunga kanhi, ako namatyan ug anak nga lalaki tungod sa pagkagiyan sa cocaine. Sanglit gibati ko ang maong kasakit ug nakalahutay, andam na ako sa pag-atubang sa akong pagkagiyan sa pagkaon. Kay nagdako diha sa usa ka alkoholikong pamilya, ako nakakat-on sa paggamit sa pagkaon sa paglingaw sa akong kaugalingon ug sa paglikay sa pag-atubang sa kasakit. Gisulayan ko ang pagdiyeta, nga nakawang lamang. Hinunoa, ang dugang nga pagtagamtam sa kataposan sa gugma ni Jehova human sa 20 ka tuig ingong usa ka Kristohanon nahimong usa ka dakong tabang. Salamat, salamat sa inyong mga artikulo.

S. E., Tinipong Bansa

Nabag-o nga Kriminal Buot ko nga pasalamatan kamog dako alang sa artikulong “Akong Pagpuga Paingon sa Kamatuoran.” (Pebrero 8, 1994) Ako 24 anyos, ug lakip niadtong bitayonon diha sa Washington State Penitentiary. Kining artikuloha aplikado gayod kanako ug nagpalihok kanako sa pagtinguha sa pagbuhat sa kon unsa ang matarong sa panan-aw ni Jehova. Si Brian Garner nakatandog gayod sa akong kasingkasing.

J. B., Tinipong Bansa

Ako maoy usa ka priso sa bilanggoan sa Missouri ug nadasig sa desisyon ni Gn. Garner sa pagsurender sa iyang kaugalingon sa mga awtoridad human makakat-on sa kamatuoran. Kini nagpakita sa epekto sa inyong organisasyon diha sa mga tawo nga may bukas nga hunahuna ug maayog kasingkasing. Sayon nga makita nga ang matuod nga kagawasan moabot lamang pinaagi sa pagpakitag pagtuo sa Diyos.

W. B., Tinipong Bansa

Usa ka tuig pa lang ang miagi nga nakadispalko ako ug salapi sa kompaniya nga akong gitrabahoan. Nangawat akog gatosan ka libong yen, usa ka butang nga walay bisan kinsa ang makahunahuna nga himoon sa usa ka 20-anyos nga dalagita! Ugaling, ako nagtuon sa Bibliya uban sa mga Saksi ni Jehova, ug ang akong tanlag misugod sa pagtulisok kanako. Busa giuli ko ang salapi ug misugid sa tanan ngadto sa nagadumala. Ug bisag gisulti ang masakit nga mga pulong, walay dugang aksiyon ang gihimo. Ako mapasalamaton kaayo niini nga artikulo, kay kini nakatabang kanako sa pag-amgo sa makausa pa kon unsa ka dako ang kaluoy ni Jehova.

S. M., Hapon