Kanus-a ba Matapos ang Trahedya?

KANUS-A ba matapos ang pagkabiktima sa mga bata sa pangdagit, pang-abuso, pagpahimulos, ug kasagaran sa daotang impluwensiya sa ilang mga isigkaingon? Panalipdan ba sila sa dugang pagpatuman sa balaod ug sa mas mapig-otong mga silot alang sa mga krimen nga gibuhat batok sa kabataan? Ang dugang mga programa sa serbisyo sosyal sa pagtagana ug pagkaon, balay, ug edukasyon magtapos ba sa pag-abuso ug paglayas? Ang pagtudlog mas maayong mga katakos sa komunikasyon sa mga ginikanan nga may pagmahal sa ilang mga anak motabang ba sa mga ginikanan sa pagpukgo sa mga panghanduraw sa kalalim nga maghaylo sa ilang mga anak paingon sa makadaot nga mga palibot?

Bisan pag makatabang tingali kanang mga lakanga, gawas kon mawagtang ang lintunganayng hinungdan sa maong mga trahedya, ang mga bata magpabilin nga maladlad sa tumang pag-antos. Sumala sa usa ka batan-on, ang bisan unsang lakang sa pagsulbad sa suliran sa layas nga mga bata nga dili magsanta sa pag-abuso o pagpasagad diha sa panimalay maoy lagmit dili kaayo epektibo, sanglit nahimo na ang kadaot.

Ang Lintunganayng Hinungdan

Unsa ba ang hinungdan niining tanang suliran? Sa unsang paagi mawagtang kini sila? Ang Bibliya nagpatin-aw nga ang yunit sa pamilya ginaatake sa dili-makitang daotang espiritung mga linalang, si Satanas ug ang iyang mga demonyo, nga nagkalipay sa kabangisan, seksuwal nga pagpanghimulos, ug kahiwian. (Genesis 6:​1-6; Efeso 6:12) Sa dihang si Jesus dinhi sa yuta, ang mga bata giatake sa maong mga demonyo. Usa ka batang lalaki gipaantos sa pagkirigkirig ug pagkaitsa ngadto sa kalayo.​—Marcos 9:​20-22.

Bisan sa mga siglo sa wala pa si Jesus sa yuta, ang mga demonyo nagkalipay sa pagpaantos ug pagsunog hangtod mamatay sa mga bata nga gihalad sa mangil-ad nga paganong mga diyosdiyos, sama kang Baal, Kemos, ug Molok. (1 Hari 11:7; 2 Hari 3:​26, 27; Salmo 106:​37, 38; Jeremias 19:5; 32:35) Busa, karong adlawa, niining kalibotana nga nagakahimong mas ug mas daotan, dili angay ikatingala nga puntingon sa mga demonyo ang mga bata aron mag-antos diha sa mga kamot sa masinugtanong mga tawong ahente nga nagpaagom sa mga batan-on sa kaulawan, sakit, ug kamatayon. Ang mga mamumuhat sa maong makalilisang nga mga krimen sagad masibahan diha sa ilang kaisipan sa pornograpiya, nga mohaling sa hiwi nilang mga buhat.

Ang pangaghat nga gigamit sa mga demonyo diha sa katawhan misamot sa atong panahon, kay ang Bibliya nagtawag niining yugtoa sa kasaysayan nga “ang kataposang mga adlaw” sa presenteng daotang sistema sa mga butang. Kini mitagna nga kini maoy “makuyaw nga mga panahong lisod sagubangon.” Labaw pa karon kay sukad masukad, ang impluwensiya sa mga demonyo mitultol sa mga tawo sa pagpabanaag sa pagkadaotan niining tuman-kadaotan nga espiritung mga linalang. Ang Bibliya nagtagna nga ang mga tawo sa atong adlaw maoy mabangis, walay pagpugong-sa-kaugalingon, walay gugma nga kinaiya, walay gugma sa pagkamaayo.​—2 Timoteo 3:​1-5, 13.

Kana nagbatbat pag-ayo sa hakog nga mga tawo nga magagamag mga pelikula, mga rekord, mga magasin, ug mga libro nga nagdayeg sa pagpanapaw, mga droga, paghikog, pagbuno, panglugos, pag-unay, pagkaulipon, ug pagpaantos. Pinaagi niini ug sa ubang paagi, ang mga demonyo nagpasiugda sa usa ka kultura nga, sama sa mahugawng hangin, naghugaw sa mga kaisipan ug mga kasingkasing sa samang batag tigulang, nga nagdaot sa mga batakan sa pamilya ug sa diyosnong pamatasan.

Ang pagdagsang sa pagdagit, paghasi, ug pagpatay sa bata maoy bahin sa ilhanan sa kataposang mga adlaw. Dugang pa, ang Bibliya nag-ingon nga ‘ang mga tawo maoy mga mahigugmaon sa ilang kaugalingon, dili ikasabot, dili-maunongon, mga maluibon.’ Busa karong mga adlawa ang mga bugkos sa kaminyoon sagad nga mabugtas dayon inigkahuman sa pagtagkos niini. Samtang modaghan ang mga diborsiyo, modaghan usab ang mga pagdagit pinaagi sa ginikanan. Ug ang pagbun-og ug pagpatay sa presente o kanhing mga kapikas midaghan, nga kinabag-an sa mga biktima maoy mga babaye. Sa ingon, makita nato ang usa ka kaliwatan sa mga bata kansang mga ginikanan nagdasig kanila sa paglayas tungod sa pagpasagad ug pag-abuso kanila. Dugang pa, ang atong panahon gitiman-an sa mga bata nga “masukihon sa mga ginikanan,” nga “gahig-ulo,” ug mopalabi sa paglayas kauban sa ilang mga isigkaingon inay sa pagtahod sa diyosnong mga batakan.​—2 Timoteo 3:​2-4.

Ang Trahedya Duol Nang Matapos

Hinuon, ang impluwensiya ni Satanas ug sa iyang mga demonyo duol nang matapos. (Pinadayag 12:12) Ang tagna sa Pinadayag 20:​1-3 nag-ingon nga ipahipos sa Diyos si Satanas ug ang iyang mga demonyo. Human niana, ang langitnong Gingharian sa Diyos, diha sa mga kamot ni Jesu-Kristo, magmando niining yutaa diha sa pagkamatarong, nga magapatuman sa hustisya ug magagarantiya sa kasegurohan alang sa tanan. (Salmo 72:​7, 8; Daniel 2:44; Mateo 6:​9, 10) Mawala na unya ang hakog nga mga sistema sa komersiyo nga nagdaogdaog sa mga kabos ug nagpahimulos sa tawhanong kahuyangan alang sa ganansiya, kay “ang kalibotan umalagi ug mao usab ang tinguha niini.” (1 Juan 2:17) Ang tanan nga nagbatasan sa tuman nga pagkadaotan pagawagtangon, sumala sa gitagna sa Proverbio 2:22: “Ang tuman-kadaotan . . . pagaputlon gikan sa yuta mismo.”

Ang Miqueas 4:4 nagpatin-aw nga sa bag-ong kalibotan sa Diyos aduna unyay kasegurohan ug kalinaw alang sa tanan: “Walay mausa ang magapakurog kanila.” Sa unsang paagi mahitabo kana? Pinaagi sa harianong kasugoan sa gugma. Ang maong labaw nga kasugoan magahari sa tanang hunahuna ug mga lihok. Kadtong buhi sa maong panahon nakakat-on na sa pagpabanaag sa personalidad ni Jesus ug sa iyang Amahan, si Jehova nga Diyos, sanglit kon sila dili magpabanaag, sila dili tugotan sa pagpabiling buhi. Pinaagi sa pagsul-ob sa ilang kaugalingon sa ‘malumong mga pagbati sa kamabination, kalulot, pagpaubos sa hunahuna, ug kalumo,’ ang kahakog mawagtang na gikan sa tawhanong kinaiyahan. (Colosas 3:12) Ang kinabuhi mahimong masilakon sa kalipay; ang mga panimalay moamag sa kamainiton ug ang pagmahal mao unya ang naandan sa tibuok yuta.

Ang Isaias 65:​21-23 nagsaad sa madagayaong pagkaon ug maayong mga puloy-anan alang sa tanan: “Sila magatukod gayod ug mga balay ug magapuyo niana; ug sila magatanom gayod ug mga parrasan ug magakaon sa ilang bunga. . . . Sila dili magabudlay sa walay kapuslanan, ni manganak sila alang sa kasamok.” Wala nay pag-abuso. Wala nay pag-antos alang sa mga bata o sa mga ginikanan.

Pagbatog Kaayohan Karon

Bisan karon, sa kataposang mga takna niining daotang sistema, ang kahibalo bahin kang Jehova ug sa iyang katuyoan nga ipasig-uli kining yutaa nga usa ka paraiso magpatunghag mga kaayohan. Kini nakahatag sa daghang batan-on ug mga ginikanan sa paglaom ug usa ka hinungdan sa kalipay, bisan pa kon sila nahimong mga biktima sa atong mga panahon. Pananglitan, si Tamara, nga gihisgotan sa atong miaging artikulo, mipatin-aw kon unsay nahitabo sa iyang kinabuhi.

“Sa dihang ako 18 anyos, ako naminyo ug kapin kon kulang mibiya sa akong pundok sa ‘mga higala,’ nga ang pipila kanila misangpot nga napriso, nagiyan sa mga droga, o nahimong pampam. Apan nabatonan ko gihapon ang mao rang personalidad, mao nga nagsugod ang mga pagpakiglalis batok sa akong bana. Hinuon, wala madugay tapos sa pagpanganak sa among anak lalaki, may nahitabo nga bug-os nag-usab sa akong kinabuhi. Nakakita akog Bibliya ug misugod sa pagbasa niini. Usa ka gabii akong nabasa ang kapitulo sa Proverbio nga nag-ingong ‘ang pagpangita sa kaalam maoy sama sa pagpangita sa nalubong nga bahandi.’ (Proverbio 2:​1-6) Una ako matulog niadtong gabhiona, miampo ako alang sa maong kaalam. Sa pagkabuntag, ang mga Saksi ni Jehova mitimbre sa timbre sa akong pultahan. Misugod ako pagtuon sa Bibliya uban kanila, apan gidangtag taastaas nga panahon una nako ikapadapat ang akong nakat-onan gikan sa Bibliya. Sa kataposan, ako nahimong determinado sa pagsunod sa Kristohanong dalan sa kinabuhi ug nabawtismohan. Karon, duyog sa akong bana, ako nagtabang sa uban sa pagdawat sa kahupayang gitagana sa Diyos.”

Oo, nakaplagan ni Tamara ang Tinubdan sa tanang kahupayan, si Jehova nga Diyos. Siya maoy langitnong Amahan kinsa dili gayod mobiya niadtong nagatapot kaniya. Ang Salmo 27:10 nagsulti kanato: “Kon ugaling ang akong kaugalingong amahan ug ang akong kaugalingong inahan mobiya kanako, si Jehova mismo maoy mosagop kanako.”

Si Domingos, nga gihisgotan ganina, nakakaplag usab ug usa ka tinuod nga pamilya nga nagtagana sa kahupayan, pagpalig-on, ug pagpaluyo. Miasoy siya: “Usa ka adlaw akong nadawat ang usa ka kopya sa librong Pagpatalinghog sa Dakong Magtutudlo ug natingala sa pagkahibalo nga ang Diyos adunay ngalan, si Jehova.a Mitambong ako sa usa sa mga tigom sa mga Saksi ni Jehova ug natingala sa pagkakitang walay mga pagpihig sumala sa sosyal nga baroganan. Ang mga Saksi misugod pagtuon sa Bibliya uban kanako bisan pa sa akong timawang pamiste, pagkabagis, ug kawalay-pagsalig sa tanan. Sa inanay ila akong gitabangan sa pagsalikway sa kanhi nakong dalan sa kinabuhi. Sila mitabang pa kanako nga makabaton ug trabaho. Sa ngadtongadto ako natabangan sa pag-uswag ngadto sa bawtismo.”

Ang mga kongregasyon sa mga Saksi ni Jehova maoy samag usa ka salipod alang sa mga batan-on. Ang mga Saksi malipay nga motabang kang bisan kinsa nga buot mahibalo sa kahibulongang paglaom sa unahan. Ang kahupayan nga ihatag ngadto niadtong nagtinguha sa usa ka relasyon uban sa ilang langitnong Amahan maoy dako, sanglit ang mga Saksi nabansay man sa pagtaganag tambag ug pagtultol gikan sa Pulong sa Diyos ang Bibliya. Usa ka Saksi mipatin-aw nga ang mga batan-on kinahanglang pakitaan nga ang dulumtanang kahimtang nga tingali ilang nasudlan maoy dulumtanan usab kang Jehova. Ang Saksi nagpahayag: “Dili buot ni Jehova nga abusohan ang mga bata. Dili niya buot nga sila magmasulob-on. Apan dili niya buot nga ilisan ang usa ka matang sa pag-abuso sa laing matang sa pag-abuso​—ang pag-abuso nga ilang makuha sa kalye. Sila makaduol sa hamtong nga mga indibiduwal diha sa organisasyon ni Jehova aron sa paghisgot bahin sa ilang mga suliran ug ikapakita kanila kon unsaon pagsulbad ang suliran.”

Alang sa mga bata kansang mga kasingkasing maoy madinawaton, ang Pulong sa Diyos nagtaganag usa ka gamhanang panukmod sa paglikay sa lit-ag sa pamit-os sa isigkaingon. Si Frances, usa ka 17-anyos nga dalagita, gidasig sa usa ka klasmet nga modulag hooky tapos sa klase sa daghang panahon nga wala mananghid sa iyang mga ginikanan. Sa kadugayan, siya milayas sa balay. Human ipahinabo ang mga takna sa kagul-anan alang sa iyang mga ginikanan, siya mipauli. Human niadto, duha ka Saksi gikan sa iyang kongregasyon ang miduaw. Nasayran nila nga ang pamilyahanong kahimtang dili mao ang hinungdan sa suliran, ug sila sa kamahigugmaon mihatag ug tambag. Gipatin-aw nila ang Kristohanong katungdanan sa mga batan-on nga motahod sa ilang mga ginikanan (Efeso 6:​1, 2); ang panginahanglan sa paglikay sa pagkadili-matinud-anon, sanglit siya midulag hooky nga wala mananghid sa iyang mga ginikanan (Efeso 4:25); ug ang kahinungdanon sa paglikay sa daotang mga kauban. (1 Corinto 15:33) Siya miuyon.

Tabang Gikan sa Kahitas-an

Si Cheryl nakakaplag usab ug tabang gikan ni Jehova sa pagsagubang sa pagdagit sa iyang mga anak pinaagi sa iyang kanhi-kapikas.b Sa gisukna kon unsay nakatabang niya sa pagsagubang sa maong mapait nga kasinatian, siya miingon: “Ang unang butang nga akong gibuhat mao ang pagbasa sa mga Salmo, ilabina ang Salmo 35. Makapahupay ang pagkahibalo nga nakita ni Jehova ang inhustisya sa akong hiagoman.” Ang Salmo 35:​22, 23 nag-ingon: “Imong nakita, Oh Jehova. Ayaw pagpakahilom. Oh Jehova, ayaw pagpahilayo kanako. Pukawa ang imong kaugalingon ug magmata sa akong panghukom, . . . sa akong kaso sa balaod.”

Tapos sa duha ka tuig, tungod sa pagpaluyo ni Jehova ug sa tabang gikan sa mga Saksi, giatubang ni Cheryl ang iyang kanhi-bana, ug giduaw niya ang iyang mga anak. Siya nakahatag ug makahupayng mga tubag kon nganong gikinahanglan nga mahitabo kadto kanila ug nagpasalig kanila nga siya wala magsalikway kanila. Tungod kay si Cheryl nagbansay sa iyang mga anak sa pagpasidungog kang Jehova, siya nakasulti kanila bahin sa pagsalig nga iyang nabatonan diha kanila. Siya mipatin-aw: “Nasayod ako nga ang akong mga anak nahigugma kang Jehova, ug dili niya itugot nga ang malungtarong kadaot modangat kanila.”

Kana ang paagi nga nasulbad ang suliran. Tungod sa malugotong paningkamot ni Cheryl sa pagpakiglabot sa langyawng opisyales sa imigrasyon ug sa iyang pagsalig kang Jehova pinaagi sa matim-os nga pag-ampo, ang iyang mga anak nahibalik kaniya. Si Cheryl miingon: “Kinahanglang isulti ko nga maoy pinaagi lamang sa gahom ni Jehova nga akong nakuhag balik sila.”

Pagkahinungdanon gayod ang pagtudlo sa atong mga bata karon sa pag-ila kon kinsa si Jehova ug sa pagsimba kaniya! Ang Bibliya nag-ingon sa 1 Pedro 3:12 nga ang mga mata ni Jehova “anaa sa mga matarong, ug ang iyang mga igdulongog gikiling sa ilang pangaliya.” Si Jehova sa pagkatinuod maoy salipdanan alang sa atong kabataan. Ang iyang ngalan maoy “usa ka malig-ong torre. Ngadto niana ang matarong modalagan ug mahatagan ug panalipod.”​—Proverbio 18:10.

Bisan pag kita nagkinabuhi sa peligroso kaayong mga panahon ug wala masayod sa tanang panahon kon unsay mahitabo sa atong mga bata, ang mga ginikanan nga nagsimba kang Jehova nahibalo nga walay malungtarong kadaot ang modangat sa ilang mga anak nga nagmatinumanon. Siya nagsaad pa nga banhawon gikan sa mga patay kadtong nag-antos ingong mga biktima sa atong kapanahonan ug sa pagpapas sa kasakit ug pag-antos nga gipaagom kanila.​—Isaias 65:​17, 18; Juan 5:​28, 29.

Ang paglaom sa bag-ong kalibotan sa Diyos maoy kahibulongang paglaom. Mao usab ang kaamgohan nga sa dili madugay wagtangon sa Diyos si Satanas ug ang iyang tuman-kadaotang sistema gikan sa yuta. Wala na unya ang bisan unsang hulga sa atong mga anak. Usa sa mga awit nga ginaawit sa mga Saksi ni Jehova sa ilang mga tigom sa kongregasyon nagbatbat sa maong bag-ong sistema niining paagiha: “Kabataan manag-awit,/tugob didto pakigdait,/pagkabanhaw masaksihan,/kon ganti inyong tutokan”!

Sa sunod panahong imong mahibalag ang pipila sa mga Saksi ni Jehova, hangyoa sila sa pagpakita kanimo kon sa unsang paagi ikaw usab makakat-on ug dugang bahin sa mga kalipay nga anaa lang sa unahan sa umaabot nga bag-ong kalibotan sa pagkamatarong sa Diyos. Sila malipay nga motabang kanimo sa pagsabot kon sa unsang paagi ang Pulong sa Diyos makahatag ug dakong paglipay karon ug kinabuhing dayon sa ulahi.​—Salmo 37:29; Pinadayag 21:4, 5.

[Mga footnote]

[Blurb sa panid 12]

“Dili buot ni Jehova nga abusohan ang mga bata”