Usa ka Pagbalik Duaw sa Rusya

USA SA DAGKONG MGA KAUSABAN SA KANHING UNYON SOBYET MAO ANG KAGAWASAN SA PAGHISGOT SA RELIHIYON. GIGAMIT SA DAGHANG RUSO ANG MAONG KAGAWASAN SA PAGSUSI SA MGA PAGTULON-AN SA BIBLIYA. ANG RESULTA MAOY, SA PAGKATINUOD, USA KA MODERNONG-ADLAWNG MILAGRO.

NATINGALA ako pag-ayo niadtong Hulyo 28, 1993, sa dihang gikuha nako ang New York Times niadtong buntaga ug nakita sa atubang nga panid ang usa ka dakong hulagway sa pagbawtismo didto sa Moscow! Kini may kapsiyon: “Ang kagawasan sa relihiyon sa Rusya nagdala ug mga kinabig ngadto sa Locomotive Stadium sa Moscow alang sa dinaghan nga pagbawtismo ingong mga Saksi ni Jehova.”

Ang akong asawa ug ako mipauli gikan sa Rusya usa lamang ka adlaw una niana. Mitambong kami sa maong pagbawtismo sa 1,489 ka tawo. Ang Kristohanong gugma nga gipakita sa mga Ruso ug ang ilang interes sa espirituwal nga mga butang nakapahingangha gayod kanamo. Ang usa ka kasinatian namo tapos sa kataposang sesyon sa kombensiyon sa Dominggo sa gabii nag-ilustrar niini.

Sa dihang mipauli sa among hotel sakay sa Metro, milingkod ako tupad sa usa ka batan-ong lalaki nga lagmit 18 o 19 anyos ang edad. Gitunolan nako siya ug tract sa Bibliya, sa Ruso nga pinulongan, Unsay Paglaom sa Namatay nga mga Minahal?a Tapos kana tan-awa sa makadiyot, gipasa niya kana sa iyang inahan. Busa gihatagan nako ug lain ang batan-on. Niana gitudlo niya ang pangbukas nga pangutana, “Kon ang usa ka tawo mamatay, mabuhi pa ba siya pag-usab?” ug, sa tono nga maduhaduhaon, nangutana sa Iningles, “Motuo ka ba niini?”​—Job 14:14, King James Version.

Mitan-aw kaniya direkta sa mata, ug uban sa hugot nga kombiksiyon, ako mitubag: “Nagtuo gayod ako niana!” Midugang dayon ako: “Hunahunaa lang kini. Ang atong kinabuhi ingong intelihente, nagahunahunang mga tawo maoy usa ka milagro. Ang usa ka Mas-Taas nga Persona mao gayoy nagpahinabo sa mga balaod nga nagtino sa atong pagkahimong mga tawo. Busa ako nagtuo nga kining Labawng Usa makalalang-pag-usab sa patay nga tawo aron mabuhi pag-usab.”

Dihadiha ang batan-on misugod sa pagbasa sa tract. Sa dihang natapos na siya, gitunol nako niya ang brosyur, sa Rusong pinulongan, Tinuod Bang May Pagtagad ang Diyos Kanato?* Buot niyang mokat-on ug dugang, apan kami mokanaog na sa sunod nga hunonganan sa subwey. Bisan tuod giapas sa batan-on ug sa iyang inahan ang usa ka tren niadtong gabhiona, nanaog sila sa subwey uban kanamo sa pagpakig-estorya pa sulod sa pipila ka minuto. Human mikomento ug mubo bahin sa among programa sa pagtuon sa Bibliya, gipakita nako kaniya ang adres sa likod sa brosyur diin makasulat siya alang sa dugang impormasyon.

Mibiya kami sa Rusya sa misunod nga adlaw, apan ang mga panagtagbo nga sama niini dili gayod makalimtan.

Kanunay Kaming Naghunahuna sa Rusya

Kanunay akong naghunahuna mahitungod sa daghan kaayong mga bag-ohan nga nabawtismohan tapos ang pagdili sa mga Saksi ni Jehova sa kanhi Unyon Sobyet sa kataposan gikuha niadtong Marso 1991. Pito ka kombensiyon ang giorganisar dayon alang sa ting-init sa 1991, ug 7,820 ang gituslob sa tubig. Unya, sa 1993 nga mga kombensiyon sa ting-init​—apil ang usa nga among gitambongan sa Moscow—​11,238 ang nabawtismohan.

Ang kasibot sa mga Saksi sa Rusya sa pag-ebanghelyo namatikdan sa daghang Ruso nga mga tawo. Sa dihang hunahunaon nimo ang pagsanong sa daghang Ruso sa mga pagtulon-an sa Bibliya, kini daw milagroso.

‘Sa unsang paagi nahimong posible ang kusog nga pag-uswag?’ kami nahibulong. ‘Unsa gayod ka hanas kining maong mga Ruso sa Kristohanong mga pagtulon-an?’

Sa dihang ang usa ka magtiayon nga nagpuyo sa Moscow miingon nga sila mohikay ug mga puy-anan alang kanamo kon duawon namo pag-usab ang Rusya, misugod kami sa paghimog mga plano sa pagbiyahe. Ang among kahinam sa pagbiyahe misamot sa dihang nadawat namo ang dugang mga taho mahitungod sa talagsaong interes sa mga Ruso sa mga kamatuoran sa Bibliya.

Usa ka Maabiabihong Rusong Pamilya

Miabot kami sa Hulyo 24 dala ang mga maleta didto sa dapit nga among estaran sa Moscow​—usa ka ikaduhang-andana nga apartment nga mga napulo ka minutos kon lakwon gikan sa apartment sa among mga higala. Sa pamilya diin kami moestar, ang 15-anyos lamang nga si Katia ang diha sa balay aron sa pag-abiabi kanamo. Kadto Dominggo sa gabii, ug ang ubang membro sa pamilya didto pa sa gawas alang sa Kristohanong ministeryo.

Sa wala madugay, ang ubang membro sa pamilya misugod sa pag-abot​—si Galina, ang inahan; ang 13-anyos nga si Zhenia, ang manghod nga anak nga babaye; ug, sa kataposan, si Viktor, ang amahan. Walay usa kanila ang makasulti pag-ayo ug Iningles, ug ilabinang diyutay ra ang among nahibaloan sa pinulongang Ruso. Daw nahimong sayon ang pakig-estoryahay sa dihang ang among makasultig-Iningles nga mga higala presente ingong mga tighubad apan nahimong lisod sa dihang sila mibiya. Gamiton namo ang Ruso-Iningles nga diksiyonaryo ug mga senyas. Si Katia ug Zhenia maayong makigsulti, kay nakakat-on sa senyas sa mga bungol.

Ang tanan sa pamilya nabawtismohan sa samang panahon, duha lamang ka tuig ang miagi. Si Viktor usa ka ministeryal nga alagad sa kongregasyon, ug gigamit sa mga anak nga babaye ang ilang bakasyon sa eskuylahan sa paggugol ug dugang panahon diha sa ministeryo. Samtang nag-eskuyla, dili sila magpanuko sa pagsulti mahitungod sa ilang pagtuo. Sa pagkatinuod, ang ilang pagsangyaw nakadani pa gani sa pagtagad sa mga awtoridad gawas sa distrito sa ilang eskuylahan. Nahingangha kami sa pagkasayod nga ang pamilya nagadumala ug 28 ka senemanang mga pagtuon sa Bibliya sa balay uban sa mga interesado!

Dayag, gitunong sa matag membro sa pamilya ang pagtagad diha sa pagtuon sa Bibliya ug sa Kristohanong ministeryo, ug nakita namo nga ang ilang mga kinabuhi sa ingon napauswag. Sila nagbanaag ug kalipay.​—Buhat 20:35.

Hanas sa Bibliya

Sa dili pa matulog sa gabii, pangutan-on nako ang pamilya bahin sa mga teksto sa Bibliya. Una nangutana ako kon unsay giingon sa Pinadayag 21:3, 4. Dihadiha, halos nagdungan, ang mga anak nga babaye nakakutlo niana. Dayon gipangutana nako ang Isaias 2:4. Nahibalo usab sila niana, nga migamit pa gani ug mga senyas sa pagpakita sa paghimo sa mga espada nga mga punta sa daro.

Mipadayon ako sa mga teksto sa Isaias nga naghisgot mahitungod sa pagmando sa Gingharian ug sa mga panalangin sa bag-ong kalibotan, nga mao, ang Isaias 9:6, 7; 11:6-9; 25:8; 33:24; 35:5, 6; ug Isa 65:21, 22. Bisan wala moabli sa ilang mga Bibliya, ang pamilya makasulti sa unod sa matag teksto. Ang mga anak nga babaye matag karon ug unya mopakita nga nakahibalo sila sa kasulatan pinaagi sa mga senyas, sama niadtong sa usa ka bata nga nagamando sa usa ka leyon.

Sa laing gabii among gitagad ang mga kasulatan bahin sa pagkamao sa Diyos, nga nagtagad ug maayo sa mga teksto nga nagpakita nga si Jesus maoy ubos sa Diyos ug nga ang Diyos ug si Jesus dili usa ka persona kondili nagakahiusa. Ang pamilya nakasulti sa unod sa maong mga teksto sama sa Juan 10:30, Juan 17:20, 21, ug 1 Corinto 11:3. Ang akong asawa ug ako natingala sa ilang pagkasinati kaayo sa ilang mga Bibliya.

Sa Martes sa buntag mga usa ka dosena kanamo ang nagtagbo ug duyog nga nagbiyahe sakay sa Metro padulong sa usa ka matahom nga parke diin kami migugol ug duha ka oras ug tunga nga nakigsulti sa mga tawo mahitungod sa Bibliya. Gibahin namo ang grupo ug nagtinagurha sa pagsangyaw. Usa sa akong mga kauban mao si Nadia, usa ka Rusong babaye kinsa nagpakita ug kaugdang sa pagduol sa mga tawo ug nakig-estorya kanila. Batid siya sa pagtunong sa pagtagad ngadto sa mga hunahuna sa Diyos diha sa Bibliya. Miingon ako sa akong kaugalingon, ‘Usa kini ka eksperyensiyadong magmamantala.’ Human niadto natingala ako sa pagkasayod nga 17 anyos pa lang siya ug nabawtismohan sulod sa duha pa lamang ka bulan!

Daghan kami ug mga kasinatian nga sama niana, nga nakapahunahuna kanamo nga ang kahimtang sa Rusya maoy talagsaon. Sukad sa pagkahugno sa Komunismo, ang mga Ruso nagpakitag kahinam sa pagsusi sa mga pagtulon-an sa Bibliya. Kadaghanan kanila maoy mga edukado, ug gusto nilang mobasa. Bisan ang mga batan-on maayong mobasa ug mosabot, ingon sa gipamatud-an sa dihang kami miduaw sa usa ka Rusong pamilya nga nakakat-on sa mga kamatuoran sa Bibliya sa dihang ang mga Saksi nailalom pa sa pagdili.

Ang gamayng anak nga lalaki sa magtiayon miingon nga buot niyang mangutana. Pinaagi sa usa ka tighubad, may gihangyo siya. Natandog kaayo ako sa hangyo nga ako miingon nga kon iyang isulat ang iyang hangyo, ako kanang ipasa ngadto sa mga magpapatik sa Pagmata! Milingkod dayon siya ug mihimog sulat. Ang mosunod maoy hubad sa iyang gisulat. Ang sulat gikopya sa panid 25.

“Si Serosha nagsulat gikan sa Rusya ngadto sa Watchtower Society. Ako siyete anyos, ug ako nagauban na kang Papa ug Mama sa pagsangyaw. Gusto kaayo akong makigsulti sa mga tawo bahin sa Gingharian sa Diyos. Gusto ko usab nga mobasa sa magasing Pagmata! Moabot kini sa Rusya kausa lang sa usa ka bulan sa Ruso nga pinulongan apan sa Ingles nga pinulongan kaduha sa usa ka bulan. Gusto ko kaayong makabaton niining magasina kaduha sa usa ka bulan, tungod kay nagustohan ko kaayo kini. Palihog buhata kini.”

Ang pagbiya sa mga nahigala namo sa Moscow dili sayon. Sa mubo kaayong panahon, napamahal sila pag-ayo kanamo.

Gitandi Uban sa Sayong Kristiyanidad

Milarga kami paingon sa Tallinn, Estonia, pinaagi sa tren nga mobiyahe sa gabii. Didto nakita namo ang matahom nga bag-ong mga pasilidad diin ang pagsangyawng buluhaton karon gidumala nianang kanhing republika sa Unyon Sobyet. Tulo ka adlaw sa ulahi misakay kami ug tren paingon sa St. Petersburg. Nianang duha ka lugar ang kaubang mga Kristohanon nangutana bahin sa pagsangyawng buluhaton sa Moscow. “Ang pagkaatua didto ug pagkakita sa pag-uswag,” ako mitubag, “nakatabang kanako nga mas pang nakasabot sa gisulat sa unang bahin sa Buhat 17 ug sa mga sulat ngadto sa mga taga-Tesalonica.”

Kanunay akong natingala nga ang usa ka kongregasyon natukod sa Tesalonica nga tin-awng sulod lamang sa pipila ka semana sa pagministeryo ni Pablo didto. Nakapatingala usab kanako nga sulod sa usa ka tuig o kapin pa, si Pablo misulat niining bag-ong mga Kristohanon ug duha ka sulat mahitungod sa maong halalom nga espirituwal nga mga butang sama sa pagkabanhaw ug “pagasakgawon ngadto sa panganod,” “adlaw ni Jehova,” sa pagsinggit ug “kalinaw ug kasegurohan!,” ug “ang presensiya sa atong Ginoong Jesu-Kristo.” (1 Tesalonica 4:13-17; 5:1-3; 2 Tesalonica 2:1, 2) Ang masibotong kalihokan niadtong unang mga Kristohanon, sa ingon, nakapatungha ug usa ka unang-siglong milagro​—usa ka hamtong, lig-on sa espirituwal nga internasyonal nga organisasyon sa mga magsasangyaw sulod sa mubo kaayong panahon. Mga napulo ka tuig sa ulahi, si Pablo misulat nga ang “maayong balita” “gikawali diha sa tibuok kalalangan sa ilalom sa langit”!​—Colosas 1:23.

Ang nagakahitabo sa Rusya alang kanako ikatandi sa kon unsay nahitabo sa unang siglo.

Ang Pakigbisog nga Monunot sa Pag-uswag

Ang Rusya mao ang kinadak-ang nasod sa yuta, busa ang pagtagana ug pagtultol sa linibo didto nga nagsangyaw sa maayong balita sa Gingharian sa Diyos maoy dayag nga usa ka dakong buluhaton.​—Mateo 24:14.

Ang Bibliya namulong bahin niadtong nakadungog mahitungod sa Kristiyanidad sa unang siglo: “Ang kamot ni Jehova uban kanila, ug usa ka dakong gidaghanon nga nahimong mga magtutuo miliso ngadto sa Ginoo.” (Buhat 11:21) Mapadapat gayod kaayo ang maong mga pulong ngadto sa atong Kristohanong mga igsoon sa Rusya! Hinaot nga ang umahan sa Rusya magpabiling hinog alang sa espirituwal nga pag-ani, ug hinaot nga ang linibo pa didto moduyog sa bililhong pribilehiyo sa pagtabang sa uban pa diha sa dalan sa kinabuhi.​—Tinampo.

[Footnote]

[Mga hulagway sa panid 24, 25]

Itaas: Ang pamilya nga among giestaran. Ibabaw ug tuo: Pagsangyaw sa parke. Ubos sa tuo: Si Serosha ug ang iyang sulat

[Hulagway sa panid 26]

Bag-ong mga pasilidad sa Watch Tower, sa Tallinn, Estonia